Eblée 13 - MAWUXÓWÉMA

Nɛ̌ è ka ná wa nǔ gbɔn, bɔ é ná nyɔ́ Mawu nukún mɛ

¹ Wǎn e yí nú miɖée wɛ mi ɖe nɔví nɔví ɖɔhun ɔ́, mi ma jó dó ó.

² Mi flín ɖɔ mi ɖó ná nɔ yí yě mɛ e nɔ wá ba jǒnɔ mi lɛ́ɛ é ganjí, ɖó mɛɖé lɛ́ɛ tíin bó ɖo nǔ wa gbɔn mɔ̌ wɛ, bó yí wɛnsagun Mawu tɔn lɛ́ɛ dó xwé gbe cóbó dán ɛ.

³ Mi flín mɛ e ɖo ganxó lɛ́ɛ, mi ɖésúnɔ wɛ ɖo ganxó ɖɔhun. Mi flín mɛ e è ɖo ya dó ná wɛ lɛ́ɛ, ɖó mi ɖésú ɖó agbaza.

⁴ Asi dida abǐ asú dida ní nyí nǔsísí; asú kpó asi kpó ní nɔ gbejí nú yěɖée. Mawu ná ɖó hwɛ nú mɛ e nɔ ɖo nǔblíblí wa wɛ lɛ́ɛ kpódó mɛ e nɔ ɖo aga lɛ wɛ lɛ́ɛ kpó.

⁵ Mi ma jó miɖée dó nú wǎn yíyí nú akwɛ́ ɖu ɖo mi jí ó; nǔ e ɖo mi sí ɔ́ ní kpé mi, ɖó Mawu ɖɔ: “Un ná jó we dó gbeɖé ǎ; un ná ɖe alɔ sín kan towe mɛ gbeɖé ǎ.

⁶ Énɛ́ ɔ́ wú wɛ mǐ hɛn ɔ́, mǐ ná ɖɔ kpódó jiɖiɖe kpó ɖɔ Aklúnɔ wɛ nyí mɛ e nɔ d'alɔ mǐ é. Un ná ɖi xɛsi nú nǔɖé ǎ. Étɛ́ mɛɖé ka sixú wa nú mì.”

⁷ Mi flín agunnukɔntɔ́ mitɔn xóxó e ɖɔ Mawuxó nú mi lɛ́ɛ é. Mi lin tamɛ dó lě e yě zán gbɛ yětɔn gbɔn ɔ́ kpó lě e yě kú gbɔn ɔ́ kpó wú, bó ɖó nǔɖiɖi yě ɖɔhun.

⁸ Jezu Klísu ɔ́, nǔ e é nyí sɔ ɔ́ jɛ́n é lɛ́ nyí égbé, bó ná lɛ́ nyí káká sɔ́yi.

⁹ Mi ma jó miɖée dó bónú kplɔ́n baɖabaɖa tɛnmɛ tɛnmɛ lɛ́ɛ dɔn mi bú ó; é nyɔ́ nú fɛ́nú Mawu tɔn ní bló nú ayixa mǐtɔn ní lí dǒ. Ní ma nyí sɛ́n e è dǒ dó nǔɖuɖu tɛnmɛ tɛnmɛ lɛ́ɛ wú ɔ́ wɛ ná zɔ́n bɔ ayixa mǐtɔn ná lí dǒ ó; mɛ e nɔ nyi sɛ́n énɛ́ lɛ́ɛ nɔ mɔ le ɖé ɖ'é mɛ gbeɖé ǎ.

¹⁰ Vɔ̌sánú-xwlémawutɔ́ e nɔ wa azɔ̌ ɖo goxɔ e mɛ Jwifu lɛ́ɛ nɔ sɛn Mawu ɖe lɛ́ɛ mɛ ɔ́ ɖó acɛ e ɖu nǔ e è sɔ́ dó sá vɔ̌ nú Mawu ɖo vɔ̌sákpe mǐtɔn jí é ǎ.

¹¹ Vɔ̌sánú-xwlémawutɔ́ ɖaxó ɔ́ nɔ sɔ́ kanlin e è hu lɛ́ɛ sín hun yi Tɛn mímɛ́ bǐ ɔ́ mɛ, bó nɔ sá vɔ̌ nú Mawu dó hwɛ e togun ɔ́ hu lɛ́ɛ tamɛ. Lo ɔ́, kanlin énɛ́ lɛ́ɛ e è hu ɔ́, è nɔ bɛ yě yi goxɔ lɛ́ɛ gúdo, bó nɔ dó zo.

