Ɖɛhan 63 - MAWUXÓWÉMA

¹ Davídi sín han. Hwenu e é ɖo gbětótló Judáa tɔn mɛ é wɛ é ji.

² Mawu, hwi wɛ nyí Mawu ce, bɔ un ɖo biba we wɛ; kɔ towe nɔ xú mì; nyi ɖésúnɔ ɔ́ bǐ ɖo biba we wɛ, lě e sin nɔ jló ayǐkúngban xúxú é ɖɔhun.

³ Ninɔmɛ énɛ́ mɛ wɛ un ɖe, bó zé nukún dó ba we ná ɖo xwé towe gbe, bó ná kpɔ́n hlɔ̌nhlɔ́n towe, bó kpɔ́n susu towe,

⁴ ɖó xomɛnyínyɔ́ towe nyɔ́ hú gbɛ. Un ná nɔ́ ɖo mlǎmlá we wɛ.

⁵ Un ná nɔ́ dó kú nú we ɖo gbɛzán ce lɛ́ɛ bǐ mɛ. Un ná dlɛ́n alɔ sɛ́ dó we, bó ná ɖɔ xó nú we.

⁶ Énɛ́ ɔ́, ji mɛ ná jɛ mì, mɛ e ɖu nǔ ɖagbe ɖagbe, nǔjɔnǔ gɔ́ xo é ɖɔhun. Un ná nɔ́ j'awǎ, bó ná nɔ́ mlá we.

⁷ Nú un mlɔ́ adɔ̌zan ce jí ɔ́, un nɔ́ ɖo flínflín we wɛ; un nɔ ɖo tamɛ lin dó wǔ towe wɛ ɖo zǎn ɔ́ mɛ.

⁸ Đó hwi wɛ nyí alɔgɔ́númɛtɔ́ ce, bɔ un ɖo xó sú wɛ kpó awǎjijɛ kpó ɖo awa towe lɛ́ɛ glɔ́.

⁹ Hwi wú wɛ un tlɛ́ dó, aɖisí lɔ towe wɛ a dǒ hɛn mì.

¹⁰ Lo ɔ́, mɛ e ɖo biba ná gblé gbɛ dó nú mì wɛ lɛ́ɛ ná yi ayǐkúngban glɔ́ ɖo kútomɛ.

¹¹ Hwǐ wɛ ná ɖu lan yětɔn, avǔn gbě tɔn lɛ́ɛ sín nǔɖuɖu wɛ yě ná nyí.

¹² Axɔ́sú ɔ́ ká ná j'awǎ ɖo Mawu mɛ. Mɛ e ná ɖɔ xó ɖé bó xwlé Mawu d'é jí lɛ́ɛ ɔ́, nǔ ná nyɔ́ nú yě, amɔ̌, adingbannɔ lɛ́ɛ ɔ́, è nǎ xwe nu yětɔn dó xɔ.