Ɖɛhan 61 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. È nɔ ji bó nɔ́ xo kanhún d'é mɛ. Davídi sín han wɛ.

² Mawu, se xó e sú wɛ un ɖe é; ɖǒtó ɖɛ e xo wɛ un ɖe é.

³ Un ɖo xó sú ylɔ́ we wɛ sín fí e ayǐkúngban ɔ́ bɛ́ sín é, awakanmɛ bǐ wɛ kú mì. Kplá mì yi só e jí un ma sixú yi ǎ é jí.

⁴ Đó bibɛtɛn wɛ a nyǐ nú mì, ahohó wɛ a nyǐ nú mì ɖo kɛntɔ́ nukɔn.

⁵ É jló mì ɖɔ má ɖo xwé towe gbe káká sɔ́yi; é jló mì ɖɔ má hɔn hwlá cí awa towe lɛ́ɛ glɔ́, Agbɔ̌n

⁶ ɖó hwi Mawu ɔ́, a nɔ se akpá e un dó é. Mɛ e nɔ sí we lɛ́ɛ ɔ́, hwi wɛ nɔ ná nǔ e nyí yětɔn ɔ́ yě.

⁷ Dǒ azǎn azǎn jí nú axɔ́sú ɔ́; xwe ní jɛ xwe jí n'i káká sɔ́yi.

⁸ Mawu, blǒ bónú axɔ́sú ɔ́ ní nɔ zinkpo jí ɖo nukɔn towe káká sɔ́yi; xomɛnyínyɔ́ towe kpó gbejíninɔ towe kpó ní kpɔ́n jǐ tɔn!

⁹ Énɛ́ ɔ́, un ná nɔ́ ɖo han ji mlá we wɛ hwebǐnu, bó ná dó ɖe akpá e un dó lɛ́ɛ ayǐhɔ́ngbe ayǐhɔ́ngbe.