Ɖɛhan 40 - MAWUXÓWÉMA

Un ná jlá nǔ e a wa nú mì lɛ́ɛ nú mɛ bǐ

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Mawu Mavɔmavɔ wɛ un ɖo te kpɔ́n, bɔ é nyi kɔ kpɔ́n mì, bó se xó e sú ylɔ́ ɛ wɛ un ɖe é.

³ É ɖe mì sín do e mɛ è nɔ jɛ bó nɔ́ dɔn ɔ́ mɛ; é ɖe mì sín babá glɔ́; é sɔ́ mì xwe afɔ te ɖó só jí; é bló bɔ un nɔ tɛ afɔ ayǐ bó nɔ́ gó.

⁴ É zé han yɔ̌yɔ́ ɖé dó nu nú mì; han ɖé wɛ bó nɔ́ kpa susu nú Mawu mǐtɔn. Mɛ gěgé ná se bó ná ɖó sísí nú Mawu Mavɔmavɔ, lobo ná zé yěɖée jó n'i.

⁵ Nǔ nyɔ́ nú mɛ e nɔ ɖeji dó Mawu Mavɔmavɔ wú é, mɛ e má nɔ dó goyítɔ́ lɛ́ɛ gbɛ́ ǎ é, mɛ e ma nɔ dó nǔhízítɔ́ lɛ́ɛ há ǎ é.

⁶ Nǔ jí wǔ e a blǒ nú mǐ lɛ́ɛ sukpɔ́ mɛ nya! Mawu Mavɔmavɔ, Mawu ce, towe ɖɔhun ɖe ǎ; nǔ ɖagbe sín nɛ́ a sɔ́ ɖó te nú mǐ ná! Yě sukpɔ́ bó gégé, un sixú ɖɔ bǐ ǎ, un ka sixú jlɛ́ ǎ.

⁷ A ba ɖɔ è nǐ sá vɔ̌ nú émí ǎ; a jlǒ ɖɔ è nǐ ná nǔ émí ǎ; a nǎ mɔ jɛ mɛ tɔn mì. A jlǒ ɖɔ è nǐ dó kanlin zo dó sá vɔ̌ nú émí ǎ. A ka ba ɖɔ è nǐ hu kanlin dó hwɛ mɛtɔn lɛ́ɛ tamɛ ǎ.

⁸ Énɛ́ ɔ́ wú wɛ un ɖɔ: “Nyi ɖíe ja e; un hɛn wěma e ɖɔ xó dó wǔ ce ɔ́ bó ja.”

⁹ Mawu ce, jlǒ towe wiwa nɔ́ víví nú mì, sɛ́n towe ɖo ayi ce mɛ ganjí.

¹⁰ Un ɖo hwɛjijɔ towe jlá wɛ ɖo agun ɖaxó ɔ́ mɛ. Kpɔ́n, nu ce xwɛ d'é wú ǎ. Mawu Mavɔmavɔ, hwi ɖésúnɔ tunwun.

¹¹ Hwɛjijɔ towe ɔ́, un sɔ́ hwlá dó ayi ce mɛ ǎ Un ɖo xó sú wɛ, bó ɖo lě e a ɖo gbejí gbɔn ɔ́ ɖɔ wɛ; un ɖo lě e a hwlɛ̌n mì gbɔn é ɖɔ wɛ. Un sɔ́ xomɛnyínyɔ́ towe kpó gbejíninɔ towe kpó hwlá dó agun ɖaxó ɔ́ ǎ.

¹² Mawu Mavɔmavɔ, hwɛ ɔ́, a nǎ gbɛ́ ɖɔ émí kún ná kú nǔ blá wǔ nú mì ó ǎ; xomɛnyínyɔ́ towe kpó gbejíninɔ towe kpó ná nɔ kpɔ́ xá mì hwebǐnu.

¹³ Đó adǎn e ɖo gbigbo mì wɛ gbɔn ɖisí amyɔ ɔ́, un sixú ɖɔ bǐ ǎ. Hwɛ e un hu lɛ́ɛ sín bǎ ɖo xixo mì wɛ; un sɔ́ tunwun hwɛ e un hu lɛ́ɛ bǐ lɔ ǎ; yě sukpɔ́ hú ɖa e ɖo ta ce é; un sɔ́ ɖó akɔ́nkpinkpan ɖěbǔ ǎ.

¹⁴ Mawu Mavɔmavɔ, kɛnklɛ́n bó hwlɛ́n mì; Mawu Mavɔmavɔ, yǎ wǔ wá d'alɔ mì!

¹⁵ Yě mɛ e ɖo kú ce ba wɛ lɛ́ɛ bǐ ní ɖu winnyá bó flú. Mɛ e ɖo nyanya ce ba wɛ lɛ́ɛ ní ba nu tɔn kpo, bó j'agɔ dó gǔdo bó dán ɖě wa gbɔn.

¹⁶ Mɛ e nɔ ɖo kiko mì wɛ “hahaha” lɛ́ɛ ɔ́, yě ní yi winnyá xɔ.

¹⁷ Mawu Mavɔmavɔ, mɛ e ɖo biba we wɛ lɛ́ɛ bǐ ní hun xomɛ bó j'awǎ ɖo hwɛ Mawu Mavɔmavɔ ɔ́ mɛ. Mɛ e yí wǎn nú hwlɛngán towe lɛ́ɛ ní nɔ́ ɖɔ: “Jlɛjlɛ nú Mawu Mavɔmavɔ!”

¹⁸ Nyɛ ɔ́, gbɛ̌dónánɔ wɛ un nyí bó nyí wamamɔnɔ. Lo ɔ́, Aklúnɔ, flín mì. Aklúnɔ, hwi wɛ nyí alɔdómɛtɔ́ ce, bó nyí mɛhwlɛ́ngántɔ́ ce. Mawu ce, yǎ wǔ wá, ma lín ó!