Ɖɛhan 99 - MAWUXÓWÉMA

¹ Mawu Mavɔmavɔ ɖo axɔ́sú ɖu wɛ: togun lɛ́ɛ nɔ́ sísɔ́. É jínjɔ́n ayǐ ɖo wɛnsagun susunɔ lɛ́ɛ jí: ayǐkúngban ɔ́ nɔ́ dán wǔ.

² Mawu Mavɔmavɔ ɔ́, nǔsúɖaxó wɛ é nyí ɖo Sinyɔ́ɔ, é hú gǎn togun lɛ́ɛ bǐ.

³ Mawu Mavɔmavɔ, togun lɛ́ɛ bǐ ní kpa nyǐkɔ towe; a d'agba bó dó xɛsi. Mɛ mímɛ́ wɛ a nyǐ.

⁴ È nǐ kpa hlɔ̌nhlɔ́n nú hwi axɔ́sú e yí wǎn nú hwɛjijɔ é. Hwi wɛ sɔ́ nǔ wa ɖó sɛ́nxwi jí jínjɔ́n ayǐ. Hwi wɛ nɔ wa nǔ ɖó sɛ́nxwi jí, bó nɔ́ xwedó hwɛjijɔ dó wa nǔ ɖo Izlayɛ́li.

⁵ Mi kpa susu nú Mawu Mavɔmavɔ, Mawu mǐtɔn. Mi ɖe kɔ́ ɖo axɔ́súzinkpo ɔ́ nukɔn. Mɛ mímɛ́ wɛ é nyí.

⁶ Mɔyízi kpó Aalɔ́ɔn kpó ɖo vɔ̌sánú-xwlémawutɔ́ tɔn lɛ́ɛ mɛ. Samuwɛ́li ɖo mɛ e nɔ xomlá nyǐkɔ tɔn lɛ́ɛ mɛ; mɛ énɛ́ lɛ́ɛ nɔ́ ylɔ́ Mawu Mavɔmavɔ bɔ é nɔ́ sɔ nú yě.

⁷ É nɔ́ ɖɔ xó nú yě sín akpɔ́kpɔ́ e nɔ ɖo mlǐmlí wɛ é mɛ. Yě nɔ́ bló nǔ e é zɔ́n yě lɛ́ɛ, bó nɔ́ nyi sɛ́n e é ná yě lɛ́ɛ.

⁸ Mawu Mavɔmavɔ, Mawu mǐtɔn, a nɔ se ɖɛ yětɔn. Mawu e nɔ́ sɔ́ hwɛ kɛ mɛ é wɛ a nyǐ nú yě, có hwɛ e yě hu lɛ́ɛ ɔ́, a nɔ dɔn tó tɔn nú yě.

⁹ Mi kpa susu nú Mawu Mavɔmavɔ, Mawu mǐtɔn, mi ɖe kɔ́ ɖo só mímɛ́ tɔn jí, ɖó Mawu Mavɔmavɔ, Mawu mǐtɔn ɔ́, mɛ mímɛ́ wɛ é nyí.