Ɖɛhan 89 - MAWUXÓWÉMA

¹ Xó lómílómí Etáni, Zeláxi ví ɔ́ tɔn dó han mɛ.

² Mawu Mavɔmavɔ, un ná nɔ́ ji xomɛnyínyɔ́ towe dó han mɛ tɛgbɛ; un ná nɔ́ jlá gbejíninɔ towe káká sɔ́yi.

³ Un ná nɔ ɖɔ: “Xomɛnyínyɔ́ towe ɖo ayǐ káká sɔ́yi; gbejíninɔ towe dó ɖɔ do ɖo jǐxwé.”

⁴ A ɖɔ: “Un jɛ akɔ ɖokpó xá mɛ e un sɔ́ é, un dó akpá ɖokpó nú mɛsɛntɔ́ ce Davídi ɖɔ:

⁵ Un ná nɔ sɔ́ vǐ towe ɖokpó ɖó axɔ́súzinkpo jí káká sɔ́yi; un ná hɛn axɔ́súzinkpo towe ɖó te káká sɔ́yi.” Agbɔ̌n

⁶ Mawu Mavɔmavɔ, jǐnukúnsin ɖo nǔ ɖagbe ɖagbe e a wa lɛ́ɛ ɖɔ wɛ dó han mɛ; mɛ e ɖo jǐxwé lɛ́ɛ nɔ́ sɔ́ we su ɖó gbejíninɔ towe wú.

⁷ Mɛ̌ è ka sixú jlɛ́ dó hwi Mawu Mavɔmavɔ wú ɖo jǐnukúnsin? Nǔmɛsɛn lɛ́ɛ ɖě tɛ́ ká yá ga we?

⁸ Mawu, nǔsísí ɖaxó ɖokpó wɛ a nyí ɖo wɛnsagun lɛ́ɛ tɛ́ntin, nǔdóxɛsi wɛ a nyǐ ɖo tɛ́ntin yětɔn.

⁹ Mawu Mavɔmavɔ, Mawu Nǔbǐwúkpétɔ́, mɛ̌ ká syɛ́n hwɛ ɖɔhun? Mawu Mavɔmavɔ, a ɖo gbejí tɛgbɛ.

¹⁰ Xu nɔ ɖo adǎn jí, é nɔ́ ɖo awa kɛ wɛ, hwi wɛ ka nɔ kpé jǐ tɔn; xu sí te ɔ́, hwi wɛ nɔ hwíhwɛ́ ɛ.

¹¹ Hwi wɛ xo Hlaxávu nǔdábaɖa ɔ́ zlɛ́ gǎ ɖɔhun, bó nyínyɛ́ ɛ; hwi wɛ sɔ́ hlɔ̌nhlɔ́n towe dó gba kɛntɔ́ towe lɛ́ɛ dó.

¹² Towe wɛ nyí jǐxwé ɔ́; towe wɛ nyí ayǐkúngban ɔ́ lɔ. Hwi wɛ bló gbɛ ɔ́ kpó nǔ e ɖ'é mɛ lɛ́ɛ bǐ kpó.

¹³ Hwi wɛ bló Tofɔligbé, hwi wɛ bló Totaligbé. Tabɔ́ɔ só ɔ́ kpó Ɛmɔ́ɔ só ɔ́ kpó ɖo asíkpɛ́ xo nú nyǐkɔ towe wɛ.

¹⁴ Hlɔ̌nhlɔ́n ɖo awa towe mɛ bó vɛ́ jlɛ́; alɔ towe syɛ́n, alɔ towe aɖisí ɔ́ ɖó hlɔ̌nhlɔ́n ɖésú.

¹⁵ Hwɛjijɔ kpó nǔjlɔ́jlɔ́wiwa kpó jí wɛ axɔ́súzinkpo towe jínjɔ́n. Xomɛnyínyɔ́ kpó gbejíninɔ kpó wɛ nɔ zɔn xá we.

¹⁶ Nǔ nyɔ́ nú togun e nɔ xomlá we é; Mawu Mavɔmavɔ, togun énɛ́ ɔ́ nɔ́ zun zɔnlin ɖo wěziza towe nu.

