Ɖɛhan 58 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ.

² Nu e mi ma nɔ kɛ dó nǔɖé mɛ ǎ ɔ́ wɛ nyí hwɛ e mi nɔ gbo é a? Mi gbɛtɔ́ lɛ́ɛ ɔ́, lě e mi nɔ ɖɔ hwɛjlɔ́jlɔ́ gbɔn é ná?

³ Hwɛjlɔ́jlɔ́ nɛ́ ǎ; mi ɖésúnɔ wɛ nɔ́ xo ahizi. Mi ɖésúnɔ nɔ́ zé alɔ mitɔn dó xo dǎka gbɔn to ɔ́ bǐ mɛ.

⁴ Mɛdídá lɛ́ɛ ɔ́, sín ajidonu wɛ yě kó nyí gbɛtɔ́ nyanya sín; è ko ji yě zinzin có yě gosín ali ɖagbe ɔ́ jí ǎ, adingban wɛ yě nɔ́ ɖó.

⁵ Yě vɛ́ aɖǐ dan ɖɔhun, jakpata e sú tó, bó ma nɔ se jɔ ǎ é ɖɔhun.

⁶ Mɛ e nɔ jlɛ́ nǔ hú mɛ bǐ, bó nɔ́ wlí dan é ná bó ɖo nǔ xo n'i wɛ ɔ́, é nɔ́ wlí tó wú ǎ.

⁷ Mawu e, nǔ mɛdídá nɛ́ lɛ́ɛ ɔ́, wɛ̌n aɖǔ dó nu mɛ nú yě; Mawu Mavɔmavɔ e, nǔ kinnikínní ví ɖɔhun nɛ́ lɛ́ɛ ɔ́, só aglan yě.

⁸ Yě ní sa yi ayǐsun ɖɔhun, yě da gǎ hǔn, ní má yi zɔ ó.

⁹ Mɛdídá lɛ́ɛ ní cí agwǐn ma ɖó go e nɔ ɖo yiyi wɛ, bó nɔ́ ɖo sínsínsínsín wɛ é ɖɔhun. Énɛ́ ɔ́, yě ná mɔ hwe ǎ, vǐ e flɛ́ kɛ́n é ɖɔhun.

¹⁰ Wunkan wɛ yě nyí; cóbónú wunkan ɔ́ ká ná dó wunkan ɔ́, axásáxásá jɔhɔn ní wá bɛ́ bǐ yi, é sixú kó xú, é ká sixú kpo ɖo mǔ.

¹¹ Nǔjlɔ́jlɔ́watɔ́ ká ná j'awǎ, ɖó Mawu ná ba hlɔn n'i, é ná lɛ wǔ ɖo mɛdídá lɛ́ɛ sín kanjɔ mɛ.

¹² Énɛ́ ɔ́, gbɛtɔ́ lɛ́ɛ bǐ ná ɖɔ: “Anhɛɛn! Mɛ e nɔ wa nǔ jlɔ́jlɔ́ lɛ́ɛ ná mɔ ajɔ yětɔn. Anhɛɛn! Mawu ɖe bó nɔ́ gbo hwɛ.”