Ɖɛhan 42 - MAWUXÓWÉMA

WĚMA WEGƆ́ Ɔ́ ( 42—72 ) Un nɔ dlɔ́n dó we lě e zungbɔ́ nɔ́ dlɔ́n dó tɔ é ɖɔhun

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ.

² Mawu ce, lě e zungbɔ́ nɔ́ dlɔ́n dó tɔhwín gbɔn ɔ́, mɔ̌ ɖokpó ɔ́ wɛ nyɛ lɔ ɖo dlɔ̌ndlɔ́n dó we wɛ.

³ Mawu sín kɔ ɖo xúxú mì wɛ; Mawu gbɛɖe ɔ́ sín kɔ ɖo xúxú mì wɛ. Hwetɛ́nu un ka ná sixú byɔ́ xɔ tɔn mɛ, bó ná yi nɔtɛn tɔn?

⁴ Zǎn kpó kéze kpó ɔ́, ɖasin wɛ nɔ nyí nǔɖuɖu ce, bɔ hweɖěbǔnu ɔ́, è nɔ ɖo kinkanbyɔ́ mì wɛ ɖɔ: “Fítɛ́ Mawu e a nɔ sɛn é ká ɖe?”

⁵ Un ka nɔ wá flín nǔɖé bɔ nǔɖé nɔ́ bló mì. Un nɔ flín hwenu e un nɔ ɖo togun towe nu xwe xwé towe gbe bɔ mǐ nɔ́ ɖo xwe ɖu wɛ é: un nɔ ɖo yiyi wɛ kpó ahwan wɔ̌buwɔ́bú ɖé kpó, bɔ mǐ nɔ́ ɖo awǎjijɛ kpó kú dó nú Mawu kpó sín han lɛ́ɛ ji wɛ.

⁶ Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú.

⁷ Mawu ce, un blá wǔ bǐ. Énɛ́ ɔ́ wú wɛ un flín we sín fí e un ɖe ɖo Judɛ́ɛn to ɔ́ mɛ é; un flín we sín Ɛmɔ́ɔ, Miseáa sókan ɔ́ mɛ.

⁸ A ɖe gbe bɔ tɔ xo zǐn, bɔ sin ɔ́ ɖě mlí hwǐn ja ɔ́, ɖěvo nɔ mlí jɛ gǔdo tɔn, bɔ bǐ nɔ́ xo wá cyɔ́n mì, bɔ sin bú mì bǐ sésé.

⁹ Kéze ɔ́, Mawu Mavɔmavɔ nɔ ɖe xomɛnyínyɔ́ tɔn xlɛ́ mì; zǎn mɛ ɔ́, han tɔn nɔ ɖo nu ce, han e un nɔ ji ɔ́, ɖɛ wɛ é nyí bɔ un nɔ xo sɛ́ dó Mawu ce, Mawu ce e hɛn mì ɖó gbɛ é.

¹⁰ Un jló ná kanbyɔ́ Mawu, só e un kpɛn zɔn é ɖɔ: “Nɛ̌ ká gbɔn bɔ a wɔn mì? Nɛ̌ ká gbɔn bɔ un ná nɔ́ ɖo yiyi wɛ wǔbláwúblá ɖó ya e dó nú mì wɛ kɛntɔ́ ɖe ɔ́ wú?”

¹¹ Nú mɛ e ma mɔ mì gbɔ ǎ lɛ́ɛ ɖo zunzun mì wɛ bó ɖo kinkanbyɔ́ mì wɛ magbokɔ ɖɔ fítɛ́ Mawu e nyi nɔ sɛn ɔ́ ká ɖe a jí ɔ́, xú e ɖo lan ce mɛ lɛ́ɛ bǐ wɛ nɔ́ só.

¹² Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú.