Nǔnywɛ́tɔ́xó 11 - MAWUXÓWÉMA

¹ È ma sɔ́ nǔ nyi gbě ǎ ɔ́, è nɔ mɔ nǔ sɔ́ ǎ.

² Zě akwɛ́ towe dó ajɔ̌ tɛnmɛ tɛnmɛ mɛ, ɖó a tunwun nǔ nyanya e ná wá jɛ ɖo gbɛ ɔ́ mɛ sɔ ɔ́ ǎ.

³ Ényí jǐ wu ganjí ɔ́, é nɔ́ ja. Atín ɖé mu jɛ tofɔligbé abǐ totaligbé ɔ́, fí e é mu jɛ ɔ́ jɛ́n é nɔ́ cí.

⁴ Nú a kpɔ́n dó jɔhɔn wú dín ɔ́, a nǎ dó jinukún ǎ; nú a kpɔ́n dó jǐ wú dín ɔ́, a nǎ ya jinukún ǎ.

⁵ A tunwun lě e kɛ́n jɛ nyɔ̌nu wú ɔ́, é nɔ́ su gbɔn ɔ́ a? A tunwun fí e funfún e nɔ ná gbɛ mɛ ɔ́ gosín ɔ́ a? A tunwun ɖěbǔ ǎ. Mɔ̌ ɖokpó ɔ́, a sixú tunwun lě e Mawu nɔ wa azɔ̌ tɔn gbɔn é ǎ. Mawu wɛ bló nǔ bǐ.

⁶ Énɛ́ ɔ́ wú ɔ́, jɛ nǔ dǒ jí sín zǎnzǎn káká yi gbada; ma gɔn azɔ̌ wa ó, ɖó a tunwun azɔ̌ e ɖo nǎ nyɔ́ wɛ é ǎ; ɖě má nyɔ́ ǎ ɔ́, ɖě ná nyɔ́. We lɛ́ɛ bǐ sixú nyɔ́.

⁷ Wěziza ɔ́, nǔ ɖagbe wɛ. Nukún mɔ hwe ɔ́, nǔ ɖagbe wɛ.

⁸ Gbɛtɔ́ ɖó ná j'awǎ ɖo gbɛzán tɔn bǐ mɛ; é ná bó dɔ́ ji káká ɔ́, é ɖó ná j'awǎ. É ní ká flín ɖɔ azǎn gěgé ná tíin bɔ zǎn ná kú dó émí kéze. Nǔ e ná wá jɛ lɛ́ɛ bǐ wɛ nyí nǔ yǎyá.

Mǐ ní j'awǎ dó hwenu

⁹ Mɛ wínnyáwínnyá, din e a kpo ɖo wǐnnyáwínnyá mɛ ɔ́, j'awǎ. Awǎjijɛ ní gɔ́ ayi towe mɛ hwenu e a kpo ɖo wǐnnyáwínnyá mɛ é. Ayi towe mɔ nǔɖé hǔn blǒ; nǔɖé nyɔ́ nukún towe mɛ hǔn, wa. Lo ɔ́, tunwun ganjí ɖɔ Mawu ná wá ɖɔ hwɛ xá we ɖó nǔ e a wa lɛ́ɛ ɖokpó ɖokpó wú.

¹⁰ Hɔn nú nǔ e ná zɔ́n bɔ a nǎ jɛ aluwɛ mɛ lɛ́ɛ, bó hɔn nú nǔ e ná zɔ́n bɔ a nǎ jɛ azɔn lɛ́ɛ é, ɖó wǐnnyáwínnyá mɛ sín hwenu nɔ wá yi azizɔ ɖɔhun.