¹² Énɛ́ ɔ́ wútu wɛ Jezu lɔ kú ɖo toxo ɔ́ gúdo, bó ná sɔ́ hun é ɖésúnɔ tɔn dó slá wǔ nú togun ɔ́.

¹³ Hǔn, mi nú mǐ ná yi toxo ɔ́ gúdo, bó ná ɖu winnyá ɖokpó ɔ́ xá ɛ.

¹⁴ Đó mǐ ɖó toxo e nɔ nɔ ayǐ káká sɔ́yi ɔ́ ɖo ayǐkúngban jí fí ǎ; amɔ̌ mǐ ɖo toxo Mawu tɔn e jǎwe ɔ́ ba wɛ.

¹⁵ Mi nú mǐ ná kpa susu nú Mawu dó sá vɔ̌ n'i hwebǐnu gbɔn Jezu jí; é wɛ nyí ɖɔ mǐ ní nɔ sɔ́ nu mǐtɔn dó kpa susu nú nyǐkɔ tɔn ɖo togun mɛ agbawungba.

¹⁶ Mi ma wɔn bó gɔn ɖagbe wa ó; mi ma wɔn bó gɔn nǔ e ɖo mi sí lɛ́ɛ má xá miɖée ó, ɖó vɔ̌sísá mɔ̌hunkɔtɔn lɛ́ɛ wɛ nɔ́ nyɔ́ Mawu nukún mɛ.

¹⁷ Mi se tónú nú agunnukɔntɔ́ mitɔn lɛ́ɛ, bó hwíhwɛ́ miɖée ɖo glɔ́ yětɔn; yě nɔ ɖo nukún kpé dó mi wú wɛ hwebǐnu, ɖó yě ɖó ná ɖó azɔ̌ e yě wa ɔ́ sín gbe nú Mawu. Ényí mi se tónú nú yě ɔ́, yě ná wa azɔ̌ yětɔn kpódó xomɛhunhun kpó; ényí mi ma ka se tónú nú yě ǎ ɔ́, yě ná wa azɔ̌ yětɔn wǔɖéwúɖé; énɛ́ ɔ́, mi ka sɔ́ ná mɔ le ɖěbǔ ɖ'é mɛ ǎ.

¹⁸ Mi nɔ ɖo ɖɛ xo nú mǐ wɛ; mǐ ɖeji ɖɔ ayixa mǐtɔn mɛ́, ɖó mǐ ɖó jlǒ bó ná nɔ zán gbɛ ɖagbe ɖo nǔ bǐ mɛ.

¹⁹ Đo tají ɔ́, un ɖo byɔ̌byɔ́ mi wɛ ɖɔ mi ní xo ɖɛ nú mì, bónú Mawu ní bló bónú ma wá mi gɔn ɖó yǐyá jí.

É xo ɖɛ

²⁰ Mawu fífánɔ ɔ́ fɔ́n lɛ̌ngbɔ́nyitɔ́ ɖaxó Aklúnɔ mǐtɔn Jezu sín mɛkúkú lɛ́ɛ mɛ gbɔn hun akɔjijɛ mavɔ mavɔ ɔ́ tɔn gbla mɛ ɔ́,

²¹ ní bló bónú mi ná kpé nǔ ɖagbe bǐ wú bó wa, bó dó wa jlǒ tɔn; ní bló nǔ e nyɔ́ nukún tɔn mɛ lɛ́ɛ ɖo mǐ mɛ gbɔn Jezu Klísu jí. Susu nú Jezu Klísu káká sɔ́yi mavɔ mavɔ. Amǐ!

É sú ta nú wěma ɔ́

²² Nɔví lɛ́ɛ mi, un ɖo byɔ̌byɔ́ mi wɛ ɖɔ mi ní ɖó sɔxwixwe, bó ɖótó akɔ́nkpinkpan sín xó e un ɖɔ sɛ́ dó mi lɛ́ɛ é; ɖó wěma élɔ́ e un wlán sɛ́ dó mi ɔ́ ɖi ga dín ǎ.

²³ Un ka jló nú mi ní tunwun ɖɔ è ko jó nɔví mǐtɔn Timɔtée. Ényí é yá wǔ wá ɔ́, nú un ja mi gɔn ɔ́, un ná kplá ɛ wá.

²⁴ Mi dó gbe agunnukɔntɔ́ mitɔn lɛ́ɛ bǐ, bó dó gbe mɛɖeɖóvo Mawu tɔn lɛ́ɛ bǐ. Nɔví e ɖo Italíi lɛ́ɛ dó gbe sɛ́ dó mi.

²⁵ Fɛ́nú Mawu tɔn ní nɔ kpɔ́ xá mi bǐ.