Ɖɛhan 8 - MAWUXÓWÉMA

Susu Mawu tɔn kpó susu gbɛtɔ́ tɔn kpó

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún Gatinu lɛ́ɛ tɔn d'é mɛ .

² Mawu Mavɔmavɔ, Aklúnɔ mǐtɔn, nɛ̌ nyǐkɔ towe ka yi jǐ sɔ ɖo ayǐkúngban ɔ́ bǐ jí nɛ́! A nɔ́ ɖe susu towe xlɛ́ ɖo jǐxwé aga.

³ Yɔkpɔ́vú lɛ́ɛ kpó vǐ ɖo anɔ̌ nu lɛ́ɛ kpó nɔ́ kpa susu nú we; susu e yě nɔ́ kpa nú we ɔ́ wɛ nyí hlɔ̌nhlɔ́n e a dǒ gbo ali nú kɛntɔ́ towe lɛ́ɛ é, ahohó ɖɔhun. A blǒ mɔ̌ bó dó xwe kɛntɔ́ lɛ́ɛ kpó hlɔnbatɔ́ lɛ́ɛ kpó sín nu dó xɔ.

⁴ Ényí un kpɔ́n jǐxwé, alɔ towe nǔwiwa ɔ́, bó kpɔ́n sun kpó sunví kpó e a sɔ́ ɖó tɛn yětɔn yětɔn mɛ lɛ́ɛ ɔ́,

⁵ un nɔ kanbyɔ́ nyɛɖée ɖɔ étɛ́ gbɛtɔ́ ká nyí, bɔ a nɔ ké ya n'i sɔ mɔ̌? Gbɛtɔ́ e ná wá hán gbe ɖokpó kpowun ɔ́, ani wɛ é nyí bɔ a nɔ lébe n'i?

⁶ A blǒ gbɛtɔ́, bɔ kpɛɖé jɛ́n hwi ɖésú hú gǎn ɛ. A sɔ́ ɛ su ɖésú; a wlǐ yɛ̌yi n'i tawun.

⁷ A sɔ́ ɛ ɖó alɔ towe nǔwiwa lɛ́ɛ bǐ nu, a bɛ̌ nǔ bǐ dó afɔ tɔn lɛ́ɛ glɔ́:

⁸ A sɔ́ ɛ ɖó gbɔ̌, nyibú kpó gběkanlin lɛ́ɛ bǐ kpó nu,

⁹ bó sɔ́ ɛ ɖó xɛ kpó hweví kpó nǔɖogbɛ e ɖo tɔxwé lɛ́ɛ bǐ kpó nu.

¹⁰ Mawu Mavɔmavɔ, Aklúnɔ mǐtɔn, nɛ̌ nyǐkɔ towe ka yi jǐ sɔ ɖo ayǐkúngban ɔ́ jí nɛ́!