Ɖɛhan 44 - MAWUXÓWÉMA

Mawu gbɛ́ mǐ

¹ Xó lómílómí Kolée ví súnnu lɛ́ɛ tɔn dó han mɛ.

² Mawu, nǔ e a wa ɖ'ayǐ xóxó lɛ́ɛ ɔ́, tɔ́ mǐtɔn lɛ́ɛ wlí ɖɔ bɔ mǐ se kpó tó mǐtɔn kpó.

³ A sɔ́ hlɔ̌nhlɔ́n towe dó nya akɔta ɖě lɛ́ɛ, bó sɔ́ tɔ́ mǐtɔn lɛ́ɛ ɖó tɛn yětɔn mɛ. A dǒ ya nú togun ɖě lɛ́ɛ, bó dó ná tɛnmɛ yě.

⁴ Đó tɔ́ mǐtɔn lɛ́ɛ ɔ́, hwǐ yě ɖésúnɔ tɔn wɛ yě dó yí to ɔ́ ná ǎ, é ká nyí hlɔ̌nhlɔ́n yě ɖésúnɔ tɔn wɛ hwlɛ́n yě gán ɖo ahwan ɔ́ mɛ ǎ, ɖisílɔ towe wɛ, hlɔ̌nhlɔ́n towe wɛ, kpɔ́nɔxámɛ towe wɛ, ɖó a yǐ wǎn nú yě.

⁵ Mawu, hwi wɛ nyí axɔ́sú ce, ɖe gbe bónú Jakɔ́bu ví lɛ́ɛ ná gán ɖo ahwan ɔ́ mɛ.

⁶ Hwi wɛ nyí tɔn, mǐ nɔ zin kɛntɔ́ mǐtɔn lɛ́ɛ dɛ́. Hwi wɛ nyí tɔn, mǐ nɔ nyínyɛ́ mɛ e kpé hun xá mǐ lɛ́ɛ.

⁷ Gǎ ce wú wɛ un gán jɛ ǎ; hwǐ ce wɛ ná hwlɛ́n mì gán ǎ,

⁸ hwi wɛ nɔ hwlɛ́n mǐ gán ɖo kɛntɔ́ mǐtɔn lɛ́ɛ sí; hwi wɛ nɔ dó winnyá mɛ e gbɛ́ wǎn nú mǐ lɛ́ɛ.

⁹ Mawu, ayǐhɔ́ngbe ayǐhɔ́ngbe ɔ́, hwi mɛ wɛ mǐ nɔ́ xɔ susu ɖe, bó nɔ́ ɖo nyǐkɔ towe mlá wɛ hwebǐnu. Agbɔ̌n

¹⁰ É ká ɖo mɔ̌ có, a jǒ mǐ dó, a dǒ winnyá mǐ, ahwangɔnu mǐtɔn lɛ́ɛ xwe ahwangbénu ɔ́, a sɔ́ nɔ́ kplá yě yi ǎ.

¹¹ A nɔ jó mǐ dó, bɔ mǐ nɔ́ jó agɔ yi gǔdo ɖo kɛntɔ́ nukɔn, bɔ mɛ e gbɛ́ wǎn nú mǐ lɛ́ɛ nɔ́ bɛ́ nǔ e nyí mǐtɔn lɛ́ɛ bǐ hɛn yi.

¹² A nɔ jó mǐ lě e è nɔ jó lɛ̌ngbɔ́ nú lanhutɔ́ é ɖɔhun. A nɔ gba mǐ dó kpé akɔta lɛ́ɛ mɛ.

¹³ A nɔ sa togun towe kpɔcɔnu; a dǒ axivɛ́ ná ɖěbǔ ǎ.

¹⁴ A sɔ́ mǐ dó húzú zuntín nú mɛ e ɖo akpá mǐtɔn lɛ́ɛ; mǐ húzú slǎmɛɖɔnú, mǐ húzú nǔkiko nú mɛ e lɛ́ lɛ̌ dó mǐ lɛ́ɛ.

¹⁵ A sɔ́ mǐ dó húzú lǒdónú akɔta lɛ́ɛ tɔn, bɔ togun lɛ́ɛ nɔ́ ɖo nyɔmɛ ɖɔ mǐ wú wɛ.

^16-17 Ayǐhɔ́ngbe ayǐhɔ́ngbe ɔ́, nú un mɔ kɛntɔ́, mɛ e ɖo winnyá dó mǐ wɛ, bó ɖo xó ba mǐ wɛ, bó ɖo mǐ zun wɛ ɔ́, wun nɔ kpɛn mì, winnyá nɔ́ hu mì káká bɔ un sɔ́ nɔ́ sixú zé ta ǎ.

¹⁸ Nǔ énɛ́ lɛ́ɛ bǐ ɖo jijɛ dó mǐ jí wɛ, có mǐ ká wɔn we ǎ, mǐ ká jɛ do nú akɔ e a jɛ xá mǐ ɔ́ ǎ.

¹⁹ Ayi mǐtɔn gosín wǔ we ǎ; mǐ lɛ́ kɔ sín ali e a ɖe nú mǐ ɔ́ jí ǎ.

²⁰ Nǔ ɖo mɔ̌ có a wa nǔ xá mǐ, mǐ ɖíe wá ɖo avǔn gbě tɔn lɛ́ɛ tɛ́ntin e; a sɔ́ mǐ dó ablu gɔngɔn mɛ.

²¹ Nú mǐ kó wɔn hwi Mawu mǐtɔn ɔ́, bó yi sɛn nǔmɛsɛn to ɖěvo mɛ nu lɛ́ɛ tɔn wɛ ɔ́,

²² a nǎ gɔn ma tunwun ǎ; ɖó hwi Mawu ɔ́, a tunwun nǔ e ɖo gbɛtɔ́ sín ayi mɛ é.

²³ Hwi wú wɛ è nɔ ɖo mǐ hu wɛ ayǐhɔ́ngbe ayǐhɔ́ngbe; è nɔ mɔ mǐ dó mɔ lɛ̌ngbɔ́ e è kplá xwe akpákpó jí é.

²⁴ Aklúnɔ fɔ́n! Nɛ̌ ka gbɔn bɔ a ka ɖo amlɔ dɔ́ wɛ? Fɔ́n! Ma jó mǐ dó káká sɔ́yi ó!

²⁵ Nɛ̌ ka gbɔn bɔ a zě hwiɖée hwlá dó mǐ? Nɛ̌ ka gbɔn bɔ a wɔn lele e sa wɛ mǐ ɖe ɔ́? Nɛ̌ ka gbɔn bɔ a wɔn ya e dó nú mǐ wɛ è ɖe ɔ́?

²⁶ A nǎ wɔn mǐ din e mǐ kó j'ayǐ bó ɖo kɔ́gúdu mɛ é wɛ a? Din e mǐ xwe agbɔ̌nnusú do ɖo kɔ́ mɛ é!

²⁷ Sí te bo wá gɔ́ alɔ nú mǐ! Kpɔ́n dó gbejí e a ɖe nú akɔ e a jɛ xá mǐ é wú bó hwlɛ́n mǐ gán.