Ɖɛhan 64 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Mawu, un ɖo azɔn wɛn wɛ, ɖǒtó mì! Hwlɛ̌n gbɛ ce ɖo kɛntɔ́ e ɖi xɛsi ná wɛ un ɖe ɔ́ sí.

³ Đe mì sín gbě ce e dǎkaxotɔ́ lɛ́ɛ blá é mɛ; ɖe mì sín nǔagɔagɔwatɔ́ e sɛ yěɖée kplé, bó ɖo zǐngídi jí lɛ́ɛ mɛ.

⁴ Yě nɔ́ gan ɖɛ̌ e ɖo nu yětɔn mɛ é hwǐ ɖɔhun; xó baɖabaɖa e nɔ tɔ́n sín nu yětɔn mɛ ɔ́ aɖǐgá wɛ,

⁵ bɔ yě nɔ́ nɔ nǔglɔ́ bó nɔ́ da dó gbɛtɔ́ xomɛvɔ́nɔ lɛ́ɛ. Ajijimɛ wɛ yě nɔ́ da dó mɛ; ta yětɔn ka nɔ́ kínkɔ́n anyǔ ǎ.

⁶ Yě nɔ́ ná akɔ́nkpinkpan yěɖée ɖɔ yě ní xo dǎka. Yě nɔ́ kplé bó nɔ́ ɖó mɔ nú mɛ, bó nɔ́ ɖɔ: “Mɛ ɖé ná mɔ ǎ.”

⁷ Yě nɔ́ ɖe wě nyanya bó nɔ́ ɖɔ: “Mǐ ɖo gbesisɔ mɛ, mǐ ko to nǔ mǐtɔn.” Ayixa e ɖo gbɛtɔ́ xo mɛ é kpó linlin e ɖo xo tɔn mɛ é kpó gɔ́ngɔ́n.

⁸ Mawu da gǎ dó yě ajijimɛ. Kpɔ́n, yě yí kpɛ́n.

⁹ Đɛ̌ yětɔn wɛ zin yě dɛ́; mɛ e mɔ yě lɛ́ɛ bǐ wɛ nɔ́ húnhún ta bo nɔ ko yě.

¹⁰ Xɛsi jɛ gbɛtɔ́ lɛ́ɛ bǐ jí; yě nɔ́ ɖo nǔ e Mawu wa ɔ́ jlá wɛ; yě mɔ nǔ jɛ nǔ e Mawu wa é wú.

¹¹ Nǔjlɔ́jlɔ́watɔ́ lɛ́ɛ ní j'awǎ ɖo Mawu Mavɔmavɔ mɛ, yě ní bɛ ta ɖo gɔ̌n tɔn, bónú é víví nú mɛ e ɖó ayijlɔ́jlɔ́ lɛ́ɛ bǐ.