Ɖɛhan 51 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Hwenu e Davídi ɖó xó xá Bɛtisabe Ulíi sín asi, bɔ Mawu sɛ́ gbeyíɖɔ tɔn Natáan dó gɔ̌n tɔn é wú wɛ han élɔ́ ɖɔ xó dó.

³ Mawu ce, kú nǔbláwǔ ce, ɖó a nyɔ̌ xomɛ sɔ mɔ̌. Kpɔ́n dó nǔbláwǔkúnúmɛ towe ma ɖó jlɛ̌ ɔ́ wú, bó súnsún nǔ e un dó sin lɛ́ɛ.

⁴ Lɛ nǔ e un wa nyi do lɛ́ɛ bǐ sín kɔ nú mì, slá wǔ nú mì bónú hwɛ e un hu ɔ́ ná gosín kɔ ce.

⁵ Đó un yí nǔ e un wa nyi do lɛ́ɛ bǐ gbe, bɔ hwɛ e un hu ɔ́ ɖo nukɔn ce hwebǐnu.

⁶ Hwi ɖokpónɔ géé wɛ un hu hwɛ dó, un wa nǔ e ma nyɔ́ nukún towe mɛ ǎ lɛ́ɛ; a na bo ɖó hwɛ ɖěbǔ nú mì hǔn, hwɛ towe jɔ; mɛɖé ná mɔ hwɛ nú we ǎ.

⁷ Sín hwenu e è ji mì ɔ́ wɛ hwɛhuhu sín alɔxwixwí kó ɖo wǔ ce, bó ɖo wǔ ce sín nɔ ce xomɛ. Ée è dǒ xo ce é jɛ́n hwɛhuhu tɔ́ dó wǔ ce.

⁸ Gbɛtɔ́ ɖó sísí nú nǔgbó ɖo ayi mɛ ɔ́, xomɛ nɔ hun we. Blǒ bónú má mɔ nǔ jɛ nǔnywɛ́ towe wú ɖo ayi ce mɛ.

⁹ Zě izɔ́puma dó slá wǔ nú mì, énɛ́ ɔ́, un ná húzú mɛ mímɛ́. Lɛ wǔ nú mì, énɛ́ ɔ́, un ná wé, bó wé hú kɛ́njí.

¹⁰ Đɔ nú mì ɖɔ émí sɔ́ hwɛ kɛ mì, énɛ́ ɔ́, xomɛ ná hun mì bó ná túnflá, bɔ xú e a cɛ́ dó lanmɛ nú mì lɛ́ɛ lɔ ná ɖú we.

¹¹ Đe nukún sín hwɛ e un hu lɛ́ɛ wú, súnsún nǔ e un wa nyi do lɛ́ɛ bǐ síin.

¹² Mawu ce, sɔ́ ayi mímɛ́ dó xomɛ nú mì; lɛ̌ vɔ́ ayixa ce bló ɖó, bónú ayixa ce ní lí dǒ ganjí.

¹³ Ma zé mì nyi gbě, bónú un nɔ zɔ nú we ó. Ma ɖe Yɛsinsɛn towe sín jǐ ce ó.

¹⁴ Nǎ awǎjijɛ mì ɖó hwlɛ̌n e a hwlɛ̌n mì gán é wú. Sɔ́ ayixa e nɔ ɖɔ bó nɔ́ bló ɖ'é jí é dó xomɛ nú mì.

¹⁵ Yě mɛ e nɔ fɔ́n gǔ dó jǐ towe lɛ́ɛ ɔ́, un nǎ xlɛ́ ali towe yě. Énɛ́ ɔ́, hwɛhutɔ́ lɛ́ɛ ná lɛ́ kɔ wá gɔ̌n towe.

¹⁶ Mawu mɛhwlɛ́ngántɔ́ ce, un kɔn kanjɔ kɔn nyi ayǐ; hwlɛ̌n mì ɖ'é mɛ, bónú má sú xó bó ɖɔ nú mɛ bǐ ɖɔ a hwlɛ̌n mì.

¹⁷ Aklúnɔ, hun ɖɛ̌ nú mì, bónú má sɔ́ nu ce dó kpa susu nú we.

¹⁸ A ba vɔ̌ ǎ, nú vɔ̌ wɛ a ko nɔ ba ɔ́, un ná kó xwlé vɔ̌sánú we; un na bo sá vɔ̌ e è nɔ dó zo ɔ́ nú we ɔ́, a ba ǎ.

¹⁹ Mawu ce, vɔ̌ e nɔ́ nyɔ́ nukún towe mɛ ɔ́ wɛ nyí ɖɔ hwɛ e è hu lɛ́ɛ ní vɛ́ nú mɛ ɖo ayixa mɛ. A nɔ gbɛ́ wǎn nú mɛ e hwɛ tɔn lɛ́ɛ vɛ́ n'i tlílí ɖo ayi mɛ bɔ wǔ kú ɔ́ ǎ.

²⁰ Nyɔ̌ xomɛ dó Sinyɔ́ɔ wú, bó kɔn nyɔ̌ná dó jǐ tɔn. Lɛ̌ vɔ́ Jeluzalɛ́mu sín dǒ lɛ́ɛ mɛ.

²¹ Hwe énɛ́ ɔ́ nu lo ɔ́, nú è xwlé vɔ̌sánú e sɔgbe ɔ́ we ɔ́, a nǎ yí, bó ná yí vɔ̌ e è nɔ dó zo lɛ́ɛ. Énɛ́ ɔ́, è nǎ nɔ́ zé nyibúsú dó sá vɔ̌ nú we ɖo vɔ̌sákpe towe jí.