Eblée 7 - MAWUXÓWÉMA

Mɛlukisedɛ́ki nyí axɔ́sú, bó lɛ́ nyí vɔ̌sánú-xwlémawutɔ́

¹ Mɛlukisedɛ́ki énɛ́ ɔ́, Salɛ́mu xɔ́sú wɛ é nyí, bó lɛ́ nyí vɔ̌sánú-xwlémawutɔ́ Mawu Ajalɔ̌nlɔn ɔ́ tɔn. Hwenu e Ablaxámu fun ahwan lobo ɖu ɖo axɔ́sú lɛ́ɛ jí, bó lɛ́ kɔ wá xwé ɔ́, Mɛlukisedɛ́ki yi kpé e, bó dó acɛ jǐ tɔn.

² Ablaxámu ná nǔ e é hɛn sín ahwangbénu é bǐ sín mǎɖówǒ Mɛlukisedɛ́ki. Nyǐkɔ Mɛlukisedɛ́ki ɔ́, tínmɛ tɔn nukɔntɔn ɔ́ wɛ nyí “Axɔ́sú hwɛjijɔnɔ”. Gɔ́ nú énɛ́ ɔ́, é nyí axɔ́sú Salɛ́mu tɔn; tínmɛ tɔn wɛ nyí: “Axɔ́sú fífánɔ”.

³ Mɛlukisedɛ́ki ɔ́, è tunwun tɔ́ tɔn ǎ, è tunwun nɔ tɔn ǎ; è tunwun tɔ́gbó tɔn ɖěbǔ ǎ; è ka ɖɔ jiji tɔn abǐ kú tɔn xó ɖo fí ɖěbǔ ǎ; é cí Mawu ví ɔ́ ɖɔhun; é nyí vɔ̌sánú-xwlémawutɔ́ káká sɔ́yi.

⁴ Mi kpɔ́n lě e Mɛlukisedɛ́ki ɔ́ nyí nǔɖaxó sɔ é! Tɔ́gbó mǐtɔn Ablaxámu ɖésú ná ɛ mǎɖówǒ nǔ e é hɛn wá sín ahwangbénu ɔ́ tɔn.

⁵ Mɛ e jɔ ɖo Levíi kún mɛ, bó nyí vɔ̌sánú-xwlémawutɔ́ lɛ́ɛ ɔ́, ɖo sɛ́n ɔ́ mɛ ɔ́, yě ɖó ná nɔ yí mǎɖówǒ nǔ bǐ tɔn ɖo togun Izlayɛ́li tɔn sí. Nú è nǎ ɖɔ ɔ́, yě nɔ yí mǎɖówǒ ɖo nɔví yětɔn lɛ́ɛ sí, có Ablaxámu ví jɛ́n mɛ énɛ́ lɛ́ɛ lɔmɔ̌ nyí.

⁶ Mɛlukisedɛ́ki nyí Levíi ví ǎ, có é ka yí mǎɖówǒ ɖo Ablaxámu sí; é lɛ́ dó acɛ mɛ e Mawu dó akpá lɛ́ɛ ná ɔ́ jí.

⁷ Mɛ bǐ tunwun din ɖɔ mɛ e dó acɛ mɛ jí ɔ́ hú gǎn mɛ e jí è dǒ acɛ é; é sɔ́ ɖó xokpɔ́n ǎ.

⁸ Levíi ví e nɔ yí mǎɖówǒ lɛ́ɛ ɔ́, gbɛtɔ́ wɛ yě nyí, bó nɔ kú; lo ɔ́, Mɛlukisedɛ́ki e yí mǎɖówǒ ɔ́, mɛ e Mawuxówéma ɔ́ ɖe kúnnu ná ɖɔ é ɖo gbɛ ɔ́ wɛ.

⁹ Nú è nǎ ɖɔ kpowun ɔ́, ée Ablaxámu ná mǎɖówǒ Mɛlukisedɛ́ki ɔ́, Levíi lɔ ná mǎɖówǒ Mɛlukisedɛ́ki gbɔn Ablaxámu jí.

