Ɖɛhan 78 - MAWUXÓWÉMA

Tan Izlayɛ́li tɔn ɔ́, è ɖǒ ná wɔn ǎ

¹ Xó lómílómí Asáfu tɔn. Togun ce, ɖǒtó nǔ e kplɔ́n we wɛ un ɖe é; tɛ́ tó bó se xó e ɖɔ wɛ un ɖe é.

² Un hun nu bó ná dó lǒ ɖokpó, nǔbasɔ́ xóxó hwenu tɔn lɛ́ɛ ná ɖɔ wɛ un ɖe.

³ Nǔ e mǐ se ɔ́, nǔ e mǐ tunwun ɔ́, nǔ e sín tan tɔ́ mǐtɔn lɛ́ɛ lɛ́ vɔ́ kpi nú mǐ ɔ́,

⁴ mǐ ná zé hwlá dó vǐ mǐtɔn lɛ́ɛ ǎ. Mǐ ná ɖɔ lě e Mawu Mavɔmavɔ xɔ susu gbɔn ɔ́ nú yě, lě e é ɖó hlɔ̌nhlɔ́n sɔ ɔ́ nú yě; mǐ ná ɖɔ nǔjíwǔ e é wa lɛ́ɛ nú yě.

⁵ É ɖó tito ɖé ayǐ nú togun Izlayɛ́li tɔn; é ɖó sɛ́n ɖé ayǐ nú Jakɔ́bu ví lɛ́ɛ, bó ɖɔ nú tɔ́gbó mǐtɔn lɛ́ɛ ɖɔ yě ní kplɔ́n vǐ yětɔn lɛ́ɛ.

⁶ Énɛ́ ɔ́, vǐ e ná wá jɔ lɛ́ɛ lɔmɔ̌ ná tunwun sɛ́n ɔ́, bɔ yě lɔ ná wa ɖɔ xó tɔn nú vǐ yětɔn lɛ́ɛ,

⁷ bɔ vǐ yětɔn lɛ́ɛ ná ɖeji dó Mawu wú, bó ná wɔn azɔ̌ e é wa lɛ́ɛ ǎ, lobo ná nɔ́ nyi sɛ́n tɔn lɛ́ɛ,

⁸ bó má wá cí tɔ́gbó yětɔn lɛ́ɛ ɖɔhun ó, bó má nyí gbɛtɔ́ tótlítɔ́, gǔfɔ́ntɔ́ ó, gbɛtɔ́ e ayi tɔn ma nɔ́ nɔ fí ɖokpó ǎ é, gbɛtɔ́ e má ɖo gbejí nú Mawu ǎ é ó.

⁹ Eflayímu ví lɛ́ɛ hɛn gǎ bó xwe ahwan fun gbé, gbe e gbe è nǎ fun ahwan ɔ́ ká su, bɔ yě dó gblǒ mɛ.

¹⁰ Yě nɔ gbejí nú akɔ e Mawu jɛ xá yě ɔ́ ǎ; yě sɔ́ xwedó Mawusɛ́n ɔ́ ǎ.

¹¹ Yě wɔn azɔ̌ ɖaxó ɖaxó e Mawu bló lɛ́ɛ, nǔjíwǔ e é blǒ bɔ yě mɔ lɛ́ɛ ɔ́, yě wɔn.

¹² Mawu wa nǔjíwǔ ɖo tɔ́gbó yětɔn lɛ́ɛ nukún mɛ ɖo Ejípu, ɖo Sowáan gbé jí:

¹³ É má xu ɖó we, bó ɖe ali gbɔn mɛ nú yě; É sɛ sin kplé glélé ahohó ɖɔhun.

¹⁴ É nɔ́ zé akpɔ́kpɔ́ dó xlɛ́ ali yě kéze. É jɛ zǎn mɛ ɔ́, é nɔ́ sɔ́ myɔ dó xlɛ́ ali yě.

¹⁵ É zɛ só ɖo gbětótló mɛ, bɔ sin sa sín mɛ hohoho tɔsisa ɖɔhun, bɔ yě nu.

¹⁶ É ɖe gbe bɔ sin tɔ́n sín awǐnnya mɛ, bó nɔ́ sa tɔsisa ɖɔhun.

¹⁷ É wa mɔ̌ có, yě lɛ́ fɔ́n bó ɖo hwɛ hu dó e wɛ. Yě fɔ́n, bó ɖo gǔ fɔ́n dó éyɛ́ Mawu Ajalɔ̌nlɔn ɔ́ jí wɛ ɖo akúgbéjí.

