Ɖɛhan 90 - MAWUXÓWÉMA

WĚMA ƐNƐGƆ́ Ɔ́ ( Ɖɛhan 90—106 ) Gbɛtɔ́ jɔ ɔ́, gbɛtɔ́ nɔ́ kú, Mawu ká ɖe tɛgbɛ

¹ Mɔyízi ɖɛ̌mɛnu Mawu tɔn ɔ́ sín ɖɛ. Aklúnɔ, hwi wɛ nyí bibɛtɛn mǐtɔn tɛgbɛ tɔn.

² Cóbónú só lɛ́ɛ ná jɔ ɔ́, cóbónú a nǎ ɖó ayǐkúngban ɔ́, bó ná ɖó gbɛ ɔ́, a ko nyí Mawu, bó ná nyí Mawu káká sɔ́yi.

³ A nɔ lɛ́ sɔ́ gbɛtɔ́ dó húzú kɔ́, a nɔ ɖɔ nú yě ɖɔ: “Mi lɛ́ kɔ yi fí e mi gosín é.”

⁴ Mawu, xwe afatɔ́n (1.000) ɔ́, nǔ kléwún ɖé wɛ nyí ɖo nukɔn towe, bó nɔ́ wá yi sɔ yí e ko hɔ́n wá yi é ɖɔhun; é nɔ́ dín bléwún ayǐtéhɔ̌nnu ɖɔhun.

⁵ A nɔ kplá gbɛtɔ́ sín gbɛ ɔ́ mɛ, lě e è nɔ wlí yɛ bléwún bó nɔ́ fɔ́n é ɖɔhun. É cí folówa ɖɔhun,

⁶ zǎnzǎn su ɔ́, é nɔ́ tɔ́n, bó nɔ́ vlɔ́n; gbadanu su ɔ́, é nɔ mlú, bó nɔ́ j'ayǐ.

⁷ Xomɛsin towe wɛ nɔ ɖe mǐ sín gbɛ ɔ́ mɛ, adǎnwiwa towe nɔ́ ɖó adohu nú mǐ.

⁸ A nɔ ɖe hwɛ e mǐ hu lɛ́ɛ bǐ gba; nǔ e mǐ wa ɖo nǔglɔ́ lɛ́ɛ bǐ wɛ ɖo wěziza nu ɖo nukɔn towe.

⁹ A sin xomɛ ɔ́, gbɛzán mǐtɔn nɔ́ ɖe kpo; gbɛ mǐtɔn nɔ́ vɔ nukikɛ ɖokpó mɛ.

¹⁰ Jidɔ́ mǐtɔn nɔ te ɖó xwe kanɖé gban (70); mɛ e wú gbɛ ɖe ganjí lɛ́ɛ tɔn nyí xwe kanwe (80). Yě ká sɔ́ nɔ́ mɔ nǔɖé ɖ'é mɛ zɛ tagba kpó ya kpó wú ǎ, ɖó gbɛzán mǐtɔn nɔ́ wá yi bléwún, bɔ mǐ nɔ́ zɔn xɛ ɖidó kú.

¹¹ Mɛ̌ ka tunwun lě e xomɛsin towe syɛ́n gbɔn é? Mɛ̌ ká nɔ́ ɖó sísí nú we yi ɖó bǎ e mɛ a nɔ wa adǎn yi ɖó é?

¹² Xlɛ́ mǐ ɖɔ azǎn nabí e mǐ ná nɔ gbɛ ná ɔ́, nǔ xixa wɛ. Énɛ́ ɔ́, ayi mǐtɔn ná mɔ nǔ.

¹³ Mawu Mavɔmavɔ, káká jɛ hwetɛ́nu a ka ná sin xomɛ dó mǐ yi ɖó? Kɛnklɛ́n bó jó xomɛsin dó. Kú nǔbláwǔ nú mɛsɛntɔ́ towe lɛ́ɛ.

¹⁴ Nɔ nyɔ́ xomɛ dó mǐ wú sín zǎnzǎn káká yi gbada; énɛ́ ɔ́, mǐ ná ɖo awǎjijɛ mɛ tɛgbɛ, mǐ ná ɖo xomɛhunhun jí káká sɔ́yi.

¹⁵ Nǎ awǎjijɛ mǐ xɔ azǎn nabí e a dó ya nú mǐ xɔ é. Nǎ gbɛ mǐ nú mǐ nǎ ɖu xɔ xwe nabí e mǐ ji ya xɔ é.

¹⁶ Mǐ mɛsɛntɔ́ towe lɛ́ɛ ní mɔ nǔ jɛ nǔwiwa towe lɛ́ɛ wú; vǐ mǐtɔn lɛ́ɛ lɔmɔ̌ ní mɔ susu towe.

¹⁷ Wǎn yíyí Aklúnɔ Mawu mǐtɔn tɔn ní nɔ mǐ jí. Blǒ bónú nǔ e mǐ sɔ́ alɔ mǐtɔn dó bló lɛ́ɛ ní lí dǒ, nǔ e alɔ mǐtɔn wa lɛ́ɛ ní lí dǒ.