Ɖɛhan 73 - MAWUXÓWÉMA

WĚMA ATƆNGƆ́ Ɔ́ ( Ɖɛhan 73—89 ) Nǔ nyɔ̌ nú mɛdídá zǎnzǎn nɔ́ nyɔ́ gbada ǎ

¹ Asáfu sín han. Mawu nyɔ́ nú Izlayɛ́li nǔgbó, é nyɔ́ nú mɛ e ɖó ayi mímɛ́ lɛ́ɛ bǐ.

² Nyɛ ɔ́, un ko ɖibla ɖe afɔ nyi do. Kpɛví títí ɖé wɛ kpo bɔ un ná ɖíɖí nǔ.

³ Đó un mɔ nǔ ɖo nyǐnyɔ́ nú mɛ e nɔ yí go lɛ́ɛ wɛ, gbɛtɔ́ e má ɖó nǔnywɛ́ lɛ́ɛ wɛ, bɔ nǔ yětɔn su nukún ce mɛ.

⁴ Nǔɖé nɔ́ hwedó yě cóbónú yě nɔ́ kú ǎ. Yě bǐ wɛ kló bó ɖíɖí wǔ.

⁵ Wǔvɛ́ e gbɛtɔ́ nɔ́ mɔ ɖo gbɛmɛ ɔ́, yě nɔ́ mɔ ɖě ǎ; adǎn e nɔ́ gbo gbɛtɔ́ ɔ́, ɖě nɔ́ gbo yě ǎ.

⁶ Énɛ́ ɔ́, yě nɔ́ zé goyíyí dó kɔjɛ́ ɖɔhun. Dǎka xixo nyí avɔ bɔ yě nɔ́ cyɔ́n.

⁷ Nukún mɛ yětɔn bǐ wɛ dó jǒ, bɔ nukún yětɔn nɔ́ ɖo zo da ɖ'é mɛ wɛ. Ayi nyanya wɛ gɔ́ xo yětɔn mɛ bó túnflá.

⁸ Yě nɔ́ ɖo mɛ cá ko wɛ, bó nɔ́ ɖo nu vawun vawun kɛ wɛ; yě nɔ́ ɖo lě e yě ná táfú mɛ gbɔn é ɖɔ wɛ gannaganna; yě nɔ́ jí nǔɖé ǎ.

⁹ Yě nɔ́ ɖo nu gblogblo kɛ wɛ káká bó nɔ́ ɖɔ nǔ nyi do nú Mawu; yě nɔ́ gɔn nǔ mɔ ɖɔ dó mɛ e ɖo ayǐkúngban jí lɛ́ɛ ɖě wú ǎ.

¹⁰ Énɛ́ ɔ́ wú wɛ togun ɔ́ bǐ nɔ́ ɖo wezun nu ɖo gǔdo yětɔn, bó nɔ́ nu xó yětɔn sin ɖɔhun,

¹¹ bó nɔ́ ɖɔ: “Mawu tunwun nǔɖé a! É mɛ e ɖo jǐ aga dɔ̌n é, nɛ̌ é ká sixú mɔ do nú nǔɖé gbɔn?”

¹² Lě e mɛdídá lɛ́ɛ ɖe gbɔn é ɖíe: yě nɔ́ ɖo vivo mɛ tɛgbɛ, bó nɔ́ ɖo dɔkun jɛ dó dɔkun jí wɛ.

¹³ Hǔn ayi ce e un lɛ bɔ é mɛ́, bɔ un ma lɔn bó ɖó alɔ ɖo nǔ nyanya ɖé mɛ ǎ ɔ́, nǔ yǎyá wɛ é nyí nɛ́ hǔn!

¹⁴ Ayǐ hɔ́n tɛgbɛ ɔ́, è nɔ ɖo xixo mì wɛ. Zǎnzǎn tɛgbɛ ɔ́, è nɔ dó ya nú agbaza ce.

¹⁵ Nú un ka ɖɔ un ná ɖɔ xó yě ɖɔhun ɔ́, un ná sa vǐ towe lɛ́ɛ.

¹⁶ Un gbɔ bo lin tamɛ d'é wú, bó ná mɔ nukúnnú jɛ mɛ; é ká vɛ́ wǔ dín ɖo nukún ce mɛ.

¹⁷ Gbe e gbe un byɔ́ tɛn mímɛ́ towe mɛ ɔ́, gbe énɛ́ gbe jɛ́n un wá mɔ nukúnnú jɛ nǔ e ɖo te kpɔ́n mɛdídá lɛ́ɛ é wú.

¹⁸ È nǎ ɖɔ xó nǔgbó ɔ́, ali e ɖíɖí é jí wɛ a nɔ sɔ́ yě ɖó, bó nɔ́ kpíkpé yě dó hɔzɔ mɛ.

¹⁹ Étɛ́! Nukikɛ ɖokpó kpowun ɔ́, è ba yě kpo, yě ɖě sɔ́ tíin ǎ, xɛsi ɖaxó ɖé fó xó yětɔn.

²⁰ Aklúnɔ, a sí te dó yě jí ɔ́, yě nɔ́ bú bléwún; yě nɔ́ bú bléwún mɛ ɖo nǔɖé mɔ ɖo dlɔ̌ mɛ wɛ bó nyí fɔ́n bó ba kpo ɖɔhun.

²¹ Hwenu e un ɖo xomɛ sin jí ɔ́, hwenu e é vɛ́ nú mì káká bó vɛ́ nú sɛ́ ce ɔ́,

²² a ɖo xlonɔ ce kpɔ́n wɛ, a ɖo mɛ ma ɖó nǔnywɛ́ ce kpɔ́n wɛ, bɔ un cí gbɔ̌ ɖɔhun ɖo nukɔn towe.

²³ É ká ɖo mɔ̌ có un ɖo gɔ̌n towe tɛgbɛ; a hɛn mì; ɖisí lɔ ce ɖo alɔ towe mɛ.

²⁴ Nǔ e a nɔ kplɔ́n mì lɛ́ɛ nɔ́ xlɛ́ ali mì; a nɔ bló mɔ̌, bó ná yí mì dó susu towe mɛ.

²⁵ Mɛ̌ un ka ɖó ɖo jǐnukúnsin zɛ hwɛ wú? Hwi mɛ vo ɔ́, gbɛ víví ɖé ɖo ayǐkúngban jí fí nú nyɛ ǎ.

²⁶ Agbaza ce kpó ayi ce kpó sixú wá ba hlɔ̌nhlɔ́n kpo; amɔ̌, hwi Mawu wɛ ná nyí sósyɛ́n ce, bó ná nyí nyɔ̌ná nyi ɖokpónɔ géé tɔn káká sɔ́yi.

²⁷ Éɖíe! Mɛ e nɔ́ nɔ zɔ nú we lɛ́ɛ ɔ́, dɔn wɛ yě nɔ́ dɔn. Mɛ e ma nɔ nɔ gbejí nú we ǎ lɛ́ɛ ɔ́, a nɔ sɛ́ yě dó maɖɔnǔxwɛ.

²⁸ Nyɛ ɔ́, Mawu kpá ninɔ wɛ nyí ɖagbe nú nyɛ. Aklúnɔ Mawu Mavɔmavɔ, hwi wɛ un dó ɖó bibɛtɛn, bó ná mɔ tɛn dó ɖɔ nǔ e a wa lɛ́ɛ bǐ.