Ɖɛhan 83 - MAWUXÓWÉMA

¹ Asáfu sín han.

² Mawu ce, ma tin dó nǔ e ɖo jijɛ wɛ é ó. Ma nɔ abwɛ̌ ó, ma nɔ xwíí dó nǔ e ɖo jijɛ wɛ é wú ó.

³ Vɛ̌ kpɔ́n! Kɛntɔ́ towe lɛ́ɛ ɖo adǎn jí, mɛ e gbɛ́ wǎn nú we lɛ́ɛ ɖo te sí dó mǐ jí wɛ.

⁴ Yě ɖo kpá yi dó togun towe ta wɛ, togun towe e jí a nɔ nya xɛ ɖe ɔ́, yě blá gbě tɔn.

⁵ Yě ɖɔ: “Mi wá mǐ ní ɖe yě sín ayǐkúngban ɔ́ jí, bónú mɛɖé ma sɔ́ flín nyǐkɔ Izlayɛ́li tɔn gbeɖé ó.”

⁶ Yě bǐ ɖó gbe kpɔ́ bó yi kpá, yě nu alɛ dó ta towe mɛ, ɖɔ émí ná wa nǔ xá we.

⁷ Yě mɛ e wɛ lɛ́ɛ ɖíe: Edɔ́mu ví lɛ́ɛ, Isimayɛ́li ví lɛ́ɛ, Mɔwabu ví lɛ́ɛ, Hagáa ví lɛ́ɛ,

⁸ Gevalunu lɛ́ɛ, Amumɔ́ɔ ví lɛ́ɛ, Amalɛ́ki ví lɛ́ɛ, Filisitɛ́ɛn lɛ́ɛ kpódó Tíinu lɛ́ɛ kpó.

⁹ Asilíinu lɛ́ɛ lɔmɔ̌ gɔ́ nú yě, bó gɔ́ alɔ nú Lɔ̌ti ví lɛ́ɛ: Mɔwabu ví lɛ́ɛ kpó Amumɔ́ɔ ví lɛ́ɛ kpó. Agbɔ̌n

¹⁰ Mawu ce, wa nǔ xá yě lě e a wa xá Madiáani gbɔn é, wa nǔ xá yě lě e a wa xá Sisela gbɔn é, wa nǔ xá yě lě e a wa xá Yavíni gbɔn ɖo tɔsisa Kicɔ́ni tɔn kɔn é.

¹¹ A sú kún yětɔn dó ɖo Eyinu-Dɔ́ɔ, yě húzú jɛ nú ayǐkúngban ɔ́.

¹² Wa nǔ xá gbɛtɔ́ nukúnɖéjí e ɖo yě mɛ lɛ́ɛ lě e a wa xá Olɛ́vu kpó Zéɛvu kpó gbɔn é; wa nǔ xá gǎn yětɔn lɛ́ɛ bǐ, lě e a wa xá Zɛváxi kpó Salumúna kpó gbɔn é.

¹³ Wa nǔ xá yě mɛ énɛ́ lɛ́ɛ e ɖɔ émí ná klá jɛ ayǐkúngban towe nu lɛ́ɛ.

¹⁴ Mawu ce, fúnfún yě kpé nǔywɛ́ e mɛ axásáxásá jɔhɔn dó alɔ é ɖɔhun.

¹⁵ Wa nǔ xá yě lě e myɔ nɔ ɖíɖɔ́ zunkan gbɔn é; wa nǔ xá yě lě e myɔ nɔ vun blá só ɖaxó gbɔn é;

¹⁶ nya yě dó wezun nu kpó jɔhɔn ɖaxó ɖé kpó; sɔ́ jɔhɔn towe e nukɔn nǔɖé má nɔ́ nɔ te ɖe ǎ ɔ́ dó dó xɛsi yě.

¹⁷ Mawu Mavɔmavɔ, dǒ winnyá yě, bónú yě ní lɛ́ kɔ wá gɔ̌n towe.

¹⁸ Wi yětɔn ní kɔ́n, xɛsi ní ɖo yě jí káká sɔ́yi, yě ní ɖu hɛ̌n, yě ní kú.

¹⁹ Yě ní tunwun ɖɔ hwi ɖokpónɔ géé sín nyǐkɔ wɛ nyí Mawu Mavɔmavɔ, hwi wɛ nyí Mawu Ajalɔ̌nlɔn ɖo ayǐkúngban ɔ́ bǐ jí.