Ɖɛhan 45 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji dó han e è nɔ ylɔ́ ɖɔ folówa ɖagbe ɖagbe ɔ́ sín hangbe mɛ, bó nɔ́ xo kanhún d'é mɛ. Xó lómílómí Kolée ví súnnu lɛ́ɛ tɔn dó han mɛ. Wǎn yíyí sín han wɛ.

² Xó ɖagbe ɖagbe ɖé ɖo akpakpa sɔ́ mì wɛ. Xó mímɛ́ e ɖɔ gbé un ja ɔ́, axɔ́sú ɔ́ ná ɖɔ ná wɛ un ɖe. Un jló ná kú hǔn bó ná ɖɔ, mɛ ɖo wěkwín kun dó awǐnnya mɛ wɛ ɖɔhun.

³ A nyɔ̌ ɖɛkpɛ hú gbɛtɔ́ lɛ́ɛ bǐ; a nyɔ̌ xó ɖɔ; énɛ́ ɔ́ wú wɛ Mawu xo ɖɛ ɖumavɔ dó jǐ towe.

⁴ Ahwanfuntɔ́ akowunká, sɔ́ hwǐ towe blá, hwǐ towe wɛ nɔ́ ɖe susu towe xlɛ́, é wɛ nɔ́ ɖe lě e a nyɔ̌ kpɔ́n gbɔn é xlɛ́.

⁵ Yi bó ɖu ɖ'é jí ɖo susu towe mɛ. Byɔ̌ ahwankɛkɛ́ towe mɛ, bó yi fun ahwan dó xó nǔgbó ɔ́ tamɛ; fun ahwan dó wamamɔnɔ lɛ́ɛ tamɛ, bó fun dó hwɛjijɔ ɔ́ tamɛ. Sɔ́ hlɔ̌nhlɔ́n towe dó dó nǔ sin ní vɛ́ jlɛ́.

⁶ Gǎ towe lɛ́ɛ sín nu xwíɖí; gǎ towe ná xo kɛntɔ́ towe lɛ́ɛ sín hǔn zlɛ́, togun lɛ́ɛ ná j'ayǐ ɖo nukɔn towe.

⁷ Axɔ́súzinkpo towe ná nɔ ayǐ káká yi káká sá, axɔ́súzinkpo Mawu tɔn ɖɔhun. Hwɛjijɔ jí wɛ axɔ́súɖuɖu towe jínjɔ́n.

⁸ A yǐ wǎn nú hwɛjijɔ, a gbɛ̌ wǎn nú nǔ nyanya; énɛ́ ɔ́ wɛ zɔ́n bɔ Mawu, Mawu towe kɔn ami dó ta nú we; awǎjijɛ sín ami wɛ é kɔn dó ta nú we, bó dó sɔ́ we ɖó vo ɖo hǎgbɛ́ towe lɛ́ɛ mɛ.

⁹ Célu wǎnnywɛ́ mǐla, alowɛ́si kpódó kesya kpó sín wǎn wɛ è nɔ se ɖo nǔ e a nɔ dó lɛ́ɛ mɛ. Xwé towe ɔ́, ajinakúɖú wɛ è dǒ ba acɔ́ ná; è nɔ́ ɖo nǔ xo wɛ ɖo fínɛ́, bó ná dó ɖe ayi towe ɖ'ayǐ.

¹⁰ Axɔ́ví gěgé ɖo asi towe lɛ́ɛ mɛ. Táta ɔ́ ká ɖo ɖisí towe xwé; nǔ e é dó ba acɔ́ ná lɛ́ɛ ɔ́, siká akú wɛ è dǒ bló.

¹¹ Đyɔ̌vǐ, vɛ̌ kpɔ́n; ɖǒtó bó se; ɖe ayi sín togun towe wú, bó ɖe ayi sín daá towe xwé wú.

¹² Đɛkpɛ towe ní dɔn axɔ́sú ɔ́. Bɛ́ sín din ɔ́, é wɛ nyí Aklúnɔ towe. Énɛ́ wú ɔ́, nɔ ɖe kɔ́ n'i.

¹³ Ahwlivú Tíi tɔn, dɔkunnɔ ɖaxó ɖaxó lɛ́ɛ, mɛ e ɖó alɔnu hú mɛ bǐ lɛ́ɛ ná nɔ́ dó agban wá nú we, bó ná dó nyɔ́ ɖo así we.

¹⁴ Axɔ́si ɔ́ nɛ́ ɖo dadá ɔ́ hɔnmɛ byɔ́ wɛ nɛ́. É ɖésú ɔ́ bǐ nɔ́ kɔ́n; avɔ e ɖo wǔ tɔn lɛ́ɛ ɔ́, sikákan wɛ è dǒ kó.

¹⁵ Avɔ e mɛ é zɔ́n wá axɔ́sú ɔ́ xwé lɛ́ɛ ɔ́, bǐ wɛ è kó; è sɔ́ kan tɛnmɛ tɛnmɛ dó kó; ɖyɔ̌vǐ gbɛ̌ tɔn lɛ́ɛ kplá ɛ, bɔ è kplá yě wá nú we.

¹⁶ È kplá yě kpó awǒbóbó kpó, kpódó awǎjijɛ kpó. Yě byɔ́ axɔ́sú ɔ́ sín hɔnmɛ.

¹⁷ Vǐ towe lɛ́ɛ ná yi tɔ́gbó towe lɛ́ɛ zinkpo jí; a nǎ sɔ́ gǎn yě gbɔn to ɔ́ bǐ mɛ.

¹⁸ Un ná nɔ́ flín lě e a xɔ susu sɔ é vǐ, bó ná flín vǐvú. Énɛ́ ɔ́, togun lɛ́ɛ bǐ ná nɔ́ ɖo susu kpa nú we wɛ tɛgbɛ káká sɔ́yi.