Nǔnywɛ́tɔ́xó 10 - MAWUXÓWÉMA

¹ Nú sukpɔ kúkú ɖo célu mɛ ɔ́, é nɔ́ hɛn célu ɔ́ gblé, bɔ é nɔ́ hwɛ́n nǔ kúkú. Mɔ̌ ɖokpó ɔ́, nǔgblégbléwiwa kpɛví ɖé nɔ́ hɛn nǔnywɛ́ kpó susu kpó gblé.

² Nǔnywɛ́tɔ́ sín ayixa nɔ zɔ́n bɔ é nɔ́ wa nǔ ɖagbe; xlonɔ tɔn ka nɔ zɔ́n bɔ é nɔ́ wa nǔ nyanya.

³ Ényí xlonɔ ɖé ɖo yiyi wɛ ɖo ali jí ɔ́, nǔ ma sɔgbe e wa wɛ é nɔ́ ɖe ɔ́ nɔ́ zɔ́n bɔ mɛ bǐ nɔ́ tunwun ɖɔ xlonɔ wɛ.

⁴ Ényí gǎn towe sin xomɛ dó we hǔn, ma jó azɔ̌ towe dó ó; ɖó è nɔ xwíí ɔ́, è nɔ gbɛ́ tagba alɔkpa bǐ.

⁵ Gǎn hɛn ɔ́, é ná wa nǔ nyi do, ɖó un mɔ nǔ agɔ agɔ gěgé ɖo hwe glɔ́.

⁶ Nǔ agɔ ɖé lɛ́ɛ ɖíe: Gǎn ɖě lɛ́ɛ nɔ zé xlonɔ ɖó tɛn ɖaxó mɛ hwe ɖé lɛ́ɛ nu, bó ká nɔ́ zé mɛjɔmɛ ɖó tɛn kpɛví mɛ.

⁷ Un mɔ kannumɔ ɖo sɔ́ jí, bɔ gǎn ká ɖo afɔ zɔn wɛ kannumɔ ɖɔhun.

⁸ Mɛ e kun do ɔ́ sixú wá jɛ mɛ; mɛ e ka ɖo dǒ só wɛ ɔ́, dan sixú wá ɖu i.

⁹ Mɛ e ɖo awǐnnya gba wɛ ɔ́, awǐnnya sixú wá gblé wǔ i; mɛ e ɖo nakí zɛ wɛ ɔ́, awǒvinú sixú wá jɛ dó jǐ tɔn.

¹⁰ Ényí asyɔ́ví ɖé kpo nu bónú è ma gan ǎ ɔ́, è nɔ zǎn hlɔ̌nhlɔ́n dín. È sɔ́ nǔnywɛ́ dó wa nǔ ɔ́, è nɔ mɔ nu tɔn.

¹¹ Ényí mɛ e nɔ sa gbe dó dan bó nɔ́ wlí ɔ́, má sa gbe dó dan ɔ́ ǎ bónú é ɖu i ɔ́, ani é ká nyɔ́ gbe sa dó dan dó wa lo?

È má nɔ ɖɔ xó dín ó

¹² Nǔnywɛ́tɔ́ ɖo xó ɖɔ wɛ ɔ́, xó tɔn nɔ́ zɔ́n bɔ è nɔ ɖó sísí n'i. Xlonɔ ka yí xó ɔ́, é nɔ́ ɖɔ xó bó nɔ́ kɔ́n wi éɖée tɔn.

¹³ Xlonɔ kɛ nu ɔ́, xó majɛtó majɛtó ɖé wɛ é nɔ́ bɛ́; é nɔ́ ɖo xó gblégblé, xó má nyɔ́ se ɖɔ wɛ káká yí fó.

¹⁴ Xlonɔ ɔ́, xó ɖɔ wɛ é nɔ́ ɖe magbokɔ. Nǔ ka ɖo mɔ̌ có gbɛtɔ́ tunwun nǔ e ɖo nǎ jɛ wɛ sɔ ɔ́ ǎ. Énɛ́ ɔ́ wú ɔ́, mɛ̌ wɛ sixú tunwun nǔ e ná jɛ ɖo kú tɔn gúdo ɔ́, bó ná ɖɔ n'i?

¹⁵ Azɔ̌ e xlonɔ nɔ wa é nɔ́ cikɔ n'i káká, bɔ é sɔ́ nɔ́ tunwun ali e é ná gbɔn yi toxo mɛ ɔ́ ǎ.

¹⁶ Ényí to ɖé tíin bɔ axɔ́sú e ɖo to ɔ́ nu ɔ́ nyí yɔkpɔ́vú, bɔ adɔ jɛ nukɔn nú azaglɔ́gán tɔn lɛ́ɛ hǔn, to énɛ́ ɔ́ sín nǔ blá wǔ.

¹⁷ Nǔ ka nyɔ́ nú to e axɔ́sú tɔn jɔ ɖo axɔ́ví kún mɛ bɔ azaglɔ́gán tɔn lɛ́ɛ nɔ́ ɖu nǔ hwenu e é jɛ xá ɖɔ è nǐ ɖu nǔ, bó ná dó mɔ hlɔ̌nhlɔ́n é; é nyí yě ná nɔ ɖo ahan mú wɛ ǎ.

¹⁸ Mɛ e ɖi fɔnlín dín ɔ́, xɔ tɔn nɔ wán zɔn mɛ. Mɛ e nɔ dó vɛ̌ nú nǔ ɔ́, xɔ tɔn nɔ kun sin.

¹⁹ Dɔkunnɔ nɔ ɖu nǔ bó nɔ́ dó ɖe ayi ɖ'ayǐ; é nɔ́ nu vɛ̌ɛn dó j'awǎ; akwɛ́ tɔn nɔ́ zɔ́n bɔ é nɔ́ ɖó nǔ bǐ.

²⁰ Ma ɖɔ xó nyanya dó axɔ́sú wú ó; ma lin vɔ́vɔ́ lɔ ó. Ma ɖɔ xó nyanya dó mɛjɔmɛ wú ó; hwi ɖokpónɔ ná bó ɖo xɔnɔnɔ towe mɛ hǔn, ma ɖɔ xó nyanya dó wǔ tɔn ó, ɖó xɛ sixú zé xó towe yi ɖɔ; nǔ e ɖó awa e sixú zé xó towe yi ɖɔ.