Eblée 11 - MAWUXÓWÉMA

Nǔɖiɖi

¹ Nǔɖiɖi ɖíɖó wɛ nyí è nǐ ɖeji dó nǔ e ɖó nukún wɛ è ɖe ɔ́ wú; è nǐ gán jɛ nǔ e è ma mɔ ǎ é wú ɖɔ é tíin.

² Nǔ e gbɛtɔ́ xóxó hwenu tɔn lɛ́ɛ ɖi ɔ́ wɛ zɔ́n bɔ Mawu ɖe kúnnu ɖagbe nú yě.

³ Nǔɖiɖi wɛ zɔ́n bɔ mǐ mɔ nukúnnú jɛ wú ɖɔ Mawu ɔ́, xó tɔn wɛ é dó bló wɛ̌kɛ́ ɔ́ ná; nǔ e è ma sixú mɔ ǎ ɔ́ wɛ é dó bló nǔ e mɔ wɛ è ɖe ɔ́ ná.

⁴ Nǔɖiɖi e Abɛ́li ɖó ɔ́ wɛ zɔ́n bɔ é sá vɔ̌ e nyɔ́ hú Kanyɛ́ɛ tɔn é nú Mawu. Nǔɖiɖi ɔ́ wɛ zɔ́n bɔ Mawu sɔ́ ɛ dó mɔ hwɛjijɔnɔ ná, ɖó Mawu ɖe kúnnu ɖagbe ɖɔ nǔ e é xwlé émí lɛ́ɛ nyɔ́. Abɛ́li ko kú cóbɔ nǔ e é wa ɔ́ ka kpo ɖo xó ɖɔ wɛ gbɔn nǔɖiɖi e é ɖó ɔ́ gbla mɛ.

⁵ Nǔɖiɖi e Henɔci ɖó ɔ́ wɛ zɔ́n bɔ é ma kú ǎ. È sɔ́ ɛ yi jǐxwé, bɔ mɛɖé sɔ́ mɔ ɛ ǎ; ɖó Mawu wɛ sɔ́ ɛ yi. Mawuxówéma ɔ́ ɖɔ: cóbónú Mawu ná sɔ́ ɛ yi jǐxwé ɔ́, nǔ tɔn ko nyɔ́ nukún tɔn mɛ.

⁶ Nǔgbó ɔ́, nú mɛɖé ma ɖó nǔɖiɖi ǎ ɔ́, nǔ tɔn sixú nyɔ́ Mawu nukún mɛ ǎ; ɖó mɛ e sɛkpɔ́ Mawu ɔ́ ɖó ná ɖi nǔ ɖɔ Mawu tíin, bó nɔ ná ajɔ mɛ e ɖo biba ɛ wɛ lɛ́ɛ.

⁷ Nǔɖiɖi e Nɔwée ɖó ɔ́ wɛ zɔ́n bɔ nǔ e ɖo nǎ jɛ wɛ, bɔ Mawu ɖɔ n'i, bɔ mɛɖé ma ka ɖo mimɔ wɛ ǎ lɛ́ɛ ɔ́, é sɔ́ dó ylɔ́ nǔjɔnǔ. É se tónú nú Mawu, bó bló tɔjíhún ɖokpó, bɔ é kpódó xwédo tɔn kpó byɔ́ mɛ bó gán. Énɛ́ ɔ́, é ɖó hwɛ nú gbɛ ɔ́, bɔ Mawu sɔ́ ɛ dó mɔ hwɛjijɔnɔ gbɔn nǔɖiɖi e é ɖó ɔ́ gbla mɛ.

⁸ Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu ylɔ̌ ɛ ɔ́, é se tónú n'i, bó ɖidó to e ná ná ɛ wɛ Mawu ɖe, bɔ é ná nyí étɔn ɔ́ mɛ. É gosín to é ɖésúnɔ tɔn mɛ, bó ɖidó, ma tunwun fí e é xwe é.

⁹ Nǔɖiɖi e Ablaxámu ɖó ɔ́ wɛ zɔ́n bɔ é yi nɔ to e sín akpá Mawu dó n'i ɔ́ mɛ jǒnɔ ɖɔhun; goxɔ mɛ wɛ é nɔ; mɔ̌ ɖokpó ɔ́, Izáki kpó Jakɔ́bu kpó e Mawu dó akpá ɖokpó ɔ́ ná lɛ́ɛ nɔ goxɔ mɛ é ɖɔhun.

