Ɖɛhan 88 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ; è nɔ ji dó han e è nɔ ylɔ́ ɖɔ “Mahalati Leyanɔti” ɔ́ sín hangbe mɛ. Xó lómílómí Hemani Zeláxi ví ɔ́ tɔn dó han mɛ.

² Mawu Mavɔmavɔ, Mawu ce, Mɛhwlɛ́ngántɔ́ ce, un ɖo xó sú wɛ zǎn kpó kéze kpó ɖo nukɔn towe.

³ Đɛ e xo wɛ un ɖe ɔ́ ní wá gɔ̌n towe. Đǒtó vo e sa wɛ un ɖe é.

⁴ Nǔ nyanya kɛ́ɖɛ́ wɛ xá mì ɖo gbɛ ce mɛ, un ko ɖo kútomɛ mɔ sɛ́ dó wɛ.

⁵ È ko lɛ́n mì dó mɛ e è nǎ sɛ xwe zaanɖé din lɛ́ɛ mɛ; un cí mɛ e ma sɔ́ ɖó hlɔ̌nhlɔ́n ǎ é ɖɔhun.

⁶ Tɛn ce ɔ́, mɛkúkú lɛ́ɛ mɛ wɛ é kó ɖe; un cí mɛ e ko kú bɔ è sɔ́ mlɔ́ yɔdo mɛ lɛ́ɛ ɖɔhun, xó yětɔn kó fó ɖo gɔ̌n towe, a sɔ́ nɔ́ kpé nukún dó yě wú ǎ.

⁷ A zě mì nyi dó domaɖó-azan mɛ, zǐnflú mɛ, do gɔngɔn mɛ.

⁸ Adǎn e jí a ɖe ɔ́ hú gǎn mì, é nɔ́ xo wá gba mì aslɔkɛ́ ɖɔhun. Agbɔ̌n

⁹ A nya xɔ́ntɔn ce lɛ́ɛ dó zɔ nú mì, a sɔ́ mì dó húzú nǔvɛ́mɔ nú yě. Un ɖo hɔn sú dó bó sixú tɔ́n ǎ.

¹⁰ Un mɔ wǔvɛ́ káká bɔ nukún ce sɔ́ nɔ́ mɔ nǔ ǎ. Mawu Mavɔmavɔ, ayǐhɔ́ngbe ayǐhɔ́ngbe ɔ́, un nɔ ɖo ylɔ̌ylɔ́ we wɛ; un nɔ ɖo alɔ dlɛ́n sɛ́ dó we wɛ.

¹¹ Mɛkúkú lɛ́ɛ wɛ a nǎ jlɛ́ nǔ ná a? Yě wɛ ná fɔ́n bó ná kpa we a? Agbɔ̌n

¹² Lě e a nyɔ̌ sɔ ɔ́, è sixú ɖɔ ɖo yɔdo mɛ a? Lě e a ɖo gbejí gbɔn ɔ́, è sixú ɖɔ ɖo do gɔngɔn mɛ a?

¹³ È nɔ mɔ nǔjíwǔ towe lɛ́ɛ ɖo zǐnflú mɛ wɛ a? È nɔ mɔ hwɛjijɔ towe ɖo ayǐkúngban e mɛɖé má sɔ́ flín ǎ é jí wɛ a?

¹⁴ Nyɛ ɔ́, hwi Mawu Mavɔmavɔ ɔ́ wɛ un sú xó ylɔ́; zǎnzǎn ɔ́, un nɔ ɖɔ nǔ e ba wɛ un ɖe lɛ́ɛ nú we.

¹⁵ Mawu Mavɔmavɔ, nɛ̌ ká gbɔn bɔ a gbɛ̌ mì? Nɛ̌ ká gbɔn bɔ a zě hwiɖée hwlá dó mì?

¹⁶ Wamamɔnɔ wɛ un nyí, un nyí mɛ bo ɖo kúdonu sín vǔ ɖokpóó. Nǔ e wa xá mì wɛ a ɖe ɔ́ syɛ́n ɖésú; ayi ce bǐ wɛ gbadó.

¹⁷ Xomɛsin ɖaxó e jí a ɖe é ɖo nǔ wa xá mì wɛ, nǔ e dó sin xá mì wɛ a ɖe ɔ́ hu acɛ ce bǐ.

¹⁸ Tɔ ɖɔhun wɛ yě ɖi bú mì; ayǐ hɔ́n tɛgbɛ ɔ́, yě nɔ́ xá mì gbɔn fí bǐ.

¹⁹ A nya mɛmɔgbɔ ce lɛ́ɛ kpó hǎgbɛ́ ce lɛ́ɛ kpó dó zɔ nú mì; Xɔ́ntɔn ɖokpó e kpo nú mì ɔ́ wɛ nyí ablu.