Nǔnywɛ́tɔ́xó 1 - MAWUXÓWÉMA

Nǔ bǐ wɛ nyí nǔ yǎyá

¹ Davídi ví, Jeluzalɛ́mu xɔ́sú, nǔnywɛ́tɔ́ ɔ́, xó e é ɖɔ lɛ́ɛ ɖíe; é ɖɔ:

² Nǔ bǐ wɛ nyí nǔ yǎyá, nǔ bǐ wɛ nyí walá. Nyɛ nǔnywɛ́tɔ́ ɔ́ wɛ ɖɔ mɔ̌.

³ Étɛ́ gbɛtɔ́ nɔ́ mɔ ɖo tagba e é nɔ́ jɛ ɖo hwe glɔ́ fí é mɛ?

⁴ Mɛ ɖě nɔ́ ɖo kúkú wɛ, mɛ ɖě nɔ́ ɖo gbɛ wá wɛ, ayǐkúngban ɔ́ ká húzú ǎ.

⁵ Hwe nɔ tɔ́n, bó nɔ́ yi xɔ, bó nɔ́ lɛ́ jɛ fí e é tɔ́n sín ɔ́ hwlɛ́n dó jí.

⁶ Jɔhɔn nɔ nyi dó tofɔligbé, bó nɔ́ lílɛ́ wá yi totaligbé, bó nɔ́ lɛ́ lɛ́ kɔ wá tofɔligbé; mɔ̌ wɛ é nɔ́ ɖo yiyi wɛ, bó nɔ́ ɖo wǐwá wɛ.

⁷ Tɔsisa lɛ́ɛ bǐ ɔ́, xu mɛ wɛ yě bǐ nɔ́ sa yi kɔn dó; có xu ɔ́ ká nɔ́ gɔ́ gbeɖé ǎ. Fí ɖokpó ɔ́ jɛ́n tɔsisa lɛ́ɛ nɔ́ fɔ́n bó nɔ́ ɖo sisa yi wɛ tɛgbɛ.

⁸ Nǔ e ɖo jijɛ wɛ lɛ́ɛ bǐ wɛ cikɔ, é cikɔ káká bɔ è sixú ɖɔ ǎ. Nukún mɔ bó kpo ɖo biba ná mɔ wɛ, tó se bó kpo ɖo biba ná se wɛ.

⁹ Nǔ e tíin wá yi ɔ́ jɛ́n ná lɛ́ wá tíin; nǔ e è ko bló ɖ'ayǐ ɔ́ jɛ́n è nǎ lɛ́ wá bló. Nǔɖé nyí dǒ wá ɖo hwe glɔ́ fí ǎ.

¹⁰ Ényí nǔɖé tíin bɔ è ɖɔ: “Hǐn! Nǔ yɔ̌yɔ́ ɖíe” hǔn, tunwun ɖɔ nǔ énɛ́ kó tíin ɖ'ayǐ ɖo xóxó hwenu.

¹¹ Nǔ e wɛ kpowun ɔ́ wɛ nyí ɖɔ mǐ sɔ́ nɔ́ flín nǔ e jɛ dó tɔ́gbó tɔgbo mǐtɔn lɛ́ɛ jí é ǎ. Mɛ e ná wá jɛ mǐ gúdo lɛ́ɛ lɔ sɔ́ ná flín nǔ e jɛ dó mǐ tɔ́gbó tɔgbo yětɔn lɛ́ɛ jí é ǎ.

Nǔnywɛ́tɔ́ ɖɔ nǔ e é mɔ dó gbɛ ɔ́ wú é

¹² Nyɛ nǔnywɛ́tɔ́ ɔ́, un ko nyí Izlayɛ́li xɔ́sú bó nɔ Jeluzalɛ́mu kpɔ́n.

¹³ Nǔ e nɔ́ ɖo jijɛ wɛ ɖo hwe glɔ́ fí lɛ́ɛ ɔ́, un ɖɔ un ná zán nǔnywɛ́ ce dó ba do ná céɖécéɖé, bó ná tunwun nǔ e ɖo mɔ̌ zɔ́n wɛ ɔ́. Azɔ̌ syɛ́nsyɛ́n ɖokpó wɛ bɔ Mawu zɔ́n gbɛtɔ́.

¹⁴ Un mɔ nǔ e ɖo jijɛ wɛ ɖo hwe glɔ́ fí lɛ́ɛ bǐ; un kpɔ́n mɛ káká ɔ́, un wá mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ.

¹⁵ Nǔ e xá ɔ́, è sixú jlɔ́ ǎ; è sixú xa nǔ e má tíin ǎ é ǎ.

¹⁶ Un ɖɔ nú nyiɖée ɖɔ: “Un yí nǔnywɛ́ dó nǔnywɛ́ jí, un ɖó nǔnywɛ́ hú mɛ e ɖu axɔ́sú ɖo Jeluzalɛ́mu dó nukɔn nú mì lɛ́ɛ bǐ.” Nǔ e un mɔ lɛ́ɛ ná nǔnywɛ́ mì, un mɔ nukúnnú jɛ nǔ e gbɛ ɔ́ nyí ɔ́ wú.

¹⁷ Un ɖɔ un ná ba do ná céɖécéɖé bó ná tunwun vogbingbɔn e ɖo nǔnywɛ́ kpó xlojijɔ kpó mɛ é, bó wá mɔ ɖɔ énɛ́ ɔ́ lɔmɔ̌ ɔ́, wezun kán ɖo jɔhɔn gúdo wɛ.

¹⁸ È ɖo nǔnywɛ́ yí dó nǔnywɛ́ jí wɛ ɔ́, tagba dó tagba jí nú mɛɖée wɛ; è ɖo nǔ tunwun dó nǔ e è ko tunwun ɔ́ jí wɛ ɔ́, wǔvɛ́ dó wǔvɛ́ jí nú mɛɖée wɛ.