¹⁸ Yě syɛ́n ta káká bó tɛ́n Mawu kpɔ́n; yě byɔ́ nǔɖuɖu i dó tɛ́n ɛ kpɔ́n.

¹⁹ Yě ɖɔ xó nyanya dó Mawu wú ɖɔ: “Mawu ka sixú ná nǔɖuɖu mǐ ɖo gbětótló mɛ a?

²⁰ É nɛ́ zin nǔ dó awǐnnya wú, bɔ sin tɔ́n bó sa tɔ nɛ́, é ká sixú ná nǔɖuɖu abǐ lan togun tɔn a?”

²¹ Ée Mawu Mavɔmavɔ se xó énɛ́ ɔ́, xomɛ sin i; é sin xomɛ dó Jakɔ́bu ví lɛ́ɛ bɔ é vɛ́ jlɛ́; Mawu sin xomɛ dó Izlayɛ́li ví lɛ́ɛ.

²² É sin xomɛ dó yě, ɖó nǔ e yě má ɖi n'i ǎ é wú; é sin xomɛ dó yě, ɖó yě gán jɛ hwlɛngán tɔn wú ǎ.

²³ É ɖe gbe dó akpɔ́kpɔ́ e ɖo jǐxwé lɛ́ɛ, é hun sɛ́xwé sín hɔn lɛ́ɛ.

²⁴ É ɖe gbe bɔ mǎna ja kɔn nyi ayǐ bɔ yě ɖu; é ná blěe yě sín jǐxwé.

²⁵ Yě mɛ bǐ ɖu nǔɖuɖu wɛnsagun lɛ́ɛ tɔn. Mawu sɛ́ nǔɖuɖu dó yě bɔ yě ɖu gɔ́ xo.

²⁶ Mawu ɖe gbe bɔ jɔhɔn zǎnzǎnhwe jí tɔn jɛ nyinyi jí ɖo jǐxwé; é ɖe gbe dó jɔhɔn afɔligbé tɔn ɔ́, bɔ é jɛ nyinyi jí gǎnnugǎnnu.

²⁷ É ɖe gbe bɔ lan ja kɔn nyi yě jí, xɛ ɖé lɛ́ɛ ja kɔn nyi yě jí, bó sukpɔ́ káká xuta nyɛ́kɛ́n ɖɔhun.

²⁸ É ɖe gbe bɔ nǔ énɛ́ lɛ́ɛ ja kɔn nyi fí e yě ɖó gɔnu ɖó ɔ́ lɛ́ lɛ̌ dó goxɔ yětɔn lɛ́ɛ.

²⁹ Yě ɖu nǔ gɔ́ xo. Mawu ná yě nǔ e jló yě lɛ́ɛ.

³⁰ Nǔ e jló yě bɔ yě ná ɖu ɔ́, yě ko ɖu kpé ǎ, nǔɖuɖu kpo ɖo nu yětɔn mɛ,

³¹ có xomɛsin Mawu tɔn jɛ yě jí, Mawu hu mɛ e dó hlɔ̌nhlɔ́n ganjí ɖo yě mɛ lɛ́ɛ; é zin dɔ̌nkpɛvú Izlayɛ́li tɔn lɛ́ɛ dɛ́.

³² Mawu wa nǔ xá yě mɔ̌ có yě fɔ́n bó kpo ɖo hwɛ hu wɛ; Mawu bló nǔjíwǔ énɛ́ lɛ́ɛ bǐ có yě ɖi nǔ n'i ǎ.

³³ Énɛ́ ɔ́ wú wɛ é zé fúnfún dó za yě sín gbɛ ɔ́ mɛ; é sɛ́ awě ɖé dó yě vawun dó ɖó nǔ gbɛzán yětɔn nu.

³⁴ Hwenu e Mawu jɛ yě hu jí ɔ́, yě jɛ biba ɛ jí, yě lɛ́ kɔ wá bó jɛ Mawu ba jí.

³⁵ Yě wá flín ɖɔ Mawu wɛ nyí sósyɛ́n émítɔn; yě flín ɖɔ Mawu Ajalɔ̌nlɔn wɛ nyí Mɛhwlɛ́ngántɔ́ émítɔn.

³⁶ Lo ɔ́, yě jɛ xó víví ɖɔ jí, bó ná dó klɔ́ Mawu, yě sɔ́ nu yětɔn dó jɛ adingban ɖó n'i jí.

³⁷ Yě jó ayixa yětɔn bǐ dó nú Mawu ǎ, yě ɖo gbejí nú akɔ e é jɛ xá yě ɔ́ ǎ.

³⁸ Amɔ̌, éyɛ́ ɔ́, mɛ nú nɔ́ blá wǔ n'i, bɔ é nɔ́ sɔ́ hwɛ kɛ yě, bó sú kún yětɔn dó ǎ. Hwe gěgé nu ɔ́, é nɔ́ jó xó dó; é nɔ́ lɔn bó nɔ́ sin xomɛ ǎ, é nɔ́ lɔn bó nɔ́ zé adǎn e jí é ɖe ɔ́ bǐ dó wa nǔ ná ǎ.

³⁹ É nɔ́ wá flín ɖɔ gbɛtɔ́ kpowun wɛ yě nyǐ, nǔ funfún ɖo xomɛ kpowun wɛ yě nyí, funfún ɔ́ yi hǔn, é vɔ nɛ́.

⁴⁰ Azɔn mɔ̌kpán wɛ yě fɔ́n gǔ dó jǐ tɔn ɖo gbětótló mɛ; azɔn mɔ̌kpán wɛ yě dó xomɛsin n'i ɖo axéko énɛ́ lɛ́ɛ jí.

⁴¹ Yě lɛ́ jɛ Mawu tɛ́nkpɔ́n jí, yě lɛ̌ jɛ agɔ jɛ dó Mɛ mímɛ́ Izlayɛ́li tɔn ɔ́ jí.

⁴² Yě sɔ́ flín hlɔ̌nhlɔ́n tɔn ǎ, yě ká sɔ́ flín gbe e gbe é hwlɛ́n yě ɖo kɛntɔ́ sí ɔ́ ǎ.

⁴³ Mɔ̌ ɖokpó ɔ́, yě sɔ́ flín nǔ e é jlɛ́ ɖo Ejípu lɛ́ɛ é ǎ, yě ká sɔ́ flín nǔjíwǔ e é wa ɖo Sowáan gbé jí lɛ́ɛ é ǎ:

⁴⁴ É zé tɔsisa yětɔn Nilu ɔ́ sín ala lɛ́ɛ dó húzú kanjɔ, bɔ yě sɔ́ sixú nu ɖě ǎ.

⁴⁵ É sɛ́ sukpɔ aɖǐvɛ́nɔ ɖé lɛ́ɛ dó yě, bɔ sukpɔ lɛ́ɛ nɔ́ kán yě ɖu; é sɛ́ běsé dó yě, bɔ běsé lɛ́ɛ nɔ́ gblé gbɛ dó nú yě.

⁴⁶ É jó nǔkún yětɔn nú wɛn lɛ́ɛ, nǔ e yě jɛ dɛ̌n bó wa ɔ́, é jó nú bɔkle lɛ́ɛ.

⁴⁷ Mawu sɔ́ kɛ́njí dó hɛn vǐwungbo yětɔn lɛ́ɛ gblé; é sɔ́ jǐ ɖaxó ɖé dó hɛn sikomɔ́ɔtín yětɔn lɛ́ɛ gblé.

⁴⁸ É sɔ́ kɛ́njí dó vívá kanlin yětɔn lɛ́ɛ sín kún, é jó kanlin hwan yětɔn lɛ́ɛ dó bɔ so jɛ yě.

⁴⁹ É sin xomɛ dó yě bɔ é syɛ́n ɖésú, xomɛsin ɔ́ syɛ́n káká bó vɛ́ jlɛ́, é sɛ́ wɛnsagun nǔhɛngblétɔ́ wɔ̌buwɔ́bú ɖé dó yě.

⁵⁰ Xomɛ e é sin é ɔ́, é jó dó ǎ; é sɔ́ gbɛ́ kú yětɔn ǎ, é jó yě nú azɔnhwi.

⁵¹ É hu nukɔngbéví e ɖo Ejípu lɛ́ɛ, nukɔngbéví e ɖo Cámu ví lɛ́ɛ sín tomɛ lɛ́ɛ, vǐ e è ji ɖo wǐnnyáwínnyá mɛ lɛ́ɛ.

⁵² É ɖe togun tɔn tɔ́n, bɔ é ɖidó lɛ̌ngbɔ́hwan ɖɔhun; é kplá yě gbɔn gbětótló mɛ lɛ̌ngbɔ́ ɖɔhun.

⁵³ É cyɔ́n alɔ yě jí, bɔ xɛsi ɖi yě ǎ; xu ka nyɛ sú kɛntɔ́ yětɔn lɛ́ɛ.

⁵⁴ É kplá togun tɔn ɖidó ayǐkúngban tɔn mímɛ́ ɔ́ jí, só e é fun ahwan bó yí é jí.

⁵⁵ É nya akɔta ɖě lɛ́ɛ sín ayǐkúngban énɛ́ ɔ́ jí; é má to ɔ́ dó así nú yě, bɔ é húzú yětɔn; é ɖó tɛnmɛ nú akɔta Izlayɛ́li ví lɛ́ɛ tɔn lɛ́ɛ ɖo Kanáanu lɛ́ɛ xwé gbe.

⁵⁶ Lo ɔ́, yě tɛ́n Mawu Ajalɔ̌nlɔn ɔ́ kpɔ́n, yě fɔ́n gǔ dó jǐ tɔn, yě sɔ́ nɔ́ nyi sɛ́n tɔn lɛ́ɛ ǎ.

⁵⁷ Yě sɛ yi zɔ nú Mawu, yě nɔ gbejí n'i ǎ tɔ́gbó yětɔn lɛ́ɛ ɖɔhun; yě zɛ ali gǎ e má jlɔ́ ǎ é ɖɔhun.

⁵⁸ Yě nɔ́ ɖo vodún xwé vodún xwé gbɔn wɛ, bó nɔ́ ɖo bǒcyɔ lɛ́ɛ sɛn wɛ; yě wa mɔ̌ bɔ xomɛ sin Mawu.

⁵⁹ Mawu mɔ mɔ̌ bó sin xomɛ ɖésú, Izlayɛ́li sín nǔ vɛ́ wǔ tɔn titewungbe.

⁶⁰ É jó nɔtɛn Silóo tɔn ɔ́ dó, goxɔ e mɛ é nɔ ɖo gbɛtɔ́ lɛ́ɛ tɛ́ntin é.

⁶¹ Akɔjijɛgbá e nyí hlɔ̌nhlɔ́n tɔn sín wuntun ɔ́, yě jó dó bɔ kɛntɔ́ lɛ́ɛ sɔ́yi. É jó susu tɔn dó nyi kɛntɔ́ lɛ́ɛ sín alɔ mɛ.

⁶² É sin xomɛ dó mɛ e nyí étɔn lɛ́ɛ, é jó togun tɔn dó nú kú.

⁶³ Myɔ fyɔ́ dɔ̌nkpɛvú lɛ́ɛ, ɖyɔ̌vǐ lɛ́ɛ sɔ́ mɔ asú ǎ.

⁶⁴ È hu vɔ̌sánú-xwlémawutɔ́ lɛ́ɛ, asúkúsi yětɔn lɛ́ɛ ka ya avǐ ǎ.

⁶⁵ Aklúnɔ fɔ́n mɛ e ɖo amlɔ dɔ́ wɛ é ɖɔhun, gbɛtɔ́ asúká e vɛ̌ɛn fɔ́n kanmɛ ná ɔ́ ɖɔhun.

⁶⁶ Alɔ tɔn jɛ kɛntɔ́ tɔn e ɖo hinhɔn wɛ lɛ́ɛ wú, é dó hɛ̌n mavɔ mavɔ ɖé yě.

⁶⁷ É gbɛ́ wǎn nú Jozɛ́fu ví lɛ́ɛ, é sɔ́ akɔta Eflayímu tɔn ɔ́ ǎ;

⁶⁸ lo ɔ́, é sɔ́ akɔta Judáa tɔn, Sinyɔ́ɔ e é yí wǎn ná é.

⁶⁹ Fínɛ́ wɛ Mawu gbá sinsɛnxɔ tɔn ɖó bɔ é ná sɛ tɛn ǎ jǐnukúnsin ɖɔhun; é ná sɛ tɛn ǎ ayǐkúngban e é dó do bɔ é ɖo mɔ̌ káká sɔ́yi é ɖɔhun.

⁷⁰ É sɔ́ mɛsɛntɔ́ tɔn Davídi ɖó vo; é ɖe e sín lɛ̌ngbɔ́kpó mɛ.

⁷¹ É zé e sín lɛ̌ngbɔ́ e ɖo anɔ̌ ná vǐ wɛ lɛ́ɛ gúdo, bónú é ná kplá togun tɔn Jakɔ́bu, Izlayɛ́li e nyí étɔn é.

⁷² Davídi nyí lɛ̌ngbɔ́nyitɔ́ ɖagbe nú yě, lɛ̌ngbɔ́nyitɔ́ e wú è ma nɔ mɔ nǔɖé ɖɔ dó ǎ é; é xlɛ́ ali yě kpó nǔnywɛ́lɔ kpó.