¹⁷ Togun énɛ́ ɔ́ nɔ́ ɖo awǎjijɛ mɛ tɛgbɛ ɖó nyǐkɔ towe wú, é nɔ́ ɖo te ɖó hwɛjijɔ towe wú.

¹⁸ Đó hwi wɛ nɔ sɔ́ ɛ su, hwi wɛ nɔ ná ɛ hlɔ̌nhlɔ́n. Wǔjɔmɛ towe mɛ wɛ hlɔ̌nhlɔ́n nɔ́ jɛ hlɔ̌nhlɔ́n jí nú mǐ ɖe.

¹⁹ Mawu Mavɔmavɔ, hwi wɛ ná mɛ e ná cyɔ́n alɔ mǐ jí ɔ́ mǐ; Mɛ mímɛ́ Izlayɛ́li tɔn, hwi wɛ ná axɔ́sú mǐ.

²⁰ A sɔ́ hwiɖée xlɛ́ mɛ e ɖo gbejí nú we lɛ́ɛ gbe ɖokpó, bó ɖɔ nú yě ɖɔ: “Un gɔ́ alɔ nú súnnu glegbenu ɖokpó. Un zé dɔ̌nkpɛvú ɖokpó d'aga ɖo togun ɔ́ mɛ.

²¹ Un mɔ Davídi, bó kɔn ami ce mímɛ́ ɔ́ dó ta n'i, bɔ é ná nyí mɛsɛntɔ́ ce.

²² Alɔ ce ná hɛn ɛ ɖó te, awa ce ná nyí sósyɛ́n tɔn bɔ é ná lí dǒ.

²³ Kɛntɔ́ ná sixú fyán ɛ ǎ, mɛdídá ná sixú dó tagba n'i ǎ.

²⁴ Un ná já mɛ e ma ɖo jǐ tɔn ǎ lɛ́ɛ ɖo nukɔn tɔn, un ná hu mɛ e gbɛ́ wǎn n'i lɛ́ɛ.

²⁵ Gbejíninɔ ce kpó xomɛnyínyɔ́ ce kpó ná nɔ kpɔ́ xá ɛ, bɔ hlɔ̌nhlɔ́n tɔn ná yi jǐ ɖó nyɛ wú.

²⁶ Un ná ná ɛ acɛ, bɔ é ná kpa acɛ nú xu kpó tɔsisa kpó.

²⁷ Éyɛ́ ɔ́, é ná nɔ́ sú xó ylɔ́ mì ɖɔ: ‘Hwi wɛ nyí tɔ́ ce, hwi wɛ nyí Mawu ce, hwi wɛ nyí só e hwlɛ́n mì gán é.’

²⁸ Nyɛ ɔ́, un ná sɔ́ ɛ dó ɖó nukɔn ví ce; é ná hú gǎn axɔ́sú e ɖo ayǐkúngban jí lɛ́ɛ bǐ.

²⁹ Un ná nɔ́ nyɔ́ xomɛ dó wǔ tɔn tɛgbɛ; nǔɖé ná sɛ do ɖo akɔ e un jɛ xá ɛ ɔ́ mɛ gbeɖé ǎ.

³⁰ Un ná nɔ́ sɔ́ vǐ tɔn ɖokpó ɖó zinkpo tɔn jí tɛgbɛ; jǐnukúnsin vɛ́ kó ɖo te ɔ́, axɔ́súzinkpo tɔn ná ɖo te.

³¹ Ényí vǐ tɔn lɛ́ɛ jó sɛ́n ce dó, bó ma nɔ́ wa nǔ e un zɔ́n lɛ́ɛ ǎ ɔ́,

³² ényí yě ma nɔ́ xwedó gbetakɛ́n ce lɛ́ɛ ǎ, bó nɔ gba tito ce lɛ́ɛ ɔ́,

³³ un ná zé bǎ dó xo yě, ɖó tónú e yě ma se ǎ é wú; un ná dɔn tó nú yě ɖó hwɛ e yě hu lɛ́ɛ wú.

³⁴ Lo ɔ́, un ná gɔn xomɛ nyɔ́ dó yě wú ǎ, un ka ná gɔn gbejí nɔ nú yě ǎ.

³⁵ Un ná gba akɔ e un jɛ xá yě ɔ́ ǎ, akpá e un dó ɔ́ ná húzú gbeɖé ǎ.

³⁶ Un xwlé mɛ mímɛ́ e un nyí ɔ́ gbe ɖokpó ɖɔ: Gbeɖé, un ná ɖɔ vo nú Davídi bo ka ná wa vo n'i ǎ.

³⁷ É ná kpo kún gbeɖé ǎ; nú hwe vɛ́ kó sixú nɔ́ tɔ́n ɔ́, axɔ́súzinkpo tɔn ná ɖo te tɛgbɛ.

³⁸ Axɔ́súzinkpo tɔn ná ɖo te káká sɔ́yi sun ɖɔhun, lě e sun nɔ wá jǐ tɛgbɛ ɖo jǐxwé ɔ́ ɖɔhun.” Agbɔ̌n

³⁹ É ɖo mɔ̌ có, a gbɛ̌ axɔ́sú e a sɔ́ é, a jǒ e dó, a sin xomɛ dó e.

⁴⁰ A gbɛ́ wǎn nú akɔ e a jɛ xá mɛsɛntɔ́ towe é; a sɔ́ axɔ́súgbákún tɔn xo kɔ́, a ɖu su nú axɔ́súgbákún tɔn.

⁴¹ A ɖe ali dó ahohó tɔn lɛ́ɛ mɛ, a gba fí e é nɔ́ nɔ bɔ nǔɖé má nɔ́ sixú wa ɛ ǎ lɛ́ɛ.

⁴² Aligbɔntɔ́ lɛ́ɛ bǐ nɔ́ bɛ́ nǔ tɔn lɛ́ɛ, é húzú nǔkiko nú mɛ e ɖo akpá tɔn lɛ́ɛ.

⁴³ A nǎ ɖuɖéjí mɛ e ma ɖo jǐ tɔn ǎ lɛ́ɛ, a dǒ xomɛhunhun nú kɛntɔ́ tɔn lɛ́ɛ bǐ.

⁴⁴ A hɛn hwǐ tɔn wló nu, a nɔ jǐ tɔn ɖo ahwangbénu ǎ.

⁴⁵ A ɖǒ susu e xɔ wɛ é ɖe ɔ́ te, a zin axɔ́súzinkpo tɔn dó ayǐ.

⁴⁶ A ɖe xwe nabí e é ná dó nɔ dɔ̌nkpɛ mɛ ná é kpo; a dǒ winnyá ɛ. Agbɔ̌n

⁴⁷ Mawu Mavɔmavɔ, káká jɛ hwetɛ́nu wɛ a nǎ zé hwiɖée hwlá dó yi jɛ? Káká jɛ hwetɛ́nu wɛ xo towe mɛ ná hun agbǎn yi jɛ?

⁴⁸ Flín ɖɔ azǎn ywɛywɛ ɖé ná bló wɛ jɛ́n un ɖe ɖo ayǐkúngban jí fí; flín ɖɔ gbɛtɔ́ e a blǒ lɛ́ɛ bǐ wɛ ná kú.

⁴⁹ Gbɛtɔ́ ɖě tíin bó ná sixú nɔ gbɛ káká bó ná gɔn kú a? Gbɛtɔ́ ɖě tíin bó ná sixú hwlɛ́n lǐndɔ̌n é ɖésúnɔ tɔn gán sín kútomɛ a? Agbɔ̌n

⁵⁰ Aklúnɔ, ɖagbe e a nɔ wa ɖ'ayǐ xóxó lɛ́ɛ ɔ́, fítɛ́ bǐ ká gbɔn? Đagbe e sín akpá a dǒ nú Davídi ɖo gbejíninɔ towe mɛ lɛ́ɛ ɔ́, fítɛ́ yě ká ɖe?

⁵¹ Aklúnɔ, flín cí e è kɔn dó mɛsɛntɔ́ towe lɛ́ɛ wú é; flín ɖɔ nyɛ wɛ ɖo agban mɛ énɛ́ lɛ́ɛ bǐ tɔn hɛn wɛ.

⁵² Mawu Mavɔmavɔ, flín hɛ̌n e kɛntɔ́ towe lɛ́ɛ dó axɔ́sú e a sɔ́ é, flín hɛ̌n e yě dó e é.

⁵³ Mi nú mǐ nǎ kpa Mawu Mavɔmavɔ káká sɔ́yi. Amǐ! Amǐ!