Ɖɛhan 7 - MAWUXÓWÉMA

Mawu Mavɔmavɔ, ɖe hwɛn mì

¹ Gbɛvíhan Davídi tɔn. É ji gbɛvíhan élɔ́ nú Mawu Mavɔmavɔ ɖó nǔ e Kúci Bɛnjamɛ́ɛ ví ɔ́ ɖɔ ɔ́ wú.

² Mawu Mavɔmavɔ, Mawu ce, hwi wɛ un nɔ hɔn wá su. Hwlɛ̌n mì gán ɖo mɛ e ɖo ya dó nú mì wɛ lɛ́ɛ bǐ sí; xɔ mì ɖo yě sí.

³ É má nyí mɔ̌ ǎ ɔ́, yě ná wlí mì ɖu kinnikínní ɖɔhun; yě ná vúnvún mì; mɛ ɖé ná sixú yí mì sín yě sí ǎ.

⁴ Mawu Mavɔmavɔ, Mawu ce, ényí nǔ e yě vɛdó mì ɔ́ nyí nǔgbó hǔn, ényí un ɖó alɔ ɖo nǔ nyanya ɖé mɛ hǔn,

⁵ ényí un wa nyanya nú mɛ e kpó nyɛ kpó ɖo ganjí ɔ́ hǔn, ényí kɛntɔ́ ce ma wa nǔɖé nyi do nú mì ǎ, bónú un vɔ ɛ hǔn,

⁶ kɛntɔ́ ní jɛ gǔdo ce, bó kpé wǔ ce, ní zin mì d'ayǐ, bó gbídí mì gbɛɖe gbɛɖe, bónú wi ce ní kɔ́n. Agbɔ̌n

⁷ Mawu Mavɔmavɔ, sin xomɛ bo sí te, sí te dó adǎn e wa wɛ kɛntɔ́ ce lɛ́ɛ ɖe ɔ́ jí. Kpɔ́n jǐ ce, hwi wɛ nɔ ɖɔ mɛ e nyɔ́ hwɛ é.

⁸ Togun lɛ́ɛ bǐ ní kplé lɛ́ lɛ̌ dó we; ɖu axɔ́sú ɖo yě nu sín jǐ aga dɔ̌n.

⁹ Mawu Mavɔmavɔ, hwi wɛ nɔ ɖɔ hwɛ xá togun lɛ́ɛ, Mawu Mavɔmavɔ, ɖe xlɛ́ ɖɔ hwɛ ce jɔ, ɖó nǔ jlɔ́jlɔ́ wɛ un wa, xomɛvɔ́nɔ wɛ un nyí.

¹⁰ Mawu hwɛjijɔnɔ! Hwi wɛ nɔ mɔ nǔ jɛ gbɛtɔ́ xo mɛ, hwi wɛ nɔ́ mɔ nǔ jɛ gbɛtɔ́ sín ayi mɛ. Đǒ dǎka e xo wɛ mɛdídá ɖe ɔ́ te, bó ká dó wǔsyɛ́n lanmɛ nú hwɛjijɔnɔ.

¹¹ Mawu wɛ nyí gǎglónú ce; é wɛ nɔ́ hwlɛ́n ayijlɔ́jlɔ́nɔ lɛ́ɛ gán.

¹² Mawu wɛ nyí hwɛjlɔ́jlɔ́ɖɔtɔ́; Mawu xomɛsinnɔ wɛ é nyí tɛgbɛ.

¹³ Ényí mɛdídá má húzú jijɔ ǎ ɔ́, é nɔ́ gan hwǐ tɔn, é nɔ́ tlɔ́ gǎ tɔn bó nɔ ɖo acéjí.

¹⁴ Lo ɔ́, éɖée wɛ é fɔ mɛhulínnyánú énɛ́ lɛ́ɛ ɖ'ayǐ ná, éɖée wɛ é tlɔ́ gǎ ɖ'ayǐ ná, gǎ e nɔ́ dó nǔ zo é ɖ'ayǐ ná.

¹⁵ Kpɔ́n! Mɛdídá jɛ flú mɛ, bó ɖo nǔ nyanya ná ji wɛ. É mɔ dǎnúwiwa xo, bó ji adingban.

¹⁶ É sín do, é kun do gɔ́ngɔ́n ɖé, é ɖésúnɔ wɛ ka wá jɛ mɛ.

¹⁷ É mɛ e nyi kpo ɔ́ ta wɛ kpo ɔ́ lɛ́ wá jɛ. Gɛ̌ e é ɖó ɔ́ jɛ́n lɛ́ wá fɛ́ gba ta ɛ.

¹⁸ Un ná kpa Mawu Mavɔmavɔ ɖó hwɛjijɔ tɔn wú. Ajalɔ̌nlɔn e! Un ná nɔ́ ɖɔ xó lómílómí dó mlá nyǐkɔ towe dó han mɛ.