Ɖɛhan 75 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ.

² Mawu, mǐ ɖo kpikpa we wɛ, Mawu, mǐ ɖo kpikpa we wɛ, mǐ ɖo mɛ e a nyǐ é ɖɔ wɛ. Mǐ ɖo nǔ ɖaxó ɖaxó e a blǒ lɛ́ɛ jlá wɛ.

³ Hwenu e un ɖó ɔ́ su ɔ́, un ná nɔ́ ɖɔ hwɛjijɔ.

⁴ Ayǐkúngban kpó nǔ e ɖ'é ji lɛ́ɛ bǐ kpó ɖo wǔ dán wɛ. Lo ɔ́, nyɛ wɛ hɛn dotín e jí é jínjɔ́n é ɖó te. Agbɔ̌n

⁵ “Un nɔ ɖɔ nú mɛ e nɔ ɖo yěɖée sɔ́ su wɛ lɛ́ɛ ɖɔ: Mi ma nɔ sɔ́ miɖée su ó.” Bó nɔ́ ɖɔ nú mɛdídá lɛ́ɛ ɖɔ: “Mi ma nɔ zé miɖée d'aga ó.

⁶ Mi ma nɔ sɔ́ miɖée d'aga sɔ mɔ̌ ó. Mi ma sɔ́ nɔ́ ɖɔ alǎkalí ɖě ó.

⁷ Mi tunwun ɖɔ susu Mawu tɔn kún nɔ́ gosín zǎnzǎnhwe jí ó, é ka gosín gbadahwe jí ǎ, é ka gosín gbětótló mɛ ǎ.

⁸ Lo ɔ́, Mawu wɛ nyí mɛ e nɔ ɖɔ hwɛ é: É nɔ́ sɔ́ mɛ ɖě hwe, bó ká nɔ́ sɔ́ mɛ ɖě su.”

⁹ Mawu Mavɔmavɔ hɛn kɔ́fu ɖé alɔ mɛ, bɔ vɛ̌ɛn gɔ́ bó ɖo syɛ́nsyɛ́n wɛ; vɛ̌ɛn xo kplé wɛ. É húzú kɔ́fu ɔ́, bɔ mɛdídá e ɖo gbɛ ɔ́ mɛ lɛ́ɛ bǐ nɔ́ ɖo xwíxwí wɛ. Yě ɖo nunu wɛ; yě nu káká yi azan jí.

¹⁰ Nyɛ ɔ́, un ná nɔ́ ɖo Mawu Jakɔ́bu tɔn xó ɖɔ wɛ káká sɔ́yi káká sá. Un ná nɔ́ ɖɔ xó lómílómí dó han mɛ dó mlá nyǐkɔ tɔn.

¹¹ Un ná dɔn mɛdídá lɛ́ɛ sín kɔ dó do, bó ná zé hwɛjijɔnɔ lɛ́ɛ sín kɔ d'aga.