Ɖɛhan 69 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. È nɔ ji dó han e è nɔ ylɔ́ ɖɔ “Folówa ɖagbe ɖagbe” ɔ́ sín hangbe mɛ.

² Mawu ce, hwlɛ̌n mì gán, ɖó un ɖo tɔ ná kú wɛ; sin ko fán mì dó kɔ.

³ Un ɖo bɔ̌ yi wɛ, bɔ nǔ e wú un nǎ gán dó é ɖe ǎ. Nyi ɖíe wá ɖo tɔzan jí e, tɔ ɖi bú mì bǐ sésé.

⁴ Un sú xó káká bɔ nǔ cikɔ nú mì, vɛ̌go ce bǐ wɛ xú. Un ɖó nukún Mawu káká bɔ nukún ce bo.

⁵ Mɛ e nɔ yǎyá bó gbɛ́ wǎn nú mì lɛ́ɛ ɔ́, yě sukpɔ́ hú ɖa e ɖo ta ce é. Yě mɛ e jló ná sɛ́ mì dó maɖɔnǔxwɛ lɛ́ɛ ɔ́, yě syɛ́n hú mì ɖésú. Un ma ka wa nǔɖé nú yě nɛ́! Yě ká nɔ mɔ̌ kpowun bo dó kɛn mì. Maɖumaɖuxɔ́ tɛ́ ɖíe ná sú wɛ un ka ɖe e!

⁶ Mawu ce, taɖunɔnú e un wa lɛ́ɛ ɔ́, a tunwun bǐ. Nǔ e un wa nyi do lɛ́ɛ ɔ́, a dǎn yě ǎ.

⁷ Aklúnɔ, Mawu Mavɔmavɔ Nǔbǐwúkpétɔ́, ma jó mì dó nú un dó winnyá mɛ e ɖi nǔ nú we lɛ́ɛ ó, ma ka lɔn nú mɛ e nɔ sɛn we lɛ́ɛ bú ali ɖó nyɛ wú ó mɛ, Mawu Izlayɛ́li tɔn!

⁸ Đó hwi wú wɛ è ɖo cí kɔn dó kɔ nú mì wɛ, hwi wú wɛ è ɖo winnyá dó mì wɛ.

⁹ Un húzú jǒnɔ nú nɔví ce lɛ́ɛ, un húzú mɛ ɖěvo nú nɔ ce xomɛ ví lɛ́ɛ,

¹⁰ ɖó wǎn yíyí e un ɖó nú xwé towe ɔ́, wǎn yíyí ma ɖó jlɛ̌ ɖé wɛ, bó nɔ́ sɔ́ akpakpa mì, bɔ zun e nyí zun towe ɔ́, nyɛ wɛ yí bǐ.

¹¹ Un nɔ ɖo avǐ ya wɛ, bó nɔ́ ɖo nu blá wɛ, bɔ é lɛ́ húzú zun nú mì.

¹² Un sɔ́ caki dó, bó húzú slǎmɛɖɔnú yětɔn.

¹³ Mɛ e jínjɔ́n acakpo jí ɖo to ɔ́ sín hɔnto lɛ́ɛ nɔ́ ɖo xó ce ɖɔ wɛ, bɔ un nyí han bó ɖo nu nú ahannumúnɔ lɛ́ɛ.

¹⁴ Amɔ̌, nyɛ ɔ́, un ɖo vo sa nú we wɛ; Mawu Mavɔmavɔ, hwenu e a nǎ yí vosisa ce dó ɔ́ su. Mawu ce, xomɛnyínyɔ́ towe d'agba, un ɖeji ɖɔ a nǎ hwlɛ́n mì gán; hǔn bo yí ɖɛ ce.

¹⁵ Dɔn mì sín bɔ̌ mɛ, bónú un ma sɔ́ yi ɖě ó. Hwlɛ̌n mì ɖo kɛntɔ́ ce lɛ́ɛ sí, ɖe mì sín tɔzan jí.

¹⁶ Tɔ ma sɔ́ xo wá gba mì ɖě ó, do gɔngɔn ɔ́ ní ma bú mì ó, dotɔ ní ma sú dó mì ó.

¹⁷ Mawu Mavɔmavɔ, yǐ ɖɛ ce, ɖó a nyɔ̌ bó nɔ́ wa ɖagbe. Lɛ̌ kɔ kpɔ́n mì ɖó nǔbláwǔkúnúmɛ towe ɖaxó ɔ́ wú.

¹⁸ Ma ɖe kɔ dó nyɛ mɛsɛntɔ́ towe ɔ́ ó, adǎn ɖo gbigbo mì wɛ, yǎ wǔ yí ɖɛ ce.

¹⁹ Sɛkpɔ́ mì bó hwlɛ́n mì, hwlɛ̌n mì gán, ɖó kɛntɔ́ ce lɛ́ɛ wú.

²⁰ A tunwun cí e è kɔn dó kɔ nú mì é, a tunwun winnyá e un ɖu é, bó tunwun lě e wi ce kɔ́n gbɔn é, a mɔ nǔ jɛ kɛntɔ́ ce lɛ́ɛ bǐ wú.

²¹ Cí e è kɔn dó kɔ nú mì ɔ́ gba hǔn dó nú mì, bɔ un ɖo azɔn jɛ wɛ. Un ɖo te kpɔ́n mɛ e ná kú nǔbláwǔ nú mì é, un ka mɔ mɛɖé ǎ. Un ɖo te kpɔ́n mɛ e ná dó gbɔ nú mì é, un ka mɔ mɛ ɖěbǔ ǎ.

²² Yě dó nǔ nǔɖuɖu mɛ nú mì. Sinnugblá sin mì bɔ yě ná vɛ̌ɛn sinvɛ́sinvɛ́ mì.

²³ Nǔɖuɖu ɖagbe ɖagbe e yě ɖa ɔ́ ní nyí mɔ nú yě kpó jǒnɔ yětɔn lɛ́ɛ kpó.

²⁴ Nukún mɛ yětɔn ní gbá zǐn, bónú yě ní ba nukúnnú kpo. Hɛn alin yětɔn lɔ́ nú yě ní nɔ́ zɔn tɔ́tɔ́.

²⁵ Kɔn xomɛsin towe dó yě jí, xomɛ ɖaxó e a sin dó yě ɔ́ ní hun káká yi yě gɔ̌n.

²⁶ Asangokan ní blá xwé yětɔn, é ní má sɔ́ kpo mɛɖé ɖo goxɔ yětɔn lɛ́ɛ mɛ ó.

²⁷ Đó yě lɛ̌ bɔ ɖó nú mɛ e hwi ɖésúnɔ kó dɔn tó ná yi ɖó tɛn tɔn mɛ é. Wǔvɛ́ e mɔ wɛ mɛ e wú alɔ towe ko jɛ lɛ́ɛ ɖe é wɛ nyí han bó ɖo nu yětɔn.

²⁸ Sɔ́ hwɛ énɛ́ dó hwɛ e yě kó hu ɖ'ayǐ lɛ́ɛ jí, ma sɔ́ kɛ yě gbeɖé ó.

²⁹ Súnsún nyǐkɔ yětɔn sín gbɛwéma ɔ́ mɛ; ma lɛ́n yě dó hwɛjijɔnɔ lɛ́ɛ mɛ ó.

³⁰ Nyɛ ɔ́, wamamɔnɔ wɛ un nyí, bó ɖo wǔvɛ́ mɔ wɛ. Mawu ce, hwlɛngán towe ní nya xɛ ɖo jǐ ce.

³¹ Un ná mlá Mawu nyíkɔ dó han mɛ, un ná ji han dó kpa susu n'i.

³² Énɛ́ ɔ́ nɔ́ nyɔ́ Mawu Mavɔmavɔ nukún mɛ hú nyibú dó sá vɔ̌ n'i, nyibúsú zo jangan jangan, afɔ kpanwunkpanwun dó sá vɔ̌ n'i.

³³ Mɛ e nɔ sɔ́ yěɖée hwe lɛ́ɛ ná mɔ lě e Mawu Mavɔmavɔ hwlɛ́n mì gbɔn é bó ná j'awǎ. Mi mɛ e ɖo Mawu ba wɛ lɛ́ɛ ɔ́, è nǎ dó wǔsyɛ́n lanmɛ nú mi,

³⁴ ɖó Mawu Mavɔmavɔ nɔ ɖótó wamamɔnɔ lɛ́ɛ. É nɔ́ dó vɛ̌ nú mɛ tɔn e ɖo ganxó lɛ́ɛ é ǎ.

³⁵ Sɛ́xwé kpó ayǐkúngban kpó ní mlá Mawu Mavɔmavɔ. Xu lɛ́ɛ ní mlá Mawu Mavɔmavɔ. Nǔ e kó nɔ́ dán wǔ ɖo xu mɛ lɛ́ɛ bǐ ní mlá ɛ.

³⁶ Đó Mawu ná hwlɛ́n Sinyɔ́ɔ gán; é ná vɔ́ Judáa sín toxo ɖaxó ɖaxó lɛ́ɛ bló ɖó. Gbɛtɔ́ ná lɛ́ nɔ fí énɛ́ lɛ́ɛ bɔ é ná nyí yětɔn.

³⁷ Sinyɔ́ɔ ná nyí mɛ e nɔ sɛn Mawu lɛ́ɛ sín vǐ lɛ́ɛ tɔn, mɛ e yí wǎn n'i lɛ́ɛ ná nɔ nɔ fínɛ́.