Eblée 9 - MAWUXÓWÉMA

Mawu sinsɛn akɔjijɛ xóxó ɔ́ tɔn kpódó yɔ̌yɔ́ ɔ́ tɔn kpán

¹ Akɔjijɛ nukɔntɔn ɔ́ ko ɖó tito lɛ́ɛ nú Mawu sinsɛn, bó ɖó sinsɛnxɔ e gbɛtɔ́ sɔ́ alɔ dó gbá é ɖokpó.

² È gbǎ goxɔ ɖokpó bɔ è nɔ ylɔ́ tɛn nukɔntɔn e ɖo goxɔ ɔ́ mɛ ɔ́ ɖɔ Tɛn mímɛ́. Fí énɛ́ ɔ́ wɛ è fɔ zogbɛ́nhɛnnú kpó távo kpó, kpódó wɔ̌xúxú e è xwlé Mawu lɛ́ɛ kpán ɖó.

³ Tɛn wegɔ́ e ɖo xɔmɛgbovɔ wegɔ́ ɔ́ gúdo ɔ́, è nɔ ylɔ́ ɖɔ Tɛn mímɛ́ bǐ.

⁴ Vɔ̌sákpe e è blǒ kpó siká kpó bɔ è nɔ dó zǎlínkpɔ́n zo ɖ'é jí ɔ́ ɖo fínɛ́, bɔ akɔjijɛgbá e wú è kɔn siká dó gbɔn fí bǐ ɔ́ ɖo fínɛ́. Sikázɛ́n e mɛ nǔɖuɖu e è nɔ ylɔ́ ɖɔ mǎna ɔ́ ɖe ɔ́ ɖo akɔjijɛgbá ɔ́ mɛ. Aalɔ́ɔn sín kpo e tɔ́n ama ɔ́ kpódó awǐnnyatɛ e jí è wlǎn akɔjijɛxó lɛ́ɛ dó ɔ́ kpán ɖ'é mɛ.

⁵ Wɛnsagun susunɔ e ɖe xlɛ́ ɖɔ Mawu ɖo tɛn énɛ́ ɔ́ mɛ lɛ́ɛ ɖo akɔjijɛgbá ɔ́ ta, bó kɛ awa yětɔn lɛ́ɛ cyɔ́n fí e è nɔ sá vɔ̌ ɖe, bó nɔ́ mɔ hwɛsɔ́kɛ yí ɖe é. Amɔ̌, hwenu e è nǎ tín nǔ énɛ́ lɛ́ɛ ɖokpó ɖokpó mɛ dó ɔ́ ɖíe ǎ.

⁶ È to nǔ lɛ́ɛ bǐ gbɔn mɔ̌, bɔ vɔ̌sánú-xwlémawutɔ́ lɛ́ɛ nɔ byɔ́ tɛn nukɔntɔn ɔ́ mɛ ayǐhɔ́ngbe ayǐhɔ́ngbe, bó nɔ wa azɔ̌ yětɔn.

⁷ Amɔ̌, tɛn wegɔ́ ɔ́, vɔ̌sánú-xwlémawutɔ́ ɖaxó ɔ́ kɛ́ɖɛ́ jɛ́n nɔ byɔ́ mɛ; azɔn ɖokpó wɛ é nɔ byɔ́ mɛ ɖo xwe ɖokpó mɛ. É ɖó ná hɛn kanlin sín hun byɔ́ mɛ, bó ná zé xwlé Mawu dó hwɛ e é ɖésúnɔ hu lɛ́ɛ kpódó ée togun ɔ́ ma tunwun ǎ bo hu lɛ́ɛ kpó tamɛ.

⁸ Yɛsinsɛn ɔ́ ɖo ɖiɖe xlɛ́ wɛ gbɔn fínɛ́ ɖɔ ényí tɛn nukɔntɔn ɔ́ kpo ɖo te jɛ́n wɛ ɔ́, ali e yi Tɛn mímɛ́ bǐ ɔ́ mɛ ɔ́, è kún ko hun ó.

⁹ Nǔ énɛ́ ɔ́, xlɛ́ ɖé wɛ é nyí, bó ɖo xó ɖɔ dó hwenu e mǐ ɖe din ɔ́ wú wɛ. Nǔ énɛ́ ɔ́ ɖo tíntín mɛ wɛ ɖɔ nǔ e è nɔ ná Mawu lɛ́ɛ kpó vɔ̌ e è nɔ sɔ́ kanlin dó sá n'i ɔ́ kpó kún sixú bló bónú mɛ e ɖo Mawu sɛn gbɔn mɔ̌ wɛ ɔ́ sín ayi ní mɛ́, bónú nǔ vɔ ɖ'é wú ó.

