Ɖɛhan 77 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji dó Yedutún sín hangbe mɛ.

² Un ɖo xó sú ylɔ́ Mawu wɛ; un ɖo xó sú ylɔ́ Mawu wɛ bónú é ná ɖótó mì.

³ Adǎngbomɛ hwenu ɔ́, un nɔ ba Aklúnɔ. Zǎn mɛ ɔ́, un nɔ ɖo alɔ dlɛ́n sɛ́ dó e wɛ; alɔ nɔ kú mì ǎ. Un nɔ ɖ'é wú bó nɔ́ se gbɔ ǎ.

⁴ Un flín Mawu lě ɔ́, un nɔ wɛn azɔn; un ɖo tamɛ lin kpɔ́n wɛ ɔ́, awakanmɛ nɔ kú mì. Agbɔ̌n

⁵ Mawu, a ɖǒ mì wunzɛn; ayi ce gbadó bɔ un ka sɔ́ ɖɔ xó ɖé ǎ.

⁶ Un nɔ ɖo tamɛ lin dó azǎn e kó jɛ wá yi lɛ́ɛ wú wɛ, bó nɔ́ ɖo tamɛ lin dó xwe e ko jɛ wá yi lɛ́ɛ wú wɛ.

⁷ Zǎn mɛ ɔ́, un nɔ ɖo han e un nɔ ji é flín wɛ, un nɔ ɖo tamɛ lin kpɔ́n wɛ, ayi ce nɔ ɖo nǔ ba wɛ:

⁸ Aklúnɔ ka jló ná jó mǐ dó káká sɔ́yi wɛ a? É sɔ́ ná nyi kɔ kpɔ́n mǐ gbeɖé ǎ cé?

⁹ Xomɛnyínyɔ́ tɔn kó vɔ bǐ sésé jɛ́n nɛ́ ǎ? Xó e é nɔ́ ɖɔ nú mǐ ɔ́, é sɔ́ ná ɖɔ ɖě gbeɖé ǎ cé?

¹⁰ Mawu sɔ́ flín ɖɔ émí nɔ́ wa fɛ́nú nú mǐ ǎ cé? É sin xomɛ ɔ́, é sɔ́ ná kú nǔbláwǔ nú mǐ ǎ wɛ a? Agbɔ̌n

¹¹ Un nɔ́ ɖɔ: “Nǔ e ɖo vǐvɛ́ nú mì wɛ ɔ́ wɛ nyí ɖɔ Mawu Ajalɔ̌nlɔn ɔ́ sɔ́ wa nǔ ɖ'ayǐ tɔn ɖɔhun ǎ.”

¹² Mawu Mavɔmavɔ, un ná nɔ́ flín azɔ̌ e a nɔ wa lɛ́ɛ, ɖo tají ɔ́, un nɔ flín nǔjíwǔ e a blǒ ɖ'ayǐ xóxó lɛ́ɛ.

¹³ Un ná lin tamɛ dó nǔ e a blǒ lɛ́ɛ wú, un ná lin tamɛ dó azɔ̌ ɖaxó ɖaxó e a wa lɛ́ɛ wú.

¹⁴ Mawu ce, nǔ e a wa e bǐ wɛ nyí nǔ mímɛ́; nǔmɛsɛn tɛ́ ka kló hwi Mawu ɔ́ ɖɔhun?

¹⁵ Hwi Mawu ɔ́, hwi ɖokpónɔ géé wɛ nɔ́ wa nǔjíwǔ; a ɖe hlɔ̌nhlɔ́n towe xlɛ́ ɖo togun lɛ́ɛ tɛ́ntin.

¹⁶ A zě hlɔ̌nhlɔ́n towe dó hwlɛ́n togun towe gán, togun towe Jakɔ́bu kpó Jozɛ́fu kpó sín vǐ lɛ́ɛ gán. Agbɔ̌n

¹⁷ Mawu ce, tɔ lɛ́ɛ mɔ we; ée yě mɔ we lě ɔ́, sin e ɖo tɔ lɛ́ɛ mɛ é jɛ agbǎn hun jí; nǔgbó wɛ, domaɖó-azan lɛ́ɛ jɛ ɖoɖo.

¹⁸ Sin e ɖo akpɔ́kpɔ́ lɛ́ɛ mɛ é bǐ kɔn nyi ayǐ; jǐ ɖo gbe dó wɛ ɖo akpɔ́kpɔ́ mɛ, bɔ gǎ towe lɛ́ɛ gbɔn ɖisí amyɔ;

¹⁹ jǐ towe ɖo gbe dó wɛ ɔ́, é nɔ́ lɛ́ ɖo wun kɛ wɛ; é nɔ́ kɛ wun gbɔn aɖisí amyɔ, bɔ gbɛ ɔ́ mɛ bǐ nɔ́ za wě; ayǐkúngban ɔ́ dán wǔ bó sísɔ́.

²⁰ A ɖe ali gbɔn xu mɛ, a ɖe ali gbɔn sin ɖaxó ɖaxó lɛ́ɛ mɛ; mɛ ɖěbǔ ká mɔ afɔdo towe lɛ́ɛ ǎ.

²¹ A xlɛ́ ali togun towe lɛ̌ngbɔ́ ɖɔhun gbɔn Mɔyízi kpó Aalɔ́ɔn kpó jí.