Eblée 2 - MAWUXÓWÉMA

Hwlɛngán ɖaxó

¹ Énɛ́ ɔ́ wú wɛ mǐ ɖó ná hɛn nǔgbó e mǐ se lɛ́ɛ syɛ́nsyɛ́n hú ɖ'ayǐ tɔn, bónú è ma wá dɔn mǐ ɖó zɔ nú nǔgbó ɔ́ ó.

² Đó xó e wɛnsagun lɛ́ɛ ɖɔ ɔ́ lí dǒ sɔ mɔ̌ , bɔ mɛɖé ma ké ya ná ǎ, abǐ mɛɖé vɛ́ tóli ná ɔ́, è nɔ dɔn tó nú mɛ ɔ́, lě e é jɛ xá gbɔn é.

³ Ényí nǔ nyí mɔ̌ ɔ́, nú mǐdɛɛ lɛ́ɛ dó vɛ̌ nú hwlɛngán ɖaxó énɛ́ ɔ́, nɛ̌ mǐ ka ná sixú gló tódɔnnúmɛ ɔ́ gbɔn? Aklúnɔ ɖésú ɖɔ hwlɛngán énɛ́ ɔ́ sín xó dó nukɔn, bɔ mɛ e se lɛ́ɛ ɖe kúnnu ná ɖɔ nǔgbó wɛ.

⁴ Azɔn ɖokpó ɔ́, Mawu ɖe wuntun tɛnmɛ tɛnmɛ lɛ́ɛ xlɛ́, bó jlɛ́ nǔ tɛnmɛ tɛnmɛ kpódó nǔdábaɖa tɛnmɛ tɛnmɛ kpó gbɔn yě jí, bó dó ɖe xlɛ́ ɖɔ émí yí gbe nú kúnnuɖiɖe yětɔn. É lɛ́ má Yɛsinsɛn sín nǔníná lɛ́ɛ lě e é jló e gbɔn é.

Mɛ e nɔ xlɛ́ lě e è ɖǒ ná mɔ hwlɛngán gbɔn ɔ́ mɛ é

⁵ Nǔgbó ɔ́, ényí wɛnsagun lɛ́ɛ wɛ Mawu ná acɛ dó gbɛ́ e jǎwe, bɔ mǐ ɖo xó tɔn ɖɔ wɛ ɔ́ nu ǎ.

⁶ É nyɔ́ wa ɔ́, mɛɖé ko ɖɔ ɖo Mawuxówéma ɔ́ mɛ ɖo akpá ɖé xwé ɖɔ: “Étɛ́ gbɛtɔ́ ka nyí bɔ a nǎ flín i? Étɛ́ vǐ e gbɛtɔ́ ji ɔ́ ka nyí, bɔ a nǎ kpé nukún wǔ tɔn.

⁷ A sɔ́ ɛ hwe ɖo wɛnsagun lɛ́ɛ glɔ́ nú hwenu kpɛɖé, bó ka sɔ́ susu kpódó yɛ̌yi kpán sín axɔ́súgbákún xwe n'i.

⁸ A sɔ́ nǔ bǐ dó afɔ tɔn glɔ́.” Ée è ɖɔ Mawu sɔ́ nǔ bǐ dó acɛ tɔn mɛ ɔ́, é xlɛ́ ɖɔ nǔ ɖěbǔ kún ɖe bɔ é gɔn acɛ tɔn mɛ sɔ́ ɖó ó. É ka ɖo mɔ̌ có, mǐ kó ɖo mimɔ wɛ din ɖɔ é ɖó acɛ ɖo nǔ lɛ́ɛ bǐ nu ǎ.

⁹ Nǔ e mɔ wɛ mǐ ɖe ɔ́ ɖíe: Mawu sɔ́ Jezu hwe ɖo wɛnsagun lɛ́ɛ glɔ́ nú hwenu kpɛɖé, bónú é ní kú dó gbɛtɔ́ lɛ́ɛ bǐ tamɛ gbɔn fɛ́nú Mawu tɔn gbla mɛ, bɔ mǐ ka ɖo mimɔ ɛ wɛ din bɔ è sɔ́ susu kpódó yɛ̌yi kpán sín axɔ́súgbákún xwe n'i ɖó ya e é ji, bó kú ɔ́ wú.

¹⁰ Nǔgbó ɔ́, é jɛ xá hwenɛ́nu ɖɔ Mawu e bló nǔ bǐ, bó hɛn nǔ bǐ ɖó tɛn yětɔn yětɔn mɛ ɔ́, ní bló nú Jezu ní mɛ́ yí fó, gbɔn wǔvɛ́mimɔ gbla mɛ. Mawu blǒ mɔ̌, bó ná dɔn vǐ gěgé wá susu tɔn mɛ gbɔn Jezu jí. Đó Jezu wɛ nyí gǎn e nɔ xlɛ́ hwlɛngánli ɔ́ yě ɔ́.

¹¹ Jezu e nɔ slá wǔ nú mɛ ɔ́ kpódó mɛ e é slá wǔ ná lɛ́ɛ kpó ɔ́, tɔ́ ɖokpó ɔ́ wɛ ɖó yě bǐ. Énɛ́ ɔ́ wú wɛ winnyá ma hu Jezu nú é ná ylɔ́ yě ɖɔ nɔví émítɔn lɛ́ɛ ǎ.

¹² Nǔgbó ɔ́, é ɖɔ nú Mawu ɖɔ: “Un ná jlá nǔ e a wa lɛ́ɛ nɔví ce lɛ́ɛ; un ná mlá we ɖo agun ɔ́ tɛ́ntin.”

¹³ É lɛ́ ɖɔ: “Un ná ɖeji dó Mawu wú.” Bó lɛ́ vɔ ɖɔ: “Nyɛ kpó vǐ e Mawu ná mì lɛ́ɛ kpán ɖíe.”

¹⁴ Ée ényí ɖɔ vǐ énɛ́ lɛ́ɛ ɔ́, gbɛtɔ́ wɛ yě nyǐ, bó ɖó agbaza kpó hun kpó ɔ́, Jezu ɖésú húzú gbɛtɔ́, bó ɖó agbaza kpó hun kpó yě ɖɔhun. É húzú gbɛtɔ́, bɔ gbɔn kú tɔn gbla mɛ ɔ́, é hu acɛ nú awǒvi e ɖó acɛ e nɔ hu mɛ é;

¹⁵ énɛ́ ɔ́, é hwlɛ́n mɛ e cí kannumɔ ɖɔhun ɖo gbɛzán yětɔn bǐ mɛ, ɖó xɛsi e ɖi nú kú wɛ yě ɖe ɔ́ wútu lɛ́ɛ gán.

¹⁶ Đó é ɖo gaan ɖɔ é kún nyí wɛnsagun Mawu tɔn lɛ́ɛ wɛ é d'alɔ ó; lo ɔ́, Ablaxámu ví lɛ́ɛ wɛ é d'alɔ.

¹⁷ Énɛ́ ɔ́ wú wɛ é ɖó ná húzú, bó cí nɔví tɔn lɛ́ɛ ɖɔhun ɖo ali lɛ́ɛ bǐ nu, bó ná sixú nyí vɔ̌sánú-xwlémawutɔ́ ɖaxó, gbejínɔtɔ́, kpódó nǔbláwǔkúnúmɛtɔ́ kpó ɖo mawuzɔ́ e wa wɛ é ɖe ɔ́ mɛ, bónú Mawu ná sɔ́ hwɛ e togun ɔ́ hu lɛ́ɛ kɛ ɛ.

¹⁸ Bɔ din ɔ́, é hɛn ɔ́, é ná dó alɔ mɛ e è tɛ́nkpɔ́n lɛ́ɛ, ɖó è ko tɛ́n é ɖésúnɔ kpɔ́n, bɔ é ko ji ya.