Ɖɛhan 72 - MAWUXÓWÉMA

¹ Salomɔ́ɔ sín han. Mawu ce, nǎ nǔnywɛ́ axɔ́sú ɔ́, bónú é ná nɔ́ ɖɔ hwɛ hwi ɖɔhun. Blǒ bónú axɔ́sú mǐtɔn ní nɔ́ ɖɔ hwɛ nú é nɔ́ sɔgbe hwi ɖɔhun.

² É ní nɔ́ xwedó hwɛjijɔ dó ɖɔ hwɛ xá togun towe, é ní nɔ́ ɖɔ hwɛ xá lelenɔ towe lɛ́ɛ dó jlɔ̌jlɔ́ jí.

³ Só ɖaxó ɖaxó lɛ́ɛ ní nɔ́ hɛn fífá wá nú togun ɔ́, só kpɛví kpɛví lɛ́ɛ lɔmɔ̌ ní nɔ́ hɛn hwɛjijɔ wá n'i.

⁴ Wamamɔnɔ e ɖo togun ɔ́ mɛ lɛ́ɛ ɖě sín hwɛ jɔ hǔn, axɔ́sú ɔ́ ní nɔ́ ɖɔ hwɛ tɔn jɔ. É ní nɔ́ nya xɛ ɖo mɛ ma ɖó mɛ ɖé lɛ́ɛ jí, bó ka nɔ́ li mɛ e ɖo ya dó nú yě wɛ lɛ́ɛ.

⁵ Axɔ́sú ɔ́ ní nɔ gbɛ káká sɔ́yi sun kpó hwe kpó ɖɔhun.

⁶ É ní cí jǐ e ɖo jija dó gle mɛ wɛ é ɖɔhun. É ní cí jǐ ɖaxó e nɔ ja bɔ ayǐkúngban nɔ fá é ɖɔhun.

⁷ Hwɛjijɔ ní gba kpé axɔ́sú ɔ́ hwenu, bɔ nú sun vɛ́ kó nɔ́ tɔ́n ɔ́, vivo ní tíin ɖo to ɔ́ mɛ.

⁸ É ní kpa acɛ sín xu ɖě tó káká yi xu ɖě tó, é ní kpa acɛ sín Nilu tɔ ɔ́ tó, káká yi fí e ayǐkúngban ɔ́ kponu ɖó é.

⁹ Mɛ e ɖo gbětótló mɛ lɛ́ɛ ná jɛ kpo ɖo nukɔn tɔn, bɔ kɛntɔ́ tɔn lɛ́ɛ ná dó nu do n'i;

¹⁰ Taasísi xɔ́sú lɛ́ɛ kpódó tɔtɛ́ntinto lɛ́ɛ sín axɔ́sú lɛ́ɛ kpó ná nɔ́ hɛn nǔjɔ wá n'i, Saba xɔ́sú lɛ́ɛ kpódó Seva xɔ́sú lɛ́ɛ kpó ná hɛn nǔ wá ná ɛ.

¹¹ Axɔ́sú lɛ́ɛ bǐ ná jɛ kpo bo ɖe kɔ́ n'i. Akɔta lɛ́ɛ bǐ ná nyí mɛsɛntɔ́ tɔn.

¹² É ná hwlɛ́n wamamɔnɔ e ɖo xó sú wɛ ɔ́, bó ná hwlɛ́n lelenɔ e ma ɖó ɖɔxátɔ́ ɖě ǎ é.

¹³ É ná kú nǔbláwǔ nú mɛ e ma ɖó hlɔ̌nhlɔ́n ɖé ǎ lɛ́ɛ kpó gbɛ̌dónánɔ lɛ́ɛ kpó; é ná hwlɛ́n wamamɔnɔ lɛ́ɛ sín gbɛ gán.

¹⁴ É ná yí yě sín mɛ e nɔ kpa acɛ gannaganna lɛ́ɛ kpó dǎkaxotɔ́ lɛ́ɛ kpó sí, ɖó gbɛ yětɔn xɔ akwɛ́ ɖo nukún tɔn mɛ.

¹⁵ Axɔ́sú ɔ́ ní dɔ́ ji, afɔfún hwa alɔfún hwa; è nǐ nɔ́ hɛn siká sín Saba wá n'i. È nǐ nɔ́ xo ɖɛ n'i hwebǐnu; Mawu nǐ xo ɖɛ dó jǐ tɔn hwebǐnu.

¹⁶ Ji ní jɛ ɖo to ɔ́ mɛ káká bó túnflá. Atínsínsɛ́n ní blá ta nú só lɛ́ɛ Libáan só lɛ́ɛ ɖɔhun. Gbɛtɔ́ ní ji gba gbɔn toxo lɛ́ɛ mɛ; gbɛtɔ́ ní kpé fí bǐ gběhan ɖɔhun.

¹⁷ Nyǐkɔ tɔn ní ɖo te káká sɔ́yi. Nú hwe nɔ tɔ́n jɛ́n wɛ ɔ́, nyǐkɔ tɔn ní ɖo te. È nǐ kpɔ́n lě e nǔ nyɔ́ n'i gbɔn ɔ́ dó xo nyɔ̌ná ɖɛ nú mɛɖée, akɔta lɛ́ɛ bǐ ní nɔ́ ɖɔ nǔ nyɔ̌ n'i.

¹⁸ Jɛlijɛli nú Mawu Mavɔmavɔ, Mawu Izlayɛ́li tɔn. É ɖokpónɔ jɛ́n nɔ́ wa nǔjíwǔ lɛ́ɛ.

¹⁹ Jɛlijɛli nú nyǐkɔ tɔn káká sɔ́yi. Susu tɔn ní gba kpé ayǐkúngban ɔ́ bǐ jí. Amǐ! Amǐ!

²⁰ Davídi, Jɛsée ví ɔ́ sín ɖɛxixo lɛ́ɛ fó ɖó fí.