Ɖɛhan 96 - MAWUXÓWÉMA

¹ Mi ji han yɔ̌yɔ́ nú Mawu Mavɔmavɔ. Mi mɛ e ɖo ayǐkúngban jí lɛ́ɛ e mi, mi ji han dó kpa Mawu Mavɔmavɔ.

² Mi ji han dó kpa Mawu Mavɔmavɔ, mi xo mlá nyǐkɔ tɔn. Mi jlá hwlɛngán e é nɔ́ ná mɛ ɔ́ ayǐhɔ́ngbe ayǐhɔ́ngbe.

³ Mi jlá susu e é ɖó ɔ́ gbɔn akɔta lɛ́ɛ bǐ mɛ, mi jlá nǔjíwǔ e é nɔ́ wa lɛ́ɛ gbɔn togun lɛ́ɛ bǐ mɛ.

⁴ Đó Mawu Mavɔmavɔ d'agba, é jɛ xá tawun ɖɔ è nǐ kpa susu n'i. É syɛ́n hú nǔmɛsɛn lɛ́ɛ bǐ.

⁵ Đó nǔ e akɔta lɛ́ɛ nɔ́ sɛn lɛ́ɛ ɖě nyí nǔɖé ǎ, nǔvlɛ́nǔ wɛ. Mawu Mavɔmavɔ wɛ ka bló jǐxwé.

⁶ Nǔsacɔ́ kpó nǔjíwǔ kpó wɛ lɛ́ lɛ̌ dó e. Hlɔ̌nhlɔ́n kpó awǎjijɛ kpó wɛ ɖo xwé tɔn gbe.

⁷ Xwédo e ɖo akɔta lɛ́ɛ mɛ é bǐ kpa susu nú Mawu Mavɔmavɔ. Mi jlá susu tɔn kpó hlɔ̌nhlɔ́n tɔn kpó.

⁸ Mi sɔ́ Mawu Mavɔmavɔ nyíkɔ su. Mi hɛn nǔ e mi ná ná ɛ lɛ́ɛ bó byɔ́ xwé tɔn gbe.

⁹ Mi ɖe kɔ́ nú Mawu Mavɔmavɔ kpó acɔ́nú mímɛ́ lɛ́ɛ kpó. Mi mɛ e ɖo ayǐkúngban jí lɛ́ɛ bǐ ní sísɔ́ ɖo Mawu Mavɔmavɔ nukɔn.

¹⁰ Mi ɖɔ gbɔn akɔta lɛ́ɛ bǐ nukɔn ɖɔ: “Mawu Mavɔmavɔ wɛ nyí axɔ́sú. Énɛ́ ɔ́ wú ɔ́, gbɛ ɔ́ dó ɖɔ do; é nɔ́ xo to ǎ. Mawu Mavɔmavɔ nɔ ɖɔ hwɛ xá gbɛtɔ́ lɛ́ɛ ɖó sɛ́nxwi jí.”

¹¹ Nǔ e ɖo jǐxwé é bǐ ní j'awǎ, nú xomɛ ní hun mi mɛ e ɖo ayǐkúngban ɔ́ jí lɛ́ɛ bǐ, xu kpó nǔ e ɖ'é mɛ lɛ́ɛ bǐ kpó ní xo zǐn.

¹² Fí e nyí gběgbó é kpó nǔ e ɖ'é mɛ lɛ́ɛ kpó ní sú xó bó j'awǎ. Atín e ɖo zungbó mɛ lɛ́ɛ ní kpa awǒbóbó

¹³ ɖo Mawu Mavɔmavɔ nukɔn, ɖó é jǎwe; é ja, bó ná ɖɔ hwɛ xá gbɛ ɔ́. É ná ɖɔ hwɛ xá gbɛ ɔ́ kpó hwɛjijɔ kpó. É ná xwedó nǔgbó dó ɖɔ hwɛ xá togun lɛ́ɛ.