¹⁰ Nǔgbó ɔ́, è ko ji Levíi ǎ; amɔ̌, é ɖo tɔ́gbó tɔn Ablaxámu mɛ, hwenu e Mɛlukisedɛ́ki yi kpé Ablaxámu é.

¹¹ Vɔ̌sánú-xwlémawutɔ́ sín azɔ̌ e Levíi lɛ́ɛ nɔ wa é jí wɛ sɛ́n e è nǎ togun Izlayɛ́li tɔn ɔ́ jínjɔ́n. Lo ɔ́, vɔ̌sánú-xwlémawutɔ́ lɛ́ɛ ɔ́, ényí azɔ̌ e yě wa ɔ́ ko nyɔ́ bɔ nǔ bǐ vɔ ɖ'é wú wɛ ɔ́, é sɔ́ ná byɔ́ ɖɔ vɔ̌sánú-xwlémawutɔ́ alɔkpa ɖěvo ní wá ǎ; é sɔ́ ná byɔ́ ɖɔ vɔ̌sánú-xwlémawutɔ́ e cí Mɛlukisedɛ́ki ɖɔhun, bó ma cí Aalɔ́ɔn ɖɔhun ǎ ɔ́ ní wá ǎ.

¹² Đó ényí è ɖyɔ̌ vɔ̌sánú-xwlémawutɔ́zɔ́ sín kanfifɔ ɔ́, é ɖo dandan mɛ bɔ è nǎ ɖyɔ́ sɛ́n ɔ́ lɔmɔ̌.

¹³ Aklúnɔ mǐtɔn e wú è ɖɔ xó énɛ́ lɛ́ɛ dó ɔ́, kún ɖěvo mɛ wɛ é jɔ ɖe, bɔ mɛ ɖěbǔ ɖo kún énɛ́ mɛ, bó wa vɔ̌sánú-xwlémawutɔ́ sín azɔ̌ ɖo vɔ̌sákpe jí kpɔ́n gbeɖé ǎ.

¹⁴ È tunwun ganjí ɖɔ Judáa kún mɛ wɛ é jɔ ɖe, bɔ Mɔyízi ka ɖɔ xó ɖěbǔ dó kún énɛ́ wú hwenu e é ɖɔ vɔ̌sánú-xwlémawutɔ́ lɛ́ɛ sín xó é ǎ.

Vɔ̌sánú-xwlémawutɔ́ Mɛlukisedɛ́ki ɖɔhun ɖěvo wá

¹⁵ Nǔ e jɛ bó lɛ́ ɖe nǔ énɛ́ lɛ́ɛ xlɛ́ céɖécéɖé d'é jí ɔ́ ɖíe: vɔ̌sánú-xwlémawutɔ́ Mɛlukisedɛ́ki ɖɔhun ɖěvo wá.

¹⁶ Sɛ́n gbɛtɔ́ tɔn lɛ́ɛ ɖě wɛ è xwedó bó sɔ́ ɛ vɔ̌sánú-xwlémawutɔ́ ǎ; hlɔ̌nhlɔ́n gbɛ maɖókpodó tɔn gbla mɛ wɛ é húzú vɔ̌sánú-xwlémawutɔ́ gbɔn.

¹⁷ Nǔgbó ɔ́, Mawuxówéma ɔ́ ɖɔ: “A nǎ nyí vɔ̌sánú-xwlémawutɔ́ káká sɔ́yi Mɛlukisedɛ́ki ɖɔhun.”

¹⁸ Ée nǔ nyí mɔ̌ ɔ́, é gbídí sɛ́n xóxó ɔ́, ɖó sɛ́n énɛ́ ɖó gǎn ɖé ǎ, é ka nyí nǔɖé wa nú ǎ.

¹⁹ Nǔgbó ɔ́, Mɔyízisɛ́n ɔ́ bló bɔ nǔɖé nyɔ́ káká yi fó ǎ; nukúnɖíɖó ɖagbe ɖé ka wá bó nyɔ́ hú mɔ̌; nukúnɖíɖó énɛ́ wɛ bló bɔ mǐ nɔ sɛkpɔ́ Mawu.

