Ɖɛhan 91 - MAWUXÓWÉMA

¹ Mɛ e hɔn yi su Mawu Ajalɔ̌nlɔn ɔ́ nɔ́ mɔ fí ɖagbe bó nɔ́ gbɔjɛ́ ɖe; é nɔ́ gbɔjɛ́ ɖo Mawu Nǔbǐwúkpétɔ́ ɔ́ sín yɛtɛn.

² Un ɖɔ nú Mawu Mavɔmavɔ ɖɔ: “Hwi wɛ nyí bibɛtɛn ce, hwi wɛ nyí ahohó ce, hwi wɛ nyí Mawu ce e wú un nɔ gán jɛ é.”

³ Mawu Mavɔmavɔ wɛ nɔ ɖe we sín mɔ e è ɖǒ nú we lɛ́ɛ mɛ; é nɔ́ ɖe we sín jɛmɛjí kpó nǔ e é nɔ́ dó sin lɛ́ɛ kpó mɛ.

⁴ É ná cyɔ́n awa jǐ towe kokló vǐnɔ ɖɔhun, bɔ a nǎ mɔ tɛnmɛ ɖo awa tɔn lɛ́ɛ glɔ́. Gbejíninɔ tɔn ɔ́, ganwu wɛ, gǎglónú wɛ.

⁵ A nǎ ɖi xɛsi nú adǎn e nɔ́ gbo mɛ zǎn mɛ é ǎ, a ka ná ɖi xɛsi nú gǎ e è nɔ da dó mɛ kéze lɛ́ɛ ɖě ǎ.

⁶ A nǎ ɖi xɛsi nú jɛmɛjí e nɔ́ ɖo ablu mɛ é ǎ, a ka ná ɖi xɛsi nú azɔnhwi e nɔ zɔn mɛ jí hwemɛ cíɖíɖí é ǎ.

⁷ Gbɛtɔ́ afatɔ́n (1.000) ná bó j'ayǐ bó kú ɖo akpá towe, bónú děgba we afɔwó (10.000) j'ayǐ ɖo aɖisí towe xwé ɔ́, hwɛ ɔ́, nǔɖé ná wa we ǎ.

⁸ Sɔ́ nukún ɖó te kpowun bó ná kpɔ́n lě e Mawu ná dɔn tó nú mɛdídá gbɔn é.

⁹ Nyɛ ɔ́, Mawu Mavɔmavɔ, hwi wɛ nyí bibɛtɛn ce. Nú a sɔ́ Mawu Ajalɔ̌nlɔn ɔ́ dó ɖó bibɛtɛn ɔ́,

¹⁰ awě ɖěbǔ ná xo we ǎ, nǔ nyanya ɖěbǔ ná sɛkpɔ́ goxɔ towe ǎ,

¹¹ ɖó é ná ɖe gbe nú wɛnsagun tɔn lɛ́ɛ, bɔ yě ná kpé nukún wǔ we gbɔn fí bǐ.

¹² Yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó.

¹³ A nǎ ɖi zɔnlin gbɔn kinnikínní jí, bó ɖi gbɔn jakpata jí, a nǎ tɛ afɔ adǎnkanlin jí, bó tɛ afɔ dan jí.

¹⁴ Mawu ɖɔ: “Un ná hwlɛ́n ɛ gán ɖó é tlɛ́ dó wǔ ce; un ná nya xɛ ɖo jǐ tɔn, ɖó é tunwun mì.

¹⁵ É ná ylɔ́ mì bɔ un ná sɔ n'i. Adǎngbomɛ hwenu ɔ́, un ná nɔ kpɔ́ xá ɛ. Un ná hwlɛ́n ɛ gán, bó ná sɔ́ ɛ su.

¹⁶ Un ná dó azǎn azǎn jí n'i bɔ é ná dɔ́ ji. Un ná ɖe xlɛ́ ɛ ɖɔ nyi wɛ nɔ hwlɛ́n ɛ gán.”