Ɖɛhan 6 - MAWUXÓWÉMA

Mawu Mavɔmavɔ, ma ɖó hwɛ nú mì ó

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún kantántɔnnɔ d'é mɛ.

² Mawu Mavɔmavɔ, ma ɖo xomɛsin jí, bó dɔn tó nú mì ó. Ma ɖo adǎn jí bó kplɔ́n mì ó.

³ Mawu Mavɔmavɔ, kú nǔbláwǔ nú mì, ɖó un sɔ́ ɖó gǎn ɖé ǎ. Mawu Mavɔmavɔ, gbɔ azɔn nú mì, ɖó un sɔ́ ló dǒ ǎ.

⁴ Ayi ce bǐ wɛ gbadó. Mawu Mavɔmavɔ, káká hwetɛ́nu nǔ ná nɔ lě nú mì yi jɛ?

⁵ Mawu Mavɔmavɔ, lɛ̌ kɔ wá, wǎ hwlɛ̌n mì. Hwlɛ̌n mì gán ɖó xomɛnyínyɔ́ towe wú.

⁶ Đó mɛ e ɖo kú lɛ́ɛ ɖě sɔ́ nɔ́ flín we ǎ; mɛ e ɖo kútomɛ lɛ́ɛ ɖě sɔ́ nɔ́ sixú kpa we ǎ.

⁷ Un wɛn azɔn káká bɔ nǔ ci kɔ nú mì. Zǎn mɛ tɛgbɛ ɔ́, zan ce bǐ wɛ nɔ́ nyí ɖasin, ɖasin wɛ nɔ fá adɔ̌zan ce bǐ.

⁸ Nukún ce bǐ wɛ gblé, nǔ lin wɛ un ɖe sɔ mɔ̌ nɛ́! Nukún ce sɔ́ nɔ́ mɔ nǔ ǎ, kɛntɔ́ wɛ ɖo ya dó nú mì wɛ sɔ mɔ̌.

⁹ Mi sɛ yi zɔ nú mì, nǔnyanyawatɔ́ e mi, ɖó Mawu Mavɔmavɔ se avǐ e ya wɛ un ɖe é.

¹⁰ Mawu Mavɔmavɔ se vo e sa n'i wɛ un ɖe lɛ́ɛ, é yí ɖɛ ce.

¹¹ Kɛntɔ́ ce lɛ́ɛ bǐ ní ɖu winnyá, xɛsi ní jɛ yě jí; yě ní j'agɔ dó gǔdo; yě ní ɖu winnyá nukúnxwixwe ɖokpó mɛ.