Ɖɛhan 94 - MAWUXÓWÉMA

¹ Mawu Mavɔmavɔ, Mawu hlɔnbanúmɛtɔ́, hwi Mawu hlɔnbanúmɛtɔ́ ɔ́, ɖe hwiɖée xlɛ́ ɖo susu towe mɛ.

² Hwi mɛ e nɔ ɖɔ hwɛ xá gbɛtɔ́ lɛ́ɛ bǐ é, sí te! Kpɔ́n nǔ e goyítɔ́ lɛ́ɛ dó sin é, bó ɖó hwɛ tɔn nú yě.

³ Mawu Mavɔmavɔ, káká jɛ hwetɛ́nu wɛ xomɛ ná nɔ́ ɖo mɛdídá hun wɛ yi jɛ? Káká jɛ hwetɛ́nu wɛ mɛdídá ná nɔ́ ɖo awǎ ɖó wɛ yi jɛ?

⁴ Yě nɔ́ ɖo xó gblégblé ɖé lɛ́ɛ wlí ɖɔ wɛ, yě nɔ́ ɖo jimakplɔ́ngbe dó wɛ; yě mɛ énɛ́ lɛ́ɛ e nɔ́ ɖo nǔ nyanya dó sin wɛ lɛ́ɛ bǐ nɔ́ ɖo yěɖée sɔ́ su wɛ.

⁵ Mawu Mavɔmavɔ, yě ɖo togun towe gbídí ɖó afɔ wú wɛ; yě ɖo tagba dó nú mɛ e nyí towe lɛ́ɛ wɛ.

⁶ Yě nɔ́ hu asúkúsi lɛ́ɛ kpó jǒnɔ e ɖo to yětɔn mɛ lɛ́ɛ kpó; yě nɔ́ hu tɔ́cyɔvǐ lɛ́ɛ,

⁷ bó nɔ́ ɖɔ: “Mawu Mavɔmavɔ ɖo nǔ énɛ́ lɛ́ɛ ɖě mɔ wɛ ǎ, Mawu Jakɔ́bu tɔn mɔ nǔ énɛ́ lɛ́ɛ ɖě ǎ.”

⁸ Gɔgɔnɔ e mi, mi cɔ́ miɖée. Xlonɔ e mi, hwetɛ́nu wɛ mi ka ná nyɔ́ nǔ i?

⁹ Mɛ e bló tó ɖó ta wú nú gbɛtɔ́ é ná se xó ǎ o? Mɛ e bló nukún ɖó ta wú nú gbɛtɔ́ é ná mɔ nǔ ǎ o?

¹⁰ Mɛ e nɔ dɔn tó nú gbɛtɔ́ é ná gbɛ́ nǔ nú mi ǎ wɛ mi vɛdó a? Éyɛ́ mɛ e ná nǔnywɛ́ gbɛtɔ́ ɔ́,

¹¹ tunwun linlin e gbɛtɔ́ nɔ́ ɖó é; é tunwun ɖɔ gbɛtɔ́ sín linlin bǐ wɛ nyí lɛ̌lo.

¹² Mawu Mavɔmavɔ, nǔ nyɔ́ nú mɛ e a nɔ dɔn tó ná é, nǔ nyɔ́ nú mɛ a nɔ sɔ́ sɛ́n towe dó kplɔ́n é;

¹³ a nǎ xo hwihwɛ́ ɛ adǎngbomɛ hwenu. Lo ɔ́, do gɔngɔn wɛ è nɔ kun dó glɔ̌ nú mɛdídá lɛ́ɛ.

¹⁴ Đó Mawu Mavɔmavɔ nɔ jó togun tɔn dó ǎ, é nɔ́ jó mɛ e nyí étɔn lɛ́ɛ dó ǎ.

¹⁵ È nǎ lɛ́ xwedó sɛ́n dó ɖɔ hwɛ, bɔ mɛ e ɖó ayixa ɖagbe é bǐ ná yí gbe ná.

¹⁶ Mɛ̌ ka ná sí te dó mɛdídá nɛ́ lɛ́ɛ jí nú mì din? Mɛ̌ ka ná húzú kpan nukɔn dǎkaxotɔ́ nɛ́ lɛ́ɛ nú mì din?

¹⁷ Ényí Mawu Mavɔmavɔ ma ko nyí mɔ̌ nú mì ǎ ɔ́, lǐndɔ̌n ce ná ko yi maɖɔnǔxwɛ xóxó;

¹⁸ Mawu Mavɔmavɔ, ényí un ɖɔ afɔ ce xo dɔjɔ ɔ́, xomɛnyínyɔ́ towe wɛ nɔ́ hɛn mì ɖó te.

¹⁹ Ényí nǔ gěgé ɖo hǔn mɛ nú mì ɔ́, gbɔ e a nɔ dó nú mì é wɛ nɔ́ dó xomɛhunhun nú mì.

²⁰ Hwɛɖɔtɔ́ alǎnnúwatɔ́ e tunwun sɛ́n ɔ́, có bó ká ɖo dǎka xo wɛ lɛ́ɛ kpó hwi kpó sixú kpé dó nǔɖé ǎ.

²¹ Yě nɔ́ kplé dó mɛ e nɔ wa nǔ jlɔ́jlɔ́ lɛ́ɛ bó ná hu; yě nɔ́ ɖó hwɛ nú xomɛvɔ́nɔ.

²² Amɔ̌, Mawu Mavɔmavɔ wɛ nyí ahohó ce; Mawu ce wɛ nyí só e glɔ́ un nɔ hɔn hwlá cí é.

²³ É ná sú hwɛ e yě hu lɛ́ɛ bǐ sín axɔ́ yě; é ná sɔ́ dǎka e yě nɔ́ xo ɔ́ dó sú kún yětɔn dó; Mawu Mavɔmavɔ, Mawu mǐtɔn ná sú kún yětɔn dó.