¹⁰ Đó Ablaxámu ɖo te kpɔ́n toxo ɖaxó e ɖó dodó syɛ́nsyɛ́n , bɔ Mawu ɖésú ɖe wě tɔn bó bló é.

¹¹ Nǔɖiɖi e Sala ɖésú ɖó ɔ́ wɛ zɔ́n bɔ è nǎ ɛ hlɔ̌nhlɔ́n bɔ é mɔ xo, có é ka ko kpo bǐ, ɖó é ɖó nǔɖiɖi ɖɔ Mawu e dó akpá ɔ́ ɖo gbejí.

¹² Nǔ énɛ́ wú wɛ nya ɖokpó géé gba kún, bɔ kún tɔn lɛ́ɛ sukpɔ́ káká, bó cí sunví e ɖo jǐxwé lɛ́ɛ ɖɔhun; yě sukpɔ́ káká bo cí kɔ́ e ɖo xutó ɔ́ ɖɔhun, bɔ è sixú xa yě ǎ; có nya énɛ́ ɔ́ ko ɖo kú li jí.

¹³ Yě mɛ énɛ́ lɛ́ɛ bǐ ɔ́, nǔɖiɖi mɛ wɛ yě bǐ kú dó. Yě mɔ nǔ e sín akpá Mawu dó lɛ́ɛ yí ǎ; yě ka mɔ ɖɔ nǔ énɛ́ lɛ́ɛ ná jɛ bɔ xomɛ hun yě tlala. Yě tunwun ɖɔ jǒnɔ wɛ émí nyí ɖo ayǐkúngban jí fí, bó ɖo wiwa yi wɛ.

¹⁴ Mɛ e nɔ ɖɔ xó gbɔn mɔ̌ lɛ́ɛ ɖo ɖiɖe xlɛ́ wɛ ɖɔ émí ɖo to émí ɖésúnɔ tɔn ɔ́ ba wɛ.

¹⁵ Ényí to e mɛ yě gosín ɔ́ ko vɛ́ nú yě wɛ ɔ́, yě ná ko lɛ́ mɔ ali tɔn bó lɛ́ kɔ yi.

¹⁶ To e nyɔ́ hú to e mɛ yě gosín ɔ́ ba wɛ yě ɖe; to ɔ́ wɛ nyí to yě ɖésúnɔ tɔn ɖo sɛ́xwé. Énɛ́ ɔ́ wú wɛ winnyá ma hu Mawu ɖɔ è nǐ ylɔ́ émí ɖɔ Mawu mɛ énɛ́ lɛ́ɛ tɔn ǎ; ɖó é bló toxo ɖaxó ɖokpó ɖó ɖ'ayǐ nú yě ɖo sɛ́xwé.

¹⁷ Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu dó e kpɔ́n ɔ́, é sɔ́ vǐ tɔn Izáki bó ná dó sá vɔ̌ nú Mawu. Ablaxámu wɛ nyí mɛ e Mawu dó akpá ɔ́ ná é; có é ka ɖo gbesisɔ mɛ bó ná sɔ́ vǐ ɖokpónɔ tɔn dó sá vɔ̌ nú Mawu.

¹⁸ Mawu ɖɔ nú Ablaxámu ɖɔ: “Kún e sín akpá un dó nú we ɔ́, Izáki jí wɛ a nǎ gba kún ɔ́ gbɔn.”

¹⁹ Ablaxámu tunwun ɖɔ Mawu ɖó acɛ bó ná fɔ́n Izáki sín kú. Bónú è nǎ ɖɔ ɔ́, Ablaxámu lɛ́ vɔ́ mɔ vǐ tɔn Izáki kú wɛ é ko kú, bɔ è fɔ́n ɛ wá gbɛ ɖɔhun.

²⁰ Nǔɖiɖi e Izáki ɖó ɔ́ wɛ zɔ́n bɔ é tún acɛ dó Jakɔ́bu kpó Esawu kpó jí, bó ɖɔ lě e nǔ ná nɔ gbɔn nú yě sɔ gúdo ɔ́ nú yě.

