Ɖɛhan 84 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ; è nɔ ji bo nɔ xo kanhún Gatinu lɛ́ɛ tɔn d'é mɛ.

² Mawu Mavɔmavɔ Nǔbǐwúkpétɔ́, un yí wǎn nú nɔtɛn towe lɛ́ɛ mɛ nya!

³ Kɔ́xo towe lɛ́ɛ ta wíwá ɖo nukún myá nú mì wɛ ɖésú. Nyi ɖésú ɔ́ bǐ ɖo xixo mlá hwi Mawu gbɛɖe ɔ́ wɛ.

⁴ Títígwetí ɖésú nɔ́ mɔ fí e é ná xo adɔ̌ ɖó é, azɔnxɛ nɔ mɔ adɔ̌ e mɛ é ná bɛ́ vǐ tɔn lɛ́ɛ dó é. Mawu Mavɔmavɔ Nǔbǐwúkpétɔ́, axɔ́sú ce, Mawu ce! Vɔ̌sákpe towe lɛ́ɛ kpá wɛ nyí fí e yě bǐ mɔ é.

⁵ Nǔ nyɔ́ nú mɛ e nɔ́ nɔ xwé towe gbe lɛ́ɛ lóóo! Yě ná nɔ́ ɖo susu kpa nú we wɛ hwebǐnu. Agbɔ̌n

⁶ Nǔ nyɔ́ nú mɛ e a nǎ hlɔ̌nhlɔ́n lɛ́ɛ, yě mɛ e gɔ̌n towe wíwá ɖo hǔn mɛ ná lɛ́ɛ ɔ́, nǔ nyɔ́ nú yě mɛ nya.

⁷ Nú yě ɖo tɔdo Baka tɔn e ko xú bǐ é mɛ gbɔn wɛ ɔ́, yě nɔ́ sɔ́ dó húzú fí e tɔjɔtɛn sukpɔ́ ɖe é; xwejí nɔ́ ja dó ylɔ́ fífá dó tɔdo ɔ́ mɛ.

⁸ Yě ɖo yiyi wɛ ɔ́, yě nɔ́ ɖo hlɔ̌nhlɔ́n mɔ dó hlɔ̌nhlɔ́n jí wɛ, káká bó nɔ́ wá gɔ̌n towe ɖo Sinyɔ́ɔ.

⁹ Mawu Mavɔmavɔ, Mawu Nǔbǐwúkpétɔ́, ɖǒtó vo e sa wɛ un ɖe ɔ́. Mawu Jakɔ́bu tɔn! Đǒtó mì. Agbɔ̌n

¹⁰ Mawu ce, hwi mɛ e nyí gǎglónú mǐtɔn ɔ́, nyi kɔ bó kpɔ́n mɛ e a sɔ́ é.

¹¹ Nǔgbó ɔ́, è nɔ kɔ́xo towe lɛ́ɛ ta xɔ azǎn ɖokpó ɔ́, é nyɔ́ hú è blǒ azǎn afatɔ́n ɖo fí ɖěvo. Mawu ce, un yí wǎn nú xwé towe lihɛ́nnu ninɔ hú adǎkaxotɔ́ lɛ́ɛ xwé ninɔ.

¹² Nǔgbó ɔ́, Mawu Mavɔmavɔ ɔ́, hwe wɛ, gǎglónú wɛ. Mawu Mavɔmavɔ nɔ nyɔ́ xomɛ dó mɛ wú; é nɔ sɔ́ mɛ su. É nɔ́ tɛ nyɔ̌ná mɛ e nɔ wa nǔ jlɔ́jlɔ́ lɛ́ɛ é ǎ.

¹³ Mawu Mavɔmavɔ Nǔbǐwúkpétɔ́, nǔ nyɔ́ nú mɛ e ɖeji dó wǔ we lɛ́ɛ.