Ɖɛhan 85 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ.

² Mawu Mavɔmavɔ, a sɔ́ nukún ɖagbe dó kpɔ́n to towe; a zě Jakɔ́bu ví lɛ́ɛ ɖó tɛn e mɛ yě ɖe ɖ'ayǐ é mɛ.

³ A sɔ́ nǔ e togun towe wa nyi do ɔ́ kɛ ɛ; a súnsún hwɛ e é hu lɛ́ɛ bǐ. Agbɔ̌n

⁴ A jǒ xomɛ e sin dó e wɛ a ɖe ɔ́ dó; a sɔ́ ɖo adǎn jí ǎ.

⁵ Mawu Mɛhwlɛ́ngántɔ́ mǐtɔn, zě mǐ ɖó tɛn e mɛ mǐ ɖe ɖ'ayǐ é mɛ; nǔ mǐtɔn ní má sɔ́ vɛ́ wǔ towe ɖě ó.

⁶ A nǎ ɖo xomɛ sin dó mǐ wɛ tɛgbɛ wɛ a? Xomɛsin towe ná nɔ ayǐ káká sɔ́yi wɛ a?

⁷ A nǎ lɛ́ wá ná gbɛ mǐ, bónú mǐ mɛ e nyí togun towe ɔ́ ná mɔ awǎjijɛ ɖo gɔ̌n towe ǎ cé?

⁸ Mawu Mavɔmavɔ, sɔ́ xomɛnyínyɔ́ towe xlɛ́ mǐ, hwlɛ́n mǐ gán.

⁹ Un ná ɖótó nǔ e ɖɔ wɛ Mawu Mavɔmavɔ, Mawu mǐtɔn ɖe ɔ́, ɖó é ɖo fífá sín akpá dó nú togun tɔn wɛ, bó dó fífá sín akpá nú mɛ e ɖo gbejí n'i lɛ́ɛ, bónú yě ma sɔ́ bló nǔ dǎkɔdǎkɔ ɖě ó.

¹⁰ Nǔgbó ɔ́, mɛ e nɔ sí Mawu lɛ́ɛ ɔ́, hwlɛngán tɔn ko sɛ yá yě, bónú susu tɔn ná nɔ to mǐtɔn mɛ.

¹¹ Xomɛnyínyɔ́ kpó gbejíninɔ kpó ná nɔ́ kplé; hwɛjijɔ kpó fífá kpó ná nɔ́ kplá así kɔ nú yěɖée.

¹² Gbejíninɔ ná wú kun sín ayǐkúngban glɔ́, hwɛjijɔ ná jɛ te sín jǐxwé.

¹³ Mawu Mavɔmavɔ ɖésú ná ná nyɔ̌ná mǐ, bɔ ayǐkúngban mǐtɔn ná ná sínsɛ́n tɔn.

¹⁴ Hwɛjijɔ ná nɔ zun zɔnlin ɖo nukɔn tɔn, bó ná ɖe ali e jí é ná gbɔn ɔ́ ɖo nukɔn tɔn.