²¹ Nǔɖiɖi e Jakɔ́bu ɖó ɔ́ wɛ zɔ́n bɔ hwenu e é kpo kpɛɖé bɔ é ná kú ɔ́, é xo ɖɛ dó Jozɛ́fu ví lɛ́ɛ ɖokpó ɖokpó jí; kpogɛ tɔn jí wɛ é gán jɛ bó sɛn Mawu.

²² Nǔɖiɖi e Jozɛ́fu ɖó ɔ́ wɛ zɔ́n bɔ ée é kpo kpɛɖé bɔ é ná kú ɔ́, é ɖɔ xó dó hwenu e Izlayɛ́li ví lɛ́ɛ ná gosín Ejípu é wú, bó ɖɔ lě e è nǎ wa xú tɔn lɛ́ɛ sín nǔ gbɔn é.

²³ Nǔɖiɖi e mɛ e ji Mɔyízi lɛ́ɛ ɖó ɔ́ wɛ zɔ́n bɔ hwenu e è ji i ɔ́, yě sɔ́ ɛ hwlá xɔ sun atɔn. Yě mɔ ɖɔ vǐ ɔ́ nyɔ́ ɖɛkpɛ; énɛ́ ɔ́ wú ɔ́, yě ɖi xɛsi nú sɛ́n e axɔ́sú ɔ́ dó é gbigba ǎ.

²⁴ Nǔɖiɖi e Mɔyízi ɖó ɔ́ wɛ zɔ́n bɔ hwenu e é su ɔ́, é gbɛ́ ɖɔ è nǐ ma ylɔ́ émí ɖɔ Ejípu xɔ́sú ɔ́ sín vǐ nyɔ̌nu sín vǐ ó.

²⁵ É yí gbe ɖɔ è nǐ dó ya nú émí kpó togun Mawu tɔn kpó; énɛ́ ɔ́ nyɔ́ n'i hú é ní mɔ vǐví e ɖo hwɛhuhu mɛ ɔ́ nú hwenu kpɛɖé.

²⁶ É tunwun ɖɔ nú mɛ lɛ́ɛ gbɛ́ wǎn nú émí lě e yě gbɛ́ wǎn nú Klísu gbɔn ɔ́, é kpé akwɛ́ nú émí hú dɔkun Ejípu tɔn lɛ́ɛ; ɖó nukún tɔn ɖo ajɔ e jǎwe sɔ gúdo ɔ́ wú.

²⁷ Nǔɖiɖi e Mɔyízi ɖó ɔ́ wɛ zɔ́n bɔ é gosín Ejípu ma ɖi xɛsi nú xomɛsin axɔ́sú ɔ́ tɔn. É kpán akɔ́n, ɖi é ɖo éyɛ́ Mawu e è ma nɔ mɔ ǎ é mɔ wɛ ɖɔhun.

²⁸ Nǔɖiɖi e Mɔyízi ɖó ɔ́ wɛ zɔ́n bɔ é ɖó Dǐndínwáyi sín xwe ɔ́ ayǐ, bó ná gbe ɖɔ è nǐ mì hun dó hɔn lɛ́ɛ wú, bónú wɛnsagun e nɔ hu mɛ ɔ́ ma hu nukɔngbéví Izlayɛ́li ví lɛ́ɛ tɔn ó.

²⁹ Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ yě gbɔn Xu Vɔvɔ ɔ́ mɛ dín, ayǐkúngban xúxú jí gbɔn wɛ yě ɖe ɖɔhun. Lo ɔ́, ée Ejípunu lɛ́ɛ tɛ́nkpɔ́n bó ná bló nǔ ɖokpó ɔ́ é ɔ́, yě kú tɔ.

³⁰ Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ hwenu e yě ɖi zɔnlin, bó lɛ́ lɛ̌ dó ahohó Jeliko tɔn xɔ azǎn tɛ́nwe ɔ́, ahohó ɔ́ mu.

³¹ Nǔɖiɖi e Hlaxábu nyɔ̌nu agalɛtɔ́ ɔ́ ɖó ɔ́ wɛ zɔ́n bɔ hwenu e mɛ e ma se tónú nú Mawu ǎ lɛ́ɛ kú ɔ́, éyɛ́ kú ɖě ǎ, ɖó é yí dobanúnǔtɔ́ e Izlayɛ́li ví lɛ́ɛ sɛ́ dó ɔ́, kpódó xomɛnyínyɔ́ kpó.

