Ɖɛhan 48 - MAWUXÓWÉMA

¹ Kolée ví súnnu lɛ́ɛ sín han.

² Mawu Mavɔmavɔ d'agba; è nɔ ji han mlá ɛ mɔ̌hunkɔtɔn, ɖo só mímɛ́ tɔn jí, ɖo toxo tɔn mɛ.

³ Só mímɛ́ tɔn nyɔ́ ɖɛkpɛ kpɔ́n! É wɛ nɔ́ ná awǎjijɛ ayǐkúngban ɔ́ bǐ. Sinyɔ́ɔ só ɔ́ wɛ nyí Mawu sín nɔtɛn; é wɛ nyí toxo axɔ́sú ɖaxó ɔ́ tɔn.

⁴ Mawu ɖo ahohó Sinyɔ́ɔ tɔn mɛ; é ɖésúnɔ wɛ ka nyí bibɛtɛn ɖo ahohó ɔ́ mɛ; mɛ bǐ wɛ tunwun.

⁵ Éɖíe kpɔ́n! Axɔ́sú lɛ́ɛ sɛ yěɖée kplé; yě zɔn kpɔ́ bó ná yi tɔ́n ahwan Sinyɔ́ɔ.

⁶ Káká nú yě ná mɔ hlɔ̌nhlɔ́n Mawu tɔn ɔ́, hǔn yětɔn zɛ; ayi yětɔn bǐ gbadó, bɔ yě dó gblǒ mɛ.

⁷ Yě bǐ jɛ sísɔ́sísɔ́ jí tɛn tɔn mɛ, yě jɛ wǔvɛ́ mɔ jí nyɔ̌nu ɖo ajidonu ɖɔhun.

⁸ Mawu nya yě lě e jɔhɔn zǎnzǎnhwe jí tɔn nɔ́ dó alɔ tɔjíhún ɖaxó mɛ, bó nɔ́ dɔn yi gba ɔ́ ɖɔhun.

⁹ Nǔ e è ɖɔ bɔ mǐ se ɔ́, mǐ mɔ ɖó mɔ̌, ɖo toxo ɖaxó Mawu Mavɔmavɔ Nǔbǐwúkpétɔ́ ɔ́ tɔn mɛ, ɖo toxo Mawu mǐtɔn tɔn mɛ. Mawu ná hɛn toxo tɔn ɖó te káká yi káká sá. Agbɔ̌n

¹⁰ Mawu ce, mǐ ɖo xwé towe gbe ɔ́, mǐ nɔ́ flín lě e a nyɔ̌ xomɛ sɔ é.

¹¹ Mawu ce, lě e nyǐkɔ towe yi sɔ ɔ́, mɔ̌ wɛ susu towe hun káká yi fí e gbɛ ɔ́ kponu ɖó é. Hwɛjijɔ wɛ gɔ́ alɔ towe ɖisí ɔ́ mɛ.

¹² Sinyɔ́ɔ só ɔ́ ɖo awǎ jɛ wɛ, xomɛ ɖo Judáa toxo lɛ́ɛ hun wɛ, ɖó hwɛ e a ɖɔ lɛ́ɛ wútu.

¹³ Mi lɛ́ lɛ̌ dó Sinyɔ́ɔ toxo ɔ́, mi xa kpe e jí tocɔ́tɔ́ lɛ́ɛ nɔ́ nɔ lɛ́ɛ.

¹⁴ Mi kpɔ́n dǒ tɔn lɛ́ɛ, mi kpɔ́n ahohó e è mɛ lɛ́ dó é ganjí; énɛ́ ɔ́, mi ná wá kpi tan tɔn nú vǐ e ná wá jɔ sɔ lɛ́ɛ.

¹⁵ Mi ná ɖɔ: “Mawu mǐtɔn nɛ́; é wɛ nyí Mawu mǐtɔn tɛgbɛ káká sɔ́yi. É wɛ ná nɔ nukɔn nú mǐ káká yi kú.”