Eblée 3 - MAWUXÓWÉMA

Jezu hú gǎn Mɔyízi

¹ Énɛ́ ɔ́ wú ɔ́, nɔví klísusɛntɔ́ lɛ́ɛ mi, mi mɛ e Mawu ylɔ́ lɛ́ɛ lɔ ɔ́, nukún mitɔn ní nɔ Jezu wú; é wɛ nyí Mɛsɛ́dó Mawu tɔn, bó nyí vɔ̌sánú-xwlémawutɔ́ ɖaxó e hɛn nǔɖiɖi e jlá wɛ mǐ ɖe ɔ́ wá nú mǐ é.

² Nǔgbó ɔ́, é nɔ gbejí nú Mawu e sɔ́ ɛ nú azɔ̌ énɛ́ ɔ́, Mɔyízi e wú è ɖɔ xó élɔ́ dó ɔ́ ɖɔhun: “É nɔ gbejí ɖo Mawu sín xwédo ɔ́ bǐ mɛ.”

³ Mɛ lɛ́ɛ nɔ kpa susu nú mɛ e gbá xɔ ɔ́ hú xɔ ɔ́ ɖésú. Mɔ̌ ɖokpó ɔ́ wɛ susu e jɛ xá Jezu ɔ́ hú gǎn Mɔyízi tɔn.

⁴ Nǔgbó ɔ́, è mɔ xɔ ɖé ɖo te hǔn, mɛɖé jɛ́n gbá; Mawu wɛ ka nyí mɛ e bló nǔ bǐ é.

⁵ Mɔyízi éyɛ́ ɔ́, mɛsɛntɔ́ ɖɔhun ɔ́, é nɔ gbejí ɖo Mawu sín xwédo ɔ́ bǐ mɛ, bó ná nyí kúnnuɖetɔ́ nú nǔ e è ɖǒ ná ɖɔ é.

⁶ Amɔ̌ Klísu ɔ́, ɖi vǐ ɖɔhun ɔ́, é nɔ gbejí nú Mawu, bɔ Mawu sɔ́ ɛ ɖó xwédo tɔn nu. Mǐdɛɛ lɛ́ɛ ɔ́, ényí mǐ hɛn jiɖiɖe mǐtɔn kpódó akɔ́nkpinkpan mǐtɔn kpó ɖo nǔ e ɖó nukún wɛ mǐ ɖe ɔ́ mɛ ɔ́, xwédo tɔn wɛ mǐ nyí.

Gbɔjɛ́ e è sɔ́ ɖ'ayǐ nú togun Mawu tɔn é

⁷ Énɛ́ ɔ́ wú ɔ́, mi cɔ́ miɖée, lě e Yɛsinsɛn ɖɔ gbɔn é; Yɛsinsɛn ɖɔ: “Ényí mi se Mawu sín gbe égbé din hǔn,

⁸ mi ma tlí tó hwenu e mi fɔ́n gǔ dó jǐ tɔn é ɖɔhun ó; gbe e gbe mi tɛ́n ɛ kpɔ́n ɖo gbětótló mɛ é ɖɔhun ó.

⁹ Tɔ́gbó mitɔn lɛ́ɛ tɛ́n mì kpɔ́n ɖo fínɛ́, có yě ká mɔ nǔwiwa ce lɛ́ɛ káká nú xwe kanɖé (40).

¹⁰ Énɛ́ ɔ́ wú wɛ xomɛ sin mì dó mɛ énɛ́ lɛ́ɛ wú, bɔ un ɖɔ: ‘Ayi yětɔn nɔ ɖo ali bú wɛ hwebǐnu. Yě mɔ nukúnnú jɛ nǔ e ba nú yě wɛ un ɖe ɔ́ wú ǎ.’

¹¹ Đo xomɛsin ce mɛ ɔ́, un xwlé nǔ bó ɖɔ: ‘Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ.’ ”

¹² Nɔví lɛ́ɛ mi, mi cɔ́ miɖée, bónú mɛɖé má ɖo mi mɛ, bó ɖó ayi nyanya, ayi e ma nɔ ɖi nǔ ǎ é, bó lɛ́ kɔ sín Mawu gbɛɖe ɔ́ gúdo ó.

¹³ É nyɔ́ wa ɔ́, mi nɔ ná akɔ́nkpinkpan miɖée ayǐhɔ́ngbe ayǐhɔ́ngbe káká yi jɛ hwenu e “Égbé din” e xó è ɖɔ dó Mawuxówéma ɔ́ mɛ ɔ́ ná ɖo azɔ̌ wa dó mǐ jí wɛ yi jɛ é, bónú ɖokpó mitɔn ma jó éɖée dó nú hwɛhuhu flú i, bónú é wá húzú tótlítɔ́ ó.

¹⁴ Nǔgbó ɔ́, ényí mǐ hɛn jiɖiɖe e mǐ ɖó sín bǐbɛ́mɛ ɔ́ syɛ́nsyɛ́n káká yi fó hǔn, mǐ nyí hǎgbɛ́ Klísu tɔn.

¹⁵ Nǔ e ɖɔ wɛ Mawuxówéma ɔ́ ɖe ɔ́ ɖíe: “Ényí mi se Mawu sín gbe égbé din hǔn, mi ma tlí tó hwenu e mi fɔ́n gǔ dó jǐ tɔn ɔ́ ɖɔhun ó.”

¹⁶ Mɛ̌ e mɛ̌ e ka se Mawu sín gbe bó fɔ́n gǔ dó jǐ tɔn? Yě mɛ e Mɔyízi ɖe tɔ́n sín Ejípu lɛ́ɛ bǐ wɛ.

¹⁷ Mɛ̌ e mɛ̌ e Mawu ka sin xomɛ dó káká nú xwe kanɖé? Mɛ e hu hwɛ, bó j'ayǐ bó kú ɖo gbětótló mɛ lɛ́ɛ wɛ.

¹⁸ Hwenu e Mawu xwlé nǔ bó ɖɔ: “Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ” ɔ́, mɛ̌ e mɛ̌ e xó ɖɔ wɛ é ka ɖe? Mɛ e fɔ́n gǔ lɛ́ɛ xó ɖɔ wɛ é ɖe.

¹⁹ Nǔgbó ɔ́, mǐ mɔ ɖɔ yě kún kpé wú, bó byɔ́ gbɔjɛ́ énɛ́ ɔ́ mɛ ó, ɖó nǔ e yě ma ɖi ǎ é wútu.