³² Étɛ́ un ka ná lɛ́ ɖɔ? Đó un gbɛ́ ná ɖɔ xó dó Jedenyɔ́ɔ kpó Balaaki kpó, Sanmusɔ́ɔn kpó Jɛfutée kpó, Davídi kpó Samuwɛ́li kpó, kpódó gbeyíɖɔ Mawu tɔn lɛ́ɛ kpó wú ɔ́, ganmɛ ná hwedó mì.

³³ Nǔɖiɖi e yě ɖó ɔ́ zɔ́n bɔ yě fun ahwan, bó ɖu ɖo to gěgé jí; yě wa nǔ e sɔgbe ɔ́, bó mɔ nǔ e sín akpá Mawu dó ɔ́ yí. Nǔɖiɖi e yě ɖó ɔ́ zɔ́n bɔ yě sú kinnikínní lɛ́ɛ sín nu dó.

³⁴ Nǔɖiɖi e yě ɖó ɔ́ zɔ́n bɔ yě xo myɔ e ɖo jiji wɛ hɛhɛ ɔ́ cí; yě gló hwǐ; yě ɖó gǎn ɖé ɖ'ayǐ ǎ, yě ka wá mɔ gǎn. Ahwanfuntɔ́ syɛ́nsyɛ́n wɛ yě wá nyí, bó ɖu ɖo ahwangɔnu to ɖěvo mɛ tɔn lɛ́ɛ jí.

³⁵ Gbɔn nǔɖiɖi gbla mɛ ɔ́, nyɔ̌nu ɖé lɛ́ɛ tíin, bɔ è fɔ́n mɛ yětɔn e kú lɛ́ɛ nú yě. Mɛ ɖé lɛ́ɛ tíin, bɔ è dó ya nú yě, bɔ yě kú, ɖó yě gbɛ́ ɖɔ émí kún ná gosín nǔ e ɖɔ wɛ émí ɖe ɔ́ gúdo ó, bó ná sixú wá fɔ́n sín kú, bó ná mɔ gbɛ e ná nyɔ́ hú gbɛ élɔ́ é.

³⁶ Mɛ ɖé lɛ́ɛ tíin, bɔ è ɖɔ slǎmɛ yě wú, bó xo yě ɖó lanbá wú; è dǒ wlɔ mɛɖé lɛ́ɛ, bó sú yě dó gankpá mɛ.

³⁷ È nyi awǐnnyaglo dó mɛɖé lɛ́ɛ káká bɔ yě kú; è sɔ́ sá dó sɛ́n mɛɖé lɛ́ɛ ɖó we; è sɔ́ hwǐ dó hu mɛɖé lɛ́ɛ ná. Yě ɖó nǔɖé ǎ; gbɔ̌nyú wɛ yě nɔ dó, bó nɔ ɖo flúflú kpé wɛ, bɔ è nɔ ɖo ya dó nú yě wɛ, bó nɔ ɖo tagba dó nú yě wɛ.

³⁸ Gbɛ ɔ́ jɛ xá yě ǎ; yě nɔ ɖo gbětótló mɛ flú gbɔn wɛ, bó nɔ ɖo sókan mɛ sókan mɛ gbɔn wɛ, bó nɔ ɖo sóxo mɛ sóxo mɛ, do mɛ do mɛ gbɔn wɛ.

³⁹ È ɖe kúnnu ɖagbe nú yě ɖó nǔɖiɖi yětɔn wú; có yě ka mɔ nǔ e sín akpá Mawu dó nú yě ɔ́ yí ǎ.

⁴⁰ Nǔgbó ɔ́, ée Mawu ko sɔ́ nǔɖé ɖ'ayǐ nú mǐ bɔ é nyɔ́ hú mɔ̌ ɔ́, é jló ɖɔ mɛ énɛ́ lɛ́ɛ ní húzú mɛ mímɛ́ bɔ nǔ bǐ ná vɔ ɖ'é wú mǐdɛɛ lɛ́ɛ mɛ vo ǎ.