Ɖɛhan 9 - MAWUXÓWÉMA

Mawu Mavɔmavɔ, Mɛhwlɛ́ngántɔ́ wamamɔnɔ lɛ́ɛ kpó mɛ e táfú wɛ è ɖe lɛ́ɛ kpó tɔn

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji dó han e è nɔ ylɔ́ ɖɔ “Vǐ kú” ɔ́ sín hangbe mɛ.

² Mawu Mavɔmavɔ, un ná nɔ kpa we kpó ayixa ce bǐ kpó. Un ná nɔ́ jlá nǔjíwǔ towe lɛ́ɛ bǐ.

³ Xomɛ ná nɔ́ hun mì; un ná nɔ́ j'awǎ ɖó hwi wú. Ajalɔ̌nlɔn e! Un ná nɔ́ ɖɔ xó lómílómí dó mlá nyǐkɔ towe dó han mɛ.

⁴ Kɛntɔ́ ce lɛ́ɛ hɔn. Ée yě hɔn ɔ́, yě klɛ́n afɔ bó j'ayǐ, bó kú ɖo nukɔn towe.

⁵ Đó a ɖe xlɛ́ ɖɔ hwɛ ce jɔ, a jɛ ahwan jǐ ce. Mawu hwɛjlɔ́jlɔ́ɖɔtɔ́, a jǐnjɔ́n axɔ́súzinkpo towe jí.

⁶ A gblɔ̌n adǎn nú akɔta e ma nɔ sɛn we ǎ lɛ́ɛ, a sú dǎkaxotɔ́ lɛ́ɛ sín kún dó, a súnsún nyǐkɔ yětɔn bǐ gbídígbídí.

⁷ Kɛntɔ́ sɔ́ tíin ǎ, donu tɔn vɔ bǐ gbídígbídí. Toxo yětɔn e a gba hánnyá lɛ́ɛ ɔ́, mɛɖé sɔ́ flín yě ǎ.

⁸ Mawu Mavɔmavɔ ɖo axɔ́súzinkpo tɔn jí tɛgbɛ; é ɖo gbesisɔ mɛ bó ná ɖɔ hwɛ.

⁹ É nɔ́ ɖɔ hwɛ xá gbɛtɔ́ lɛ́ɛ ɖó jlɔ̌jlɔ́ jí, é nɔ́ ɖɔ hwɛ xá togun lɛ́ɛ lě e é jɛ xá gbɔn é.

¹⁰ Mawu Mavɔmavɔ wɛ nyí bibɛtɛn nú mɛ e táfú wɛ è ɖe é, é wɛ nyí ahohó adǎngbomɛ hwenu.

¹¹ Mawu Mavɔmavɔ! Mɛ e tunwun we lɛ́ɛ nɔ́ sɔ́ yěɖée dó alɔ mɛ nú we, ɖó a nɔ́ jó mɛ e ɖo biba we wɛ lɛ́ɛ dó ǎ.

¹² Mi ji han mlá Mawu Mavɔmavɔ, Mawu Mavɔmavɔ e axɔ́súzinkpo tɔn ɖo Sinyɔ́ɔ é; mi jlá nǔjíwǔ tɔn lɛ́ɛ gbɔn togun lɛ́ɛ mɛ!

¹³ Đó è kɔn hun kɔn nyi ayǐ ɔ́, Mawu nɔ́ kanbyɔ́, ayi tɔn nɔ gosín jí ǎ, é nɔ́ wɔn xó e sú wɛ mɛ ma ɖó mɛɖé lɛ́ɛ ɖe ɔ́ ǎ.

¹⁴ Mawu Mavɔmavɔ, jɔwǔ mì! Kpɔ́n gbɛ e mɛ kɛntɔ́ ce lɛ́ɛ ɖó mì é! Đe mì sín kú hɔn jí,

¹⁵ bónú má ɖɔ nǔ e wú un ɖo kpikpa we wɛ lɛ́ɛ, un ná ɖɔ bó ná lɛ́ vɔ́ ɖɔ gbɔn Sinyɔ́ɔ sín hɔntogbó lɛ́ɛ jí, bónú má j'awǎ, ɖó hwlɛ̌n e a hwlɛ̌n mì gán é wú.

¹⁶ Akɔta e ma nɔ sɛn we ǎ lɛ́ɛ jɛ do e yě ɖésúnɔ kun ɔ́ mɛ; yě jɛ mɔ e yě ɖésúnɔ ɖó é mɛ.

¹⁷ Mawu Mavɔmavɔ ɖe mɛ e é nyí ɔ́ xlɛ́, hwɛjijɔ wɛ é nɔ́ ɖɔ. Mɔ e mɛdídá ɖésú ɖó ɔ́ wɛ é nɔ́ dó wlí i ná.

¹⁸ Dǎkaxotɔ́ lɛ́ɛ kpan nukɔn kútomɛ, yě akɔta énɛ́ lɛ́ɛ e gbɛ́ Mawu é bǐ kpan nukɔn kútomɛ.

¹⁹ Lo ɔ́, Mawu ná wɔn mɛ ma ɖó mɛɖé lɛ́ɛ káká sɔ́yi ǎ, wamamɔnɔ nɔ gɔn nukún ɖó nǔ gbeɖé ǎ.

²⁰ Mawu Mavɔmavɔ! Sí te, ma lɔn nú gbɛtɔ́ ní ɖu ɖ'é jí ó! Đɔ hwɛ xá akɔta e ma nɔ sɛn we ǎ lɛ́ɛ!

²¹ Mawu Mavɔmavɔ! Dǒ xɛsi yě, togun énɛ́ lɛ́ɛ ní tunwun ɖɔ gbɛtɔ́ wɛ émí nyí, bó ná kú gbe ɖokpó.