Ɖɛhan 39 - MAWUXÓWÉMA

Gbɛzán gbɛtɔ́ tɔn ɔ́, alɔbá ɖokpó wɛ

¹ Hanjigbɛ́gán Yedutún sín hanjiwéma mɛ wɛ han élɔ́ ɖe. Davídi sín han wɛ.

² Đ'ayǐ ɔ́, un nɔ ɖɔ: “Un ná kpɔ́n afɔ bo ɖe, bó ma wá kɛ nu nyi do bo hu hwɛ ó; un ná nɔ́ hɛn nu ce ɖo gbɛtɔ́ mɛ, ɖo gbɛtɔ́ dídá lɛ́ɛ mɛ, nú tɛ́ntin yětɔn jɛ́n un ɖe ɔ́ nɛ́.”

³ Énɛ́ ɔ́, un gbɔ bo bɔ nu dó aɖǔ; un sɔ́ ɖo nu kɛ wɛ ǎ; un gbɛ́ ɖɔ un kún ná ɖɔ xó ɖé ó, có nǔ e ɖo gbigbo mì wɛ ɔ́, jijɛ jí wɛ jɛ́n é ɖe.

⁴ Hǔn ce nɔ́ ɖo myɔ ji wɛ ɖo xo ce mɛ; azɔn e wɛn wɛ un ɖe é ɖo myɔ kán wɛ, bɔ xó ɖé wá nu ce bɔ un ɖɔ:

⁵ Mawu Mavɔmavɔ, ɖɔ hwenu e gbɛ ce ná vɔ dó ɔ́ nú mì. Đɔ azǎn nabí e un ná nɔ gbɛ xɔ ɔ́ nú mì, bónú má tunwun ɖɔ un kún nyí nǔɖé ó.

⁶ Éɖíe, gbɛzán e a nǎ mì ɔ́, ga tɔn ɔ́, alɔbá ɖokpó wɛ; azǎn nabí e un ná nɔ gbɛ xɔ ɔ́ nyí nǔɖé ɖo nukɔn towe ǎ; nǔgbó wɛ, gbɛtɔ́ e ɖo te ɔ́ bǐ ɔ́, jɔhɔn kpowun wɛ. Agbɔ̌n

⁷ Ɛɛn, gbɛtɔ́ nɔ́ ɖo yiyi wɛ, bó nɔ́ ɖo wǐwá wɛ yɛ ɖɔhun; é nɔ́ ɖo kan xo wɛ, jɔhɔn kpowun wɛ é ká nyí; é nɔ́ ɖo dɔkun kplé ɖ'ayǐ wɛ, bó ká tunwun mɛ e ná wá ɖu ɔ́ ǎ.

⁸ Aklúnɔ, din ɔ́, étɛ́ wɛ un ka sixú ɖó nukún? Hwi ɖó nukún wɛ un ɖe.

⁹ Xɔ mì ɖo hwɛ e un hu lɛ́ɛ bǐ mɛ. Ma jó mì dó nú má ɖu winnyá ɖo xlonɔ lɛ́ɛ nukɔn ó.

¹⁰ Un ɖo xwíí, un ɖo nu kɛ wɛ ǎ, ɖó hwi wɛ ɖo nǔ wa xá mì wɛ.

¹¹ Gbɔ, ma sɔ́ xo mì ɖě ó. Un sɔ́ sixú dɛ ɖo nǔ e dó mì wɛ a ɖe ɔ́ nu ǎ.

¹² A nɔ dɔn tó nú gbɛtɔ́ ɖó hwɛ tɔn lɛ́ɛ wú, bó ná dó gbɛ́ nǔ n'i. A nɔ hɛn nǔ e vɛ́ n'i lɛ́ɛ gblé wǎn ɖu atínsínsɛ́n ɖɔhun. Gbɛtɔ́ ɔ́, jɔhɔn kpowun wɛ; gbɛtɔ́ nyí nǔɖé ǎ. Agbɔ̌n

¹³ Mawu Mavɔmavɔ, se ɖɛ e xo wɛ un ɖe é; ɖǒtó xó e sú ylɔ́ we wɛ un ɖe é; ma dó tókúse avǐ e ya wɛ un ɖe ɔ́ mɛ ó; ɖó jǒnɔ kpowun wɛ un nyí ɖo xwé towe gbe, fí kpɛɖé ná nɔ wɛ jɛ́n un ɖe bó ná yi tɔ́gbó ce lɛ́ɛ ɖɔhun.

¹⁴ Nǎ agbɔ̌n kpɛɖé mì, nú ayi ce ná j'ayǐ, cóbónú má ɖidó bó sɔ́ ná tíin ǎ.