Ɖɛhan 76 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji bó nɔ́ xo kanhún d'é mɛ.

² Mawu ɖe éɖée xlɛ́ ɖo Judáa; nyǐkɔ tɔn yi jǐ tawun ɖo Izlayɛ́li.

³ Salɛ́mu wɛ goxɔ tɔn ɖe, nɔtɛn tɔn ɖo Sinyɔ́ɔ.

⁴ Fínɛ́ wɛ é hɛn ahwanlyánnú lɛ́ɛ wɛ́n ɖe: é hɛn gǎ wɛ́n, é hɛn gǎglónú wɛ́n, bó hɛn hwǐ wɛ́n. Agbɔ̌n

⁵ Mawu ce, hwi ɖésúnɔ bǐ wɛ nɔ́ kɔ́n! A jǐ wǔ hú só jɔwámɔ lɛ́ɛ.

⁶ Ahwanfuntɔ́ e syɛ́n sɔ mɔ̌ lɛ́ɛ, yě ɖíe wá ba nǔ bǐ kpo e; din ɔ́, yě dɔ́ amlɔ dɔ̌mányí; yě kpé wú bó gán ɖo ahwan ɔ́ mɛ ǎ.

⁷ Mawu Jakɔ́bu tɔn, ée a kɛ nu kpowun é ɔ́, sɔ́ kpó sɔ́xátɔ́ kpó bǐ yi maɖɔnǔxwɛ.

⁸ Nǔgbó ɔ́, hwi Mawu ɔ́, a dǒ xɛsi; nú a sin xomɛ ɔ́, mɛ̌ ká sixú nɔ te ɖo nukɔn towe?

⁹ A nɔ jǐxwé dɔ̌n bó gbo hwɛ sɛ́ dó, a gbo hwɛ bɔ mɛɖé sɔ́ sixú dó fɛn kpá ǎ, ɖó ayǐkúngban ɔ́ bǐ wɛ ɖo xɛsi jí

¹⁰ hwenu e a sí te bo ná ɖɔ hwɛjijɔ é, hwenu e a sí te bó ná hwlɛ́n mɛ e è dǒ winnyá lɛ́ɛ gán é. Agbɔ̌n

¹¹ Adǎn e jí gbɛtɔ́ lɛ́ɛ ɖe é ɖésú ɖo susu kpa nú we wɛ, bɔ mɛ e ná gán ɖo adǎn énɛ́ mɛ lɛ́ɛ ná nyí jɛ̌gbákún bó nɔ ta nú we.

¹² Mi dó akpá nú Mawu Mavɔmavɔ, Mawu mitɔn. Mi dó, bó ɖe. Mɛ e lɛ́ dó e lɛ́ɛ bǐ ní hɛn nǔ wá n'i; yě bǐ ní hɛn nǔ wá nú Mawu e dó xɛsi é.

¹³ Gǎn e ɖo go yí wɛ lɛ́ɛ ɔ́, Mawu nɔ́ gba wigo yětɔn dó; Mawu dó xɛsi ɖo axɔ́sú gbɛmɛ fí tɔn lɛ́ɛ nukún mɛ.