Ɖɛhan 95 - MAWUXÓWÉMA

¹ Mi wá mǐ ji han nú Mawu Mavɔmavɔ kpó awǎjijɛ kpó, mi wá mǐ sú xó sɛ́ dó só e hwlɛ́n mǐ gán é kpó xomɛhunhun kpó.

² Mi wá mǐ ní ɖo kpikpa ɛ wɛ káká yi gɔ̌n tɔn. Mi wá mǐ ní kpa awǒbóbó dó sɔ́ ɛ su,

³ ɖó Mawu Mavɔmavɔ wɛ nyí Mawu, axɔ́sú ɖaxó wɛ é nyí bó hú gǎn nǔmɛsɛn lɛ́ɛ bǐ.

⁴ É wɛ kpa acɛ nú ayǐkúngban ɔ́ bǐ, bɛ́ sín ayǐkúngban ɔ́ sín dodó jí, káká yi só e yi jǐ hú só lɛ́ɛ bí é sín nuvínu.

⁵ Xu ɔ́, étɔn wɛ; é wɛ bló. Ayǐkúngban ɔ́, étɔn wɛ; é wɛ sɔ́ alɔ tɔn dó bló.

⁶ Mi wá mǐ ɖe kɔ́ nú Mawu Mavɔmavɔ, mi wá mǐ yi do n'i, mi wá mǐ jɛ kpo nú Mawu Mavɔmavɔ e bló mǐ é.

⁷ Đó é wɛ nyí Mawu mǐtɔn, bɔ mǐdɛɛ lɛ́ɛ nyí togun tɔn; é wɛ nyí lɛ̌ngbɔ́nyitɔ́ mǐtɔn, bɔ mǐdɛɛ lɛ́ɛ nyí lɛ̌ngbɔ́ hwan e wú é nɔ́ kpé nukún dó é. Mi ɖótó xó e ɖɔ nú mi wɛ é ɖe égbé din é; é ɖɔ:

⁸ “Mi ma tlí tó lě e togun mitɔn bló gbɔn ɖo Mɛliba é ó, abǐ lě e yě bló gbɔn ɖo Masa ɖo gbětótló mɛ é ó.

⁹ Tɔ́gbó mitɔn lɛ́ɛ tɛ́n mì kpɔ́n gbɔn fí énɛ́ lɛ́ɛ, yě ko mɔ nǔ e un nɔ jlɛ́ lɛ́ɛ có bó nɔ́ lɛ́ tɛ́n mì kpɔ́n.

¹⁰ Yě mɛ énɛ́ lɛ́ɛ dó akpɔ nú mì xɔ xwe kanɖé (40), bɔ un ɖɔ togun élɔ́ sɔ́ ɖó ta ɖé ǎ. Yě mlɛ́ ali e un ɖe nú yě ɔ́ kpɛɖé ǎ.

¹¹ Énɛ́ ɔ́, un sin xomɛ bó xwlé nǔ ɖɔ: Yě ná byɔ́ to e mɛ un ná ná gbɔjɛ́ yě ɖe ɔ́ mɛ ǎ.”