Ɖɛhan 57 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Hwenu e Sawúlu ɖo Davídi nya wɛ, bɔ é yi hɔn hwlá cí sónu mɛ ɔ́ wɛ é ji.

² Sɔ́ nukún ɖagbe dó kpɔ́n mì; Mawu ce, sɔ́ nukún ɖagbe dó kpɔ́n mì, ɖó hwi gɔ́n wɛ un wá bɛ ta ɖe. Un hɔn wá bɛ ta ɖo awa towe lɛ́ɛ glɔ́, káká bɔ adǎn ɖaxó e ɖo gbigbo mì wɛ ɔ́ ná vɔ.

³ Mawu Ajalɔ̌nlɔn ɔ́ sú xó ylɔ́ wɛ un ɖe, Mawu e nɔ́ bló nǔ ce bǐ ɖó é ylɔ́ wɛ un ɖe.

⁴ É ní sɛ́ hwlɛngán dó mì sín jǐxwé aga, é ní dó winnyá mɛ e ɖo gbě ce nya wɛ é, Agbɔ̌n é ní ɖe xomɛnyínyɔ́ tɔn e má nɔ́ gblá gbeɖé ǎ é xlɛ́ mì.

⁵ Kinnikínní lɛ́ɛ tɛ́ntin wɛ un ɖe. Mɛ e nɔ tlɛ́n gbɛtɔ́ ɖu lɛ́ɛ tɛ́ntin wɛ un mlɔ́. Aɖǔ yětɔn ɔ́, gǎ nu xwíɖíxwíɖí wɛ, hwǎn wɛ; ɖɛ̌ e ɖo nu yětɔn mɛ ɔ́, hwǐ nuwenɔ wɛ.

⁶ Mawu, ɖe susu towe xlɛ́ zɛ jǐxwé wú; ɖe susu towe xlɛ́ gbɔn ayǐkúngban ɔ́ bǐ jí!

⁷ Yě ɖó ɖɔ dó ali ce jí, yě dó kan nyɔxwle bó ná nyi dó kɔ nú mì. Yě kun do ɖó nukɔn ce, yě ɖésú wɛ ka wá jɛ mɛ. Agbɔ̌n

⁸ Ayi ce j'ayǐ, Mawu ce, ayi ce wá j'ayǐ lo! Din ɔ́, un ná ji han; un ná ɖɔ xó lómílómí dó han mɛ.

⁹ Lǐndɔ̌n ce ní fɔ́n sí te; kanhún ce ní fɔ́n, nú agǐdigbo ce ní fɔ́n, ɖó hangbe ce ná kó ɖi có ayǐ ná zɛ kpɔn.

¹⁰ Aklúnɔ, un ná kpa susu nú we ɖo togun lɛ́ɛ mɛ; un ná ji han dó mlá we ɖo akɔta lɛ́ɛ tɛ́ntin,

¹¹ ɖó xomɛnyínyɔ́ towe hun káká yi jǐnukúnsin, gbejíninɔ towe zɛ akpɔ́kpɔ́ lɛ́ɛ wú.

¹² Mawu, ɖe susu towe xlɛ́ káká zɛ jǐxwé wú; ɖe susu towe xlɛ́ gbɔn ayǐkúngban ɔ́ bǐ jí!