Ɖɛhan 43 - MAWUXÓWÉMA

¹ Mawu ce, gbo hwɛ nú mì, jɛ ahwan jǐ ce ɖo yě mɛ e mɛ nú má nɔ́ blá wǔ ná ǎ lɛ́ɛ é tɛ́ntin. Hwlɛ̌n mì gán ɖo gbɛtɔ́ nǔhízítɔ́ dǎkaxotɔ́ lɛ́ɛ sí!

² Hwi wɛ nyí Mawu ce, bó nɔ́ nya xɛ ɖo jǐ ce; nɛ̌ ka gbɔn bɔ a nya mì? Nɛ̌ ka gbɔn bɔ un ná nɔ́ ɖo yiyi wɛ wǔbláwúblá ɖo kɛntɔ́ nukɔn?

³ Sɛ́ wěziza towe kpódó gbejíninɔ towe kpó dó, bónú yě ná xlɛ́ ali mì, bó ná kplá mì yi só e a sɔ́ ɖó vo nú hwiɖée ɔ́ jí, bó kplá mì byɔ́ nɔtɛn towe.

⁴ Énɛ́ ɔ́, un ná sɛkpɔ́ vɔ̌sákpe towe, un ná sɛkpɔ́ hwi ɖésúnɔ Mawu ɔ́, hwi mɛ e nyí xomɛhunhun ce, bó nyí awǎjijɛ ce é. Hwe énɛ́ ɔ́ nu ɔ́, un ná sɔ́ kanhún ce, bó ná ji han dó kpa susu nú we; un nǎ ji han dó kpa susu nú hwi Mawu ce ɔ́.

⁵ Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú.