Ɖɛhan 68 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Mawu nɔ sí te bɔ kɛntɔ́ tɔn lɛ́ɛ nɔ kɛn; mɛ e gbɛ́ wǎn n'i lɛ́ɛ nɔ hɔn ɖo nukɔn tɔn.

³ Lě e azizɔ nɔ kɛn gbɔn ɖo jɔhɔn mɛ ɔ́, mɔ̌ wɛ yě nɔ́ kɛn gbɔn ɖo nukɔn tɔn. Lě e aɖuwa nɔ sínsín gbɔn ɖo myɔ nu ɔ́, mɔ̌ wɛ mɛdídá lɛ́ɛ nɔ sínsín gbɔn ɖo nukɔn tɔn.

⁴ Lo ɔ́, mɛ e nɔ wa nǔ ɖó sɛ́nxwi jí lɛ́ɛ nɔ ɖo xomɛhunhun jí ɖo nukɔn tɔn; yě nɔ́ j'awǎ káká, yě nɔ́ j'awǎ bɔ é nɔ́ vɛ́ jlɛ́, yě nɔ́ ɖo xomɛ hun mɛ wá ɖó wɛ.

⁵ Mi ji han mlá Mawu, mi ɖɔ xó lómílómí dó mlá nyǐkɔ tɔn dó han mɛ. Mi ɖe ali nú Mawu e nɔ́ zɔn akpɔ́kpɔ́ jí sɔ́ jí ɖɔhun é. Mawu Mavɔmavɔ wɛ nyǐkɔ tɔn nyí. Mi j'awǎ ɖo nukɔn tɔn.

⁶ Mawu ɖo nɔtɛn mímɛ́ tɔn, bó nyí tɔ́ nú tɔ́cyɔvǐ lɛ́ɛ, bó nyí xɛnyaɖomɛjítɔ́ nú asúkúsi lɛ́ɛ.

⁷ Mawu wɛ nɔ́ ná hɛ̌nnu mɛ e ma ɖó mɛɖé ǎ lɛ́ɛ; é wɛ nɔ́ ɖe gantɔ́ lɛ́ɛ nyi te, bónú yě ná mɔ vivo. Lo ɔ́, mɛ e nɔ fɔ́n gǔ dó Mawu jí lɛ́ɛ nɔ́ nɔ axéko jí.

⁸ Mawu ce, hwenu e a ɖo togun towe nu ɔ́, hwenu e a zun zɔnlin ɖo gbětótló mɛ ɔ́, Agbɔ̌n

⁹ ayǐkúngban dán wǔ, jǐ ja bɔ é vɛ́ jlɛ́, ɖó hwi Mawu Sinayíi só ɔ́ tɔn wɛ jǎwe; hwi Mawu Izlayɛ́li tɔn ɔ́ wɛ ɖo dǐndín wɛ.

¹⁰ Mawu ce, a sɛ́ jǐ gbó ɖé dó bɔ é ja. A nǎ hlɔ̌nhlɔ́n to towe hwenu e to towe gblé bǐ é.

¹¹ Togun towe sá xwé nyi fínɛ́, fí e a blǒ ɖ'ayǐ ɖo xomɛnyínyɔ́ towe mɛ nú wamamɔnɔ lɛ́ɛ é.

¹² Aklúnɔ ɖɔ xó ɖé, bɔ nyɔ̌nu lɛ́ɛ dó ahwan gbě bó ɖo jlǎjlá wɛ bó nɔ́ ɖɔ:

¹³ “Axɔ́sú e ɖo kɛntɔ́ lɛ́ɛ sín ahwangɔnu lɛ́ɛ nu lɛ́ɛ dó afɔ wezun mɛ; yě hɔn yi!” Nyɔ̌nu xwési lɛ́ɛ ɖo nǔ e è hɛn wá sín ahwangbénu lɛ́ɛ má wɛ.

¹⁴ Ahwannɛ́ e mi mɔ ɔ́, awa tɔn lɛ́ɛ bǐ wɛ nyí kpatágan, bɔ fún tɔn lɛ́ɛ bǐ nyí siká akú, bɔ midɛɛ lɛ́ɛ ká yi mlɔ́ kanlinkpó mɛ.

¹⁵ Hwenu e Nǔbǐwúkpétɔ́ ɔ́ gba axɔ́sú lɛ́ɛ dó ɖo to ɔ́ mɛ ɔ́, laglásilinfín ɖo gbigba wɛ fo ɖɔhun ɖo Só Wiwi ɔ́ jí.

¹⁶ Basáni só ɔ́, só mímɛ́ ɖé wɛ; só Basáni tɔn ɔ́, só ɖé wɛ bó ɖó nuvínu gěgé.

¹⁷ Bɔ hwi só nuvínu gěgé nɔ, étɛ́wú a ɖo wǔ hwan só e Mawu sɔ́ bó ná nɔ jí é wɛ? Só e Mawu Mavɔmavɔ sɔ́ bɔ é ná nyí nɔtɛn tɔn káká sɔ́yi é wɛ.

¹⁸ Ahwankɛkɛ́ Mawu tɔn lɛ́ɛ sukpɔ́ lóóo! Afatɔ́n (1.000) afatɔ́n wɛ è nɔ xa. Aklúnɔ kpó ahwankɛkɛ́ tɔn lɛ́ɛ kpó wá, Sinayíi só ɔ́ ɖo tɛn mímɛ́ ɔ́ mɛ.

¹⁹ Mawu Mavɔmavɔ, a xá só ta aga ɖéé. A kplá gantɔ́ lɛ́ɛ yi; a yǐ nǔníná ɖo gbɛtɔ́ lɛ́ɛ sí, káká bó yí ɖo mɛ e nɔ fɔ́n gǔ lɛ́ɛ sí. Mawu Mavɔmavɔ, a wǎ sá xwé ɖó Sinyɔ́ɔ.

²⁰ Jɛlijɛli nú Aklúnɔ ayǐhɔ́ngbe ayǐhɔ́ngbe. É wɛ nɔ́ yí agban mǐtɔn lɛ́ɛ hɛn. É wɛ nyí Mawu mɛhwlɛ́ngántɔ́ mǐtɔn. Agbɔ̌n

²¹ Mawu énɛ́ ɔ́, é wɛ nyí Mawu e nɔ́ hwlɛ́n mǐ gán é. Mawu Mavɔmavɔ, Aklúnɔ tunwun lě e é ná hwlɛ́n mǐ gán gbɔn ɖo kú sí é.

²² Kɛntɔ́ mǐtɔn lɛ́ɛ ɔ́, Mawu ná gba taká yě; é ná fɛ́n ahɔnká mɛ e nɔ fɔ́n bó nɔ́ ɖo gbɛ nyanya zán wɛ lɛ́ɛ.

²³ Aklúnɔ ɖɔ: “Un ná kplá yě sín Basáni só jí wá; un ná kplá yě sín xuzan mɛ wá,

²⁴ bónú afɔ towe ná gbɔn kɛntɔ́ towe lɛ́ɛ sín kanjɔ mɛ, bɔ cukú towe lɛ́ɛ ná ɖíɖɔ́ kanjɔ yětɔn lě e é jló yě gbɔn é.”

²⁵ Mawu ce, è mɔ lě e a zɔn mɛ towe lɛ́ɛ tɛ́ntin byɔ́ xwé towe gbe gbɔn é; Mawu ce, axɔ́sú ce, è mɔ lě e a byɔ́ tɛn mímɛ́ ɔ́ mɛ gbɔn é.

²⁶ Hansinɔ lɛ́ɛ ɖo nukɔn, nǔxotɔ́ lɛ́ɛ bɔ d'é wú, bɔ ahwli lɛ́ɛ ɖo tɛ́ntin bó ɖo hǔnví xo wɛ.

²⁷ Mi mlá Mawu ɖo kplékplé mɛ mitɔn lɛ́ɛ. Mi mɛ e tɔ́n sín Izlayɛ́li kún mɛ lɛ́ɛ e mi, mi mlá Mawu Mavɔmavɔ.

²⁸ Énɛ́! Bɛnjamɛ́ɛ e nyí yɔkpɔ́vú ɖo nɔví tɔn lɛ́ɛ mɛ ɔ́ sín akɔta wɛ ɖo nukɔn. Akɔta Judáa tɔn sín gǎn lɛ́ɛ ba acɔ́ bó jɛ fínɛ́. Akɔta Zabulɔ́ɔn tɔn sín gǎn lɛ́ɛ bɔ dó yě wú, lobɔ akɔta Nɛfutali tɔn sín gǎn lɛ́ɛ wá jɛ fínɛ́.

²⁹ Mawu ce, ɖe gbeta ɖé tɔ́n ní sɔgbe xá hlɔ̌nhlɔ́n towe, hlɔ̌nhlɔ́n towe e dó alɔ mǐ sɔ mɔ̌ é!

³⁰ Xwé towe hú ga Jeluzalɛ́mu toxo ɔ́ bǐ, fínɛ́ wɛ axɔ́sú lɛ́ɛ nɔ́ hɛn nǔ wá nú we ɖe.

³¹ Gbɛ̌ nǔ nú Ejípu, Ejípu gběkanlin e nɔ́ nɔ fɛ́n kan mɛ é. Gbɛ̌ nǔ nú akɔta lɛ́ɛ; yě nyibúsú e dó ahwan gbě, yě kpó nyibúví yětɔn lɛ́ɛ kpó é; gbɛ̌ nǔ nú yě káká bónú yě bǐ wá jɛ kpo ɖo nukɔn towe kpó kpatágan yětɔn lɛ́ɛ kpó. Gba togun e yí wǎn nú ahwanfunfun lɛ́ɛ dó.

³² Mɛ e sɔ́ Ejípu fɔ ɖó te lɛ́ɛ ɖo wǐwá wɛ. Etiopíinu lɛ́ɛ hɔn wá su Mawu bó kɛ alɔ n'i.

³³ Axɔ́súɖuto e ɖo ayǐkúngban jí lɛ́ɛ e mi, mi ji han nú Mawu, mi ɖɔ xó lómílómí dó han mɛ dó sɔ́ Aklúnɔ su. Agbɔ̌n

³⁴ Mi ji han nú Mawu e nɔ zɔn akpɔ́kpɔ́ jí ɖo jǐxwé aga é, jǐxwé aga e ko tíin sín do é. Mi ɖótó! È ɖo gbe tɔn se wɛ. É dó gbe bɔ é syɛ́n ɖésú.

³⁵ Mi kpa susu nú Mawu; é wɛ ɖu axɔ́sú ɖo Izlayɛ́li; akpɔ́kpɔ́ lɛ́ɛ ɖésú nɔ́ ɖe hlɔ̌nhlɔ́n tɔn xlɛ́.

³⁶ Mawu ɖe lě e é dó xɛsi gbɔn é xlɛ́ sín xwé tɔn gbe. É wɛ nyí Mawu Izlayɛ́li tɔn. É wɛ nɔ́ ná hlɔ̌nhlɔ́n kpó nǔwúkpíkpé kpó togun tɔn. Mi mlá Mawu.