Ɖɛhan 56 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ahwannɛ́ ɖo zɔ xwíí” é sín hangbe mɛ. Hwenu e Filisitɛ́ɛn lɛ́ɛ wlí Davídi ɖo Gati ɔ́ wɛ é ji.

² Mawu, kú nǔbláwǔ ce, ɖó gbɛtɔ́ lɛ́ɛ nɔ́ ɖo cɔcɔ dó nú mì wɛ. Ayǐ hɔ́n tɛgbɛ ɔ́, yě nɔ́ nyɛ́sú mì, bó nɔ́ ɖo zǐngídi ɖú xá mì wɛ.

³ Ayǐ hɔ́n tɛgbɛ ɔ́, kɛntɔ́ ce lɛ́ɛ nɔ́ bɔ ɖó nú mì. Yě mɛ e nɔ dó ahwan gbě bó nɔ xísí dó mì lɛ́ɛ sukpɔ́ lóóo!

⁴ Xɛsi ka jɛ jǐ ce gbeɖé ɔ́, hwi wú wɛ un nɔ gán jɛ.

⁵ Mawu mɛ wɛ un ɖe bó nɔ́ kpa susu nú xó tɔn; Mawu wú wɛ un gán jɛ; nǔɖé nɔ́ dó xɛsi nú mì ǎ. Ani gbɛtɔ́ ka sixú wa nú mì?

⁶ Ayǐ hɔ́n tɛgbɛ ɔ́, yě nɔ́ ɖo xó ɖɔ dó dó akpɔ nú mì wɛ; nǔ nyanya kɛ́ɖɛ́ jɛ́n yě nɔ́ lin dó wǔ ce.

⁷ Yě nɔ́ blá gbě ce; yě nɔ́ ɖo wu yi nú mì wɛ. Un jɛ fí ɖé ɔ́, yě nɔ́ jɛ, ɖó yě ɖo biba ná hu mì wɛ.

⁸ Yě ná dó nǔ sin sɔ mɔ̌ bó ná gán ɖ'é mɛ wɛ a? Mawu, zin yě dɛ́ kpó xomɛsin kpó.

⁹ Hwi ɖésú tunwun ganjí ɖɔ hɔn wɛ un gbɔ bo hɔn; ɖasin e gosín nukún ce jí ɔ́, a yǐ bǐ dó nǔ mɛ. A ma ka ko wlán bǐ dó wěma towe mɛ a?

¹⁰ Énɛ́ ɔ́ wú ɔ́, un ylɔ́ we gbeɖé ɖɔ hwi ní wá gɔ́ alɔ nú mì ɔ́, kɛntɔ́ ce lɛ́ɛ nɔ́ jó agɔ dó gǔdo. Un tunwun ɖɔ hwi Mawu ɔ́, a ɖo jǐ ce.

¹¹ Mawu Mavɔmavɔ mɛ wɛ un ɖe bó nɔ́ kpa susu nú xó tɔn;

¹² Mawu wú wɛ un gán jɛ; nǔɖé nɔ́ dó xɛsi nú mì ǎ. Ani gbɛtɔ́ ká sixú wa nú mì.

¹³ Mawu, un ɖó ná ɖe akpá e un dó nú we lɛ́ɛ. Un ná nɔ́ sá kúdónúmɛvɔ́ nú we, dó ɖe akpá e un dó nú we é.

¹⁴ Đó a hwlɛ̌n mì sín kú; a lɔn bɔ un ɖe afɔ nyi do ǎ, énɛ́ wú wɛ un ná ɖi zɔnlin ɖo nukɔn towe, ɖo wěziza gbɛmɛ fí tɔn nu.