Ɖɛhan 46 - MAWUXÓWÉMA

Mawu Nǔbǐwúkpétɔ́ ɔ́ ɖo kpɔ́ xá mǐ

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. È nɔ ji dó hangbe e è nɔ ylɔ́ ɖɔ: “Đyɔ̌vǐ lɛ́ɛ” ɔ́ sín hangbe mɛ.

² Mawu ɔ́, bibɛtɛn wɛ é nyí nú mǐ, é wɛ nyí ahohó mǐtɔn. Adǎn gbo mɛ hwenu ɔ́, è nɔ ba ɛ kpo gbeɖé ɖo gǔdo ǎ.

³ Énɛ́ ɔ́ wú wɛ ado ma nɔ hu mì ǎ; ayǐkúngban na bo ɖo wǔ dán wɛ ɔ́, só lɛ́ɛ na bo ɖo mumu wɛ ɖo xuzan mɛ ɔ́, ado nɔ hu mì ǎ.

⁴ Xu na bo ɖo adǎn jí, bó ɖo fún nyɛ wɛ, bó ɖo te sí wɛ, bó ɖo só lɛ́ɛ dán wɛ ɔ́, ado nɔ hu mì ǎ. Agbɔ̌n

⁵ Tɔsisa ɖé nɔ́ hɛn xomɛhunhun wá nú Mawu sín toxo ɔ́, é nɔ́ hɛn awǎjijɛ wá Mawu Ajalɔ̌nlɔn sín nɔtɛn mímɛ́ ɔ́.

⁶ Mawu ɖo toxo ɔ́ mɛ, toxo ɔ́ ná dán ǎ. Káká nú ayǐ ná hɔ́n ɔ́, Mawu nɔ́ wá gɔ́ alɔ n'i.

⁷ Akɔta lɛ́ɛ ɖo adǎn jí, axɔ́súɖuto lɛ́ɛ ɖo dǐndán wɛ. Mawu ka kɛ nu lě ɔ́, ayǐkúngban ɖésúnɔ nɔ́ sínsín.

⁸ Mawu Mavɔmavɔ Nǔbǐwúkpétɔ́ ɔ́ ɖo kpɔ́ xá mǐ, Mawu Jakɔ́bu tɔn ɔ́ wɛ nyí ahohó mǐtɔn. Agbɔ̌n

⁹ Mi wá kpɔ́n nǔ e Mawu Mavɔmavɔ jlɛ́ lɛ́ɛ, mi wá kpɔ́n nǔ e é hɛn gblé ɖo ayǐkúngban jí lɛ́ɛ.

¹⁰ É wɛ sú ahwan kún dó gbɔn gbɛ ɔ́ bǐ mɛ. É wɛ́n gǎ lɛ́ɛ, é lɔ́ hwǎn lɛ́ɛ, é dó ahwankɛkɛ́ lɛ́ɛ zo.

¹¹ Mawu Mavɔmavɔ ɖɔ: “Mi fɔ ahwanfunnú bǐ ɖ'ayǐ! Mi bǐ ní tunwun ɖɔ nyi wɛ nyí Mawu! Un hú gǎn akɔta lɛ́ɛ bǐ. Un hú gǎn nǔ e ɖo ayǐkúngban ɔ́ jí é bǐ.”

¹² Mawu Mavɔmavɔ Nǔbǐwúkpétɔ́ ɔ́ ɖo kpɔ́ xá mǐ, Mawu Jakɔ́bu tɔn ɔ́ wɛ nyí ahohó mǐtɔn. Agbɔ̌n