²⁰ Ée lɛ́ hú gǎn mɔ̌ ɔ́ wɛ nyí ɖɔ Mawu xwlé nǔ d'é jí. É ka xwlé nǔɖé dó Levíi lɛ́ɛ jí hwenu e yě húzú vɔ̌sánú-xwlémawutɔ́ é ǎ.

²¹ Lo ɔ́, Mawu sɔ́ Jezu vɔ̌sánú-xwlémawutɔ́, bó xwlé nǔ d'é jí hwenu e é ɖɔ n'i ɖɔ: “Aklúnɔ xwlé nǔ bó ɖɔ: ‘A nǎ nyí vɔ̌sánú-xwlémawutɔ́ káká sɔ́yi.’ ” É ka ná húzú gbe ǎ.

²² Énɛ́ ɔ́ wú ɔ́, Jezu lɔ nyí akɔjijɛ e nyɔ́ hú akɔjijɛ nukɔntɔn ɔ́ sín gǎnjɛwú nú mǐ.

²³ Vogbingbɔn ɖěvo lɛ́ tíin: vɔ̌sánú-xwlémawutɔ́ e jɔ ɖo Levíi kún mɛ lɛ́ɛ ɔ́, yě sukpɔ́; amɔ̌ yě nɔ ɖo kúkú wɛ, bɔ azɔ̌ yětɔn sɔ́ nɔ sixú yi nukɔn ǎ.

²⁴ Lo ɔ́, Jezu ɔ́ ɖo gbɛ tɛgbɛ, bɔ vɔ̌sánú-xwlémawutɔ́ sín azɔ̌ tɔn ɔ́, é ná ɖo wiwa wɛ káká sɔ́yi.

²⁵ Énɛ́ wú wɛ é hɛn ɔ́, é ná hwlɛ́n mɛ e gbɔn jǐ tɔn bó sɛkpɔ́ Mawu lɛ́ɛ é bǐ gǎn, bɔ nǔ bǐ ná vɔ ɖ'é wú sín din káká sɔ́yi, ɖó é ɖo gbɛ tɛgbɛ, bó ná nɔ sa vo nú Mawu dó ta yětɔn mɛ.

²⁶ Hǔn, Jezu wɛ nyí vɔ̌sánú-xwlémawutɔ́ ɖaxó e jɛ xá mǐ é, ɖó é nyí mɛ mímɛ́; é wa nǔ nyanya ɖěbǔ ǎ; hwɛ ɖěbǔ ɖo kɔ n'i ǎ. È sɔ́ ɛ ɖó vo nú hwɛhutɔ́ lɛ́ɛ, bó sɔ́ ɛ dó jǐ aga ɖo sɛ́xwé.

²⁷ É cí vɔ̌sánú-xwlémawutɔ́ ɖaxó ɖě lɛ́ɛ ɖɔhun ǎ: yědɛɛ lɛ́ɛ ɔ́, ayǐhɔ́ngbe ayǐhɔ́ngbe ɔ́, yě nɔ to sá vɔ̌ dó hwɛ e yě ɖésúnɔ hu lɛ́ɛ tamɛ hwɛ̌, có bó nɔ́ wá sá vɔ̌ dó hwɛ e togun ɔ́ hu lɛ́ɛ tamɛ; Jezu ka bló gbɔn mɔ̌ ǎ. Azɔn ɖokpó géé wɛ é sá vɔ̌ hwenu e é sɔ́ éɖée jó é, bɔ xó fó.

²⁸ Mɔyízisɛ́n ɔ́, gbɛtɔ́ wɛ é nɔ sɔ́ vɔ̌sánú-xwlémawutɔ́ ɖaxó; gbɛtɔ́ ka ɖó gǎn ɖé ǎ; lo ɔ́, xó e Mawu ɖɔ bó xwlé nǔ d'é jí ɖo sɛ́n ɔ́ gúdo ɔ́, Mawu ví ɔ́ wɛ é sɔ́ vɔ̌sánú-xwlémawutɔ́ ɖaxó; é ɖó blɔ̌ ǎ káká sɔ́yi.