¹⁰ Đó Mawu sinsɛn gbɔn mɔ̌ ɔ́, nǔɖuɖu kpó ahan nunu kpó, kpódó wǔsláslá sín nǔwiwa tɛnmɛ tɛnmɛ lɛ́ɛ kpó sín sɛ́n kpowun wɛ; tito gbɛtɔ́ tɔn kpowun wɛ, bó wa azɔ̌ káká jɛ hwenu e Mawu vɔ́ nǔ lɛ́ɛ bǐ to dó é.

¹¹ Lo ɔ́, Klísu ɔ́ wá, bó nyí vɔ̌sánú-xwlémawutɔ́ ɖaxó nú nǔ ɖagbe e wá lɛ́ɛ, bɔ goxɔ e mɛ é nɔ wa azɔ̌ tɔn lɛ́ɛ ɖe ɔ́ ɖo tají bó sɔgbe, bɔ nǔ bǐ vɔ ɖ'é wú hú ée gbɛtɔ́ gbá ɔ́; é nyí gbɛmɛ fí sín nǔ ǎ.

¹² Azɔn ɖokpó géé jɛ́n Klísu byɔ́ Tɛn mímɛ́ bǐ ɔ́ mɛ bɔ xó fó; é ka nyí gbǎgbá sín hun kpó nyibúví sín hun kpó wɛ é hɛn byɔ́ mɛ ǎ; é ɖésúnɔ sín hun wɛ é hɛn bó dó mɔ hwlɛngán mavɔ mavɔ yí nú mǐ.

¹³ Mɛ e ɖu su lɛ́ɛ ɔ́, gbǎgbá sín hun kpó nyibúsú sín hun kpó wɛ è nɔ dó slá wǔ nú agbaza yětɔn; nyibú asi wínnyáwínnyá wɛ è nɔ dó zo, bó nɔ́ fúnfún afín tɔn yě jǐ, bó nɔ́ dó slá wǔ nú agbaza yětɔn.

¹⁴ Ée nǔ nyí mɔ̌ ɔ́, nɛ̌ Klísu sín hun ma ná wa azɔ̌ hú mɔ̌ ǎ gbɔn? Ɖó Klísu ɔ́ sɔ́ éɖée dó sá vɔ̌ nú Mawu vɔ̌sánú maɖóblɔ̌ ɖɔhun gbɔn Yɛ mavɔ mavɔ jí; hun tɔn ná slá wǔ nú ayixa mǐtɔn, bó ná ɖe azɔ̌ e nyí azɔ̌ nyanya ɖ'é mɛ lɛ́ɛ sín mɛ, bónú mǐ ná sixú wa azɔ̌ nú Mawu gbɛɖe ɔ́.

¹⁵ Énɛ́ ɔ́ wú wɛ Klísu nyí ɖɛ̌mɛnu nú akɔjijɛ yɔ̌yɔ́ ɔ́ bónú mɛ e Mawu ylɔ́ lɛ́ɛ ná sixú mɔ nyɔ̌ná mavɔ mavɔ e sín akpá é dó nú yě lɛ́ɛ yí. Yě ná mɔ nǔ e sín akpá Mawu dǒ nú yě ɔ́ yí, ɖó Klísu kú, bɔ kú tɔn hwlɛ́n gbɛtɔ́ lɛ́ɛ gán sín hwɛ e yě hu hwenu e yě ɖo akɔjijɛ nukɔntɔn ɔ́ glɔ́ lɛ́ɛ mɛ.

¹⁶ Ényí wěma e ɖɔ mɛ e ná ɖu mɛɖé sín gǔ ɔ́ tíin ɔ́, é ɖo dandan mɛ bɔ è nǎ ɖe xlɛ́ ɖɔ mɛ e wlán wěma ɔ́ ko kú.

¹⁷ Đó ényí mɛ e wlán wěma énɛ́ ɔ́ kpo ɖo gbɛ jɛ́n wɛ ɔ́, hǔn wěma ɔ́ wa azɔ̌ ǎ; hwenu e mɛ ɔ́ kú ɔ́ jɛ́n wěma ɔ́ ná wa azɔ̌.

¹⁸ Énɛ́ wútu wɛ hun to kɔn nyi ayǐ hwɛ̌ cóbɔ akɔjijɛ nukɔntɔn ɔ́ ɖésú bɛ́ azɔ̌.

¹⁹ Nǔ nukɔntɔn e Mɔyízi bló ɔ́ wɛ nyí ɖɔ: é xa nǔ e sɛ́n ɔ́ zɔ́n ɖɔ è ní wa lɛ́ɛ bǐ ɖo togun ɔ́ bǐ nukɔn lě e è wlǎn gbɔn dó sɛ́nwéma ɔ́ mɛ é. Énɛ́ ɔ́ gúdo ɔ́, é sɔ́ nyibúví kpódó gbǎgbá kpó sín hun, kpó sin kpó; é sɔ́ izɔ́pukpo, kpó avɔ vɔvɔ cɛ́cɛ́ ɖé kpó, bó sɔ́ dó hun kpó sin kpó ɔ́ mɛ, lobo mì dó sɛ́nwéma ɔ́ wú, bó lɛ́ mì dó togun ɔ́ bǐ wú.

²⁰ É ɖɔ: “Akɔjijɛ e Mawu ɖɔ nú mi ɖɔ mi ní nɔ gbejí ná ɔ́, sin hun wɛ nyí élɔ́.”

²¹ Mɔ̌ ɖokpó ɔ́, Mɔyízi mì hun dó goxɔ ɔ́ wú, bó mì dó nǔ e è nɔ dó wa sinsɛnzɔ́ ná lɛ́ɛ bǐ wú.

²² Nǔgbó ɔ́, ɖo sɛ́n ɔ́ mɛ ɔ́, nǔ lɛ́ɛ bǐ wɛ è nɔ ɖibla slá wǔ ná kpódó hun kpó, bɔ cóbónú Mawu ná sɔ́ hwɛ kɛ mɛɖé ɔ́, hun jɛ́n nɔ́ kɔn nyi ayǐ.

Vɔ̌ e Klísu sɔ́ éɖée dó sá ɔ́ nɔ súnsún hwɛ e gbɛtɔ́ lɛ́ɛ hu é

²³ Nǔ énɛ́ lɛ́ɛ e nyí xlɛ́ nǔ e ɖo sɛ́xwé lɛ́ɛ tɔn ɔ́, lě e è ɖǒ ná nɔ slá wǔ nú yě gbɔn é nɛ́. Amɔ̌, nǔ e ɖo sɛ́xwé lɛ́ɛ ɖésú ɔ́, vɔ̌ e è nǎ sá dó slá wǔ nú yědɛɛ lɛ́ɛ ɔ́ ná nyɔ́ hú mɔ̌ titewungbe.

²⁴ Đó Tɛn mímɛ́ e mɛ Klísu byɔ́ ɔ́ nyí Tɛn mímɛ́ ɖé kpowun bɔ gbɛtɔ́ lɛ́ɛ bló, bɔ é nyí xlɛ́ Tɛn mímɛ́ titewungbe ɔ́ tɔn ǎ; lo ɔ́, sɛ́xwé ɖésú wɛ é yi. Fínɛ́ wɛ é ɖo Mawu nukɔn ɖe din, dó ta mǐtɔn mɛ.

²⁵ Jwifu lɛ́ɛ sín vɔ̌sánú-xwlémawutɔ́ ɖaxó ɔ́ nɔ hɛn kanlin e è dǒ sá vɔ̌ ná nú Mawu ɔ́ sín hun, bó nɔ byɔ́ Tɛn mímɛ́ bǐ ɔ́ mɛ xwewú xwewú; Klísu ɔ́ ka byɔ́ mɛ, bó ná sɔ́ éɖée dó sá vɔ̌ ná azɔn gěgé ǎ.

²⁶ Ényí mɔ̌ wɛ é nyí ɔ́, é ɖó ná ko ji ya azɔn mɔ̌kpán sín hwenu e Mawu ɖó gbɛ ɔ́ dó é; nǔgbó ɔ́, azɔn ɖokpó géé jɛ́n é wá, bɔ xó fó, hwenu e nǔ lɛ́ɛ bǐ sín fífó ko sɛ yá é, bó sɔ́ éɖée dó sá vɔ̌ ná, bó ná dó ɖe hwɛhuhu síin.

²⁷ Gbɛtɔ́ ɖěbǔ ɔ́, azɔn ɖokpó géé wɛ é ɖó ná kú, bɔ énɛ́ ɔ́ gúdo ɔ́, Mawu ná ɖɔ hwɛ xá ɛ.

²⁸ Mɔ̌ ɖokpó ɔ́, Klísu sɔ́ éɖée dó sá vɔ̌ ná azɔn ɖokpó géé énɛ́ ɔ́ dó hwɛ gbɛtɔ́ gěgé tɔn tamɛ. É ná wá azɔn wegɔ́ ɔ́, é ka sɔ́ ná nyí hwɛhuhu wɛ é ná wá ɖe síin ǎ; lo ɔ́, mɛ e ɖo te kpɔ́n ɛ ɖɔ é ní wá hwlɛ́n émí gán lɛ́ɛ wɛ é ná wá hwlɛ́n gán.