Ɖɛhan 52 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ.

² Hwenu e Dowɛgi Edɔ́munu ɔ́ yi ɖɔ nú Sawúlu ɖɔ Davídi yi cí Aximɛlɛ́ki xwé é wɛ Davídi ji.

³ Hwi mɛ e nyí ahwannusyá ɖokpó ɔ́, nɛ̌ ka gbɔn bɔ é nyí nǔ nyanya e a nɔ dó sin é wɛ a nǎ dó jlá ajɔ̌ ná? Kpɔ́n! Mawu nɔ́ ɖe xomɛnyínyɔ́ tɔn xlɛ́ gbe bǐ gbe.

⁴ Nǔ nyanya wé jɛ́n a nɔ ɖe. Nu towe ɖá hú hǎ; mɛ nú ɖɔ wɛ jɛ́n a nɔ ɖe.

⁵ A yí wǎn nú nyanya wiwa hú ɖagbewiwa; a yí wǎn nú adingban hú nǔgbó. Agbɔ̌n

⁶ Xó e nɔ́ hɛn nǔ gblé lɛ́ɛ kɛ́ɖɛ́ wɛ a nɔ yí wǎn ná; xó e a nɔ ɖɔ ɔ́ ɖě nɔ́ nyí nǔgbó ǎ.

⁷ Énɛ́ ɔ́ wú ɔ́, Mawu ná hɛn gbɛ towe gblé bɔ é ná nɔ mɔ̌ káká sɔ́yi. É ná zin we dɛ́, é ná ɖe we sín xwé towe gbe, é ná ɖe we sín ayǐkúngban ɔ́ jí. Agbɔ̌n

⁸ Mɛ e ɖo gbejí nú Mawu lɛ́ɛ ná mɔ nǔ e jɛ dó jǐ towe ɔ́, bó ná ɖó sísí nú Mawu, bó ká ná cá hwɛ ko ɖɔ:

⁹ “Mi kpɔ́n nya mitɔn, nya mitɔn e nɔ gán jɛ dɔkun tɔn wú é, nya mitɔn e má nɔ́ sɔ́ Mawu dó ɖó bibɛtɛn ná ǎ é, nya mitɔn e nǔ nyanya e é dó sin ɔ́ wɛ é nɔ́ dó jɛ adǎnnyí ná é, mi kpɔ́n ɛ.”

¹⁰ Nyɛ ɔ́, un ɖo ganjí ɖo Mawu sín xwé gbe olívutín e zɔ́n ama ganjí é ɖɔhun. Xomɛnyínyɔ́ Mawu tɔn wú wɛ nyɛ gán jɛ káká yi káká sá.

¹¹ Mawu, un ná nɔ́ ɖo susu kpa nú we wɛ káká sɔ́yi, ɖó nǔ e a blǒ é wú. Hwi wɛ un ná ɖó nukún, ɖó a nyɔ̌ nú mɛ e ɖo gbejí nú we lɛ́ɛ.