Ɖɛhan 55 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji bó nɔ́ xo kanhún d'é mɛ.

² Mawu, ɖǒtó ɖɛ ce! Ma dó tókúse vo e sa nú we wɛ un ɖe ɔ́ mɛ ó.

³ Kpɔ́n nǔ e ɖo wiwa mì wɛ ɔ́ ganjí, bó ná sin tɔn mì! Un ɖo wǔvɛ́ mɔ wɛ, un ɖo flúflú kpé wɛ, un ɖo jojo dán wɛ,

⁴ ɖó nǔ e ɖɔ nú mì wɛ kɛntɔ́ ɖe é wú, ɖó ya e dó nú mì wɛ mɛdídá ɖe é wú. Yě ɖo nǔ nyanya dɔn dó jǐ ce wɛ, bó ɖo hwɛ dó mì wɛ kpó adǎn kpó.

⁵ Hǔn ce nɔ́ xo ɖo xo ce mɛ, bɔ kú ɖo ado hu nú mì wɛ.

⁶ Xɛsi jɛ jǐ ce, ta mɛ ce nɔ kɔ́yi, bɔ avivɔfún blá mì.

⁷ Bɔ un nɔ ɖɔ nǔɖé ló ná awa mì ahwannɛ́ ɖɔhun, énɛ́ ɔ́, un ná zɔn, bó ná yi vo ɖo fí ɖé.

⁸ Un ná hɔn yi zɔ aga, un ná yi nɔ gbětótló mɛ. Agbɔ̌n

⁹ Un ná hwlɛ́ndó yi ba adɔ̌tɛn, fí e un ná nɔ bɔ jɔhɔn ɖaxó ɖé ma ná dó tagba nú mì ǎ é.

¹⁰ Aklúnɔ, wlǔ tito kɛntɔ́ ce lɛ́ɛ tɔn, klán gbe dó nu nú yě. Ɖó dǎka kpó jlɛ kpó kɛ́ɖɛ́ jɛ́n un mɔ ɖo toxo ɔ́ mɛ.

¹¹ Dǎka kpó jlɛ kpó jɛ́n nɔ́ ɖo lɛ́ lɛ̌ dó toxo ɔ́ wɛ zǎn kéze. Nǔ nyanya kpó ya kpó wɛ ɖo toxo ɔ́ mɛ.

¹² Nǔɖé sɔ́ ɖo nǔɖé hwínnu ɖo toxo ɔ́ mɛ ǎ. Ahizi kpó ayi ɖó nukɔn nú mɛ kpó nɔ́ hán ɖo toxo ɔ́ mɛ ǎ.

¹³ Nú kɛntɔ́ ce wɛ ɖo tagba dó nú mì wɛ ɔ́, un ná ɖó akɔ́n nu. Nú mɛ e gbɛ́ wǎn nú mì é wɛ sí te dó jǐ ce ɔ́, un ná ko hɔn bú dó e.

¹⁴ Lo ɔ́, hwi mɛ e kpó nyɛ kpó nɔ́ dó gbɛ̌ ɔ́, hwi mɛ e kpó nyɛ kpó má ɔ́, hwi mɛ e un tunwun ganjí é wɛ ɖo tagba dó nú mì wɛ.

¹⁵ Mǐ nɔ́ ɖɔ xomɛ nú mǐɖée, hwi kpó nyɛ kpó nɔ́ zɔn kpɔ́ yi Mawu xwé.

¹⁶ Kɛntɔ́ ce lɛ́ɛ ní wɛ́n kú, yě nǐ yi kútomɛ gbɛɖe gbɛɖe. Yě gbɔn fí ɖé dín ɔ́, alǎnnú kɛ́ɖɛ́ wɛ è nɔ mɔ ɖo fínɛ́; adǎka wa xwé nyi tɛ́ntin yětɔn.

¹⁷ Nyɛ ɔ́, un ɖo xó sú ylɔ́ Mawu Mavɔmavɔ wɛ, bɔ é ná hwlɛ́n mì gán.

¹⁸ Un nɔ ɖo azɔn wɛn wɛ zǎnzǎn, hwemɛ, gbada, bó nɔ́ ɖo alě ná wɛ bɔ Mawu Mavɔmavɔ se gbe ce.

¹⁹ Hwenu e yě tɔ́n ahwan mì ɔ́, fífá wɛ é dó hwlɛ́n mì, hwenu e yě so gbɛ̌ bó sí te dó jǐ ce ɔ́, fífá wɛ é dó hwlɛ́n mì.

²⁰ Mawu ná se xó e sú ylɔ́ ɛ wɛ un ɖe é bó ná dó winnyá yě, Mawu e ɖu axɔ́sú sín dodó donu é ná dó winnyá yě, ɖó yě húzú ǎ, yě ká nɔ́ sí Mawu ǎ. Agbɔ̌n

²¹ Lɛdatɔ́ ɔ́ sí te dó xɔ́ntɔn tɔn lɛ́ɛ jí, akɔ e é kpó yě kpó jɛ ɔ́, é gba akɔ ɔ́.

²² Xó e nɔ́ tɔ́n sín nu tɔn mɛ ɔ́ nɔ́ víví hú wǐin; lo ɔ́, ɖo xo tɔn mɛ ɔ́, ahwannú sɔ́ wɛ é ɖe. Xó tɔn ɖíɖí wǔ hú lǐmu; lo ɔ́, xó tɔn ɔ́, dɛnkpe e ma ɖo akún mɛ ǎ é wɛ.

²³ Sɔ́ nǔ linlin towe dó alɔ mɛ nú Mawu Mavɔmavɔ; é ná hɛn we ɖó te. Hwɛjijɔnɔ na bo j'ayǐ ɔ́, é ná jó e dó bɔ é ná nɔ mɔ̌ káká sɔ́yi ǎ.

²⁴ Mawu, sɛ́ gbɛtɔ́ mɛhutɔ́ ahizinɔ lɛ́ɛ dó yɔdo mɛ; xwe e a nǎ yě ɔ́, yě ná bló wevlɔ́ɖó ǎ. Amɔ̌, nyɛ ɔ́, hwi wú wɛ un gán jɛ.