Ɖɛhan 97 - MAWUXÓWÉMA

¹ Mawu Mavɔmavɔ wɛ nyí axɔ́sú, gbɛ ɔ́ bǐ ní j'awǎ; xomɛ ní hun tɔtɛ́ntinto wɔ̌buwɔ́bú lɛ́ɛ.

² Akpɔ́kpɔ́ wiwi lɛ́ lɛ̌ dó e. Hwɛjijɔ kpó nǔ wa ɖó sɛ́nxwi jí kpó jí wɛ axɔ́súzinkpo tɔn jínjɔ́n.

³ Myɔ ɖo yiyi wɛ ɖo nukɔn tɔn, bó nɔ́ ɖo kɛntɔ́ tɔn lɛ́ɛ fyɔ́ lɛ́ lɛ̌ dó e wɛ.

⁴ É nɔ́ kɛ wun jǐ ɖɔhun, bó nɔ́ hɔ́n dó gbɛ ɔ́ bǐ jí, bɔ ayǐkúngban nɔ mɔ bó nɔ sísɔ́.

⁵ Só lɛ́ɛ nɔ́ sínsín aɖuwa ɖɔhun ɖo Mawu Mavɔmavɔ nukɔn, ɖo Aklúnɔ ayǐkúngban ɔ́ tɔn nukɔn.

⁶ Jǐxwé nɔ́ ɖe nǔjlɔ́jlɔ́wiwa tɔn xlɛ́, bɔ togun lɛ́ɛ bǐ nɔ́ mɔ lě e é xɔ susu sɔ é.

⁷ Yě mɛ e nɔ ɖo bǒcyɔ sɛn wɛ lɛ́ɛ bǐ wɛ ná ɖu winnyá; yě mɛ e nǔ ma nyí nǔɖé sinsɛn nyí nǔgɛ́n bɔ yě wa lɛ́ɛ bǐ wɛ ná ɖu winnyá, ɖó nǔmɛsɛn lɛ́ɛ bǐ wɛ nɔ yi do ɖo Mawu Mavɔmavɔ nukɔn.

⁸ Mawu Mavɔmavɔ, Sinyɔ́ɔ toxo ɔ́ se nǔ e a wa é, bɔ xomɛ hun i; Judáa gletoxo lɛ́ɛ ɖo awǎ jɛ wɛ, ɖó lě e a gbo hwɛ gbɔn é wú.

⁹ Đó hwɛ Mawu Mavɔmavɔ ɔ́, hwi wɛ nyí Mawu Ajalɔ̌nlɔn ɖo ayǐkúngban ɔ́ jí; a hǔ gǎn nǔmɛsɛn lɛ́ɛ bɔ é vɛ́ jlɛ́.

¹⁰ Mi mɛ e yí wǎn nú Mawu Mavɔmavɔ lɛ́ɛ e mi, mi gbɛ́ wǎn nú nǔ nyanya. Mawu Mavɔmavɔ nɔ nya xɛ ɖo mɛ e ɖo gbejí n'i lɛ́ɛ jí; é nɔ́ hwlɛ́n yě gán sín mɛdídá fɛn mɛ.

¹¹ Wěziza ɖo te nú mɛ e nɔ wa nǔ jlɔ́jlɔ́ lɛ́ɛ, mɛ e sín ayi ɖo wɛn lɛ́ɛ tɔn wɛ nyí awǎjijɛ.

¹² Mi mɛ e nɔ wa nǔ jlɔ́jlɔ́ lɛ́ɛ e mi, mi j'awǎ ɖo Mawu Mavɔmavɔ mɛ. Mi sɔ́ han dó kpa lě e Mawu Mavɔmavɔ mɛ